1 Timoti 3 - UWONBƆR A GBƆNPƆŊ LIKƆƆNL

Biwonjiɛm sanliib a bɔr

¹ Ni niɛ nan ye ibamɔn le: Ni ye uninfo tiɛr u sufu ni ke u ban un ŋa uwonjiɛn sanliir ke, ni kpaan nin un tun itoon ŋan.

² Ni ma bu naa kpaan nin uwonjiɛn sanliir li jɔɔ igalin ni. Ni kpaan u li jɔɔ upii uba le kpeŋileŋ, ki laa jɔɔ kiŋuufiiŋi ki ye wan li fir ŋmag uba nbamɔm, ki li ye wan wee bininfob tenn u jilima, ki li ye wan gaan bicham, ki li ye wan li fir wɔɔnn,

³ ki laa ye udanyugbeer, ki laa ye ukɔnban ni, amaa ki li ye wan be soon, ki laa ye umɔkpefari bee ulig ban ni.

⁴ Ni kpaa talar le nin u li ye wan fir ŋmag u niin yaab nbamɔm, wee u buwaab mu li tenn u jilima.

⁵ (Ni ye wan kaa nyi waah li ŋa man ki ŋmag u niin yaab ke, u yin ŋa nii wee ki ŋmag Uwonbɔr a ninfobaa?)

⁶ U laa ye wan yɔɔn ta uba sei Yisa, ni ye man ke u na li kpann kalanbaanidaan ki nan kan litudaril ke ulinlarin.

⁷ Ni kpaa le nin u li ye wan jɔɔ jilima ban kaa ye biwonjiɛmin ban, wee ki laa ji ifa ki lu ulinlarin a kurug n-yaan ni.

Bititerib ban ter biwonjiɛm a bɔr

⁸ Ni li ye man ki sei bititerib mu, ni kpaa talar le nin bi li jɔɔ nbinben ŋan wee bininfob li tenn bi jilima, ki li ye bibamɔndam, ki laa nyuu ndaam takpemi, ki laa ban bin kan tiyɔr tibɔkar bu.

⁹ Ni kpaa le nin bi li ŋmag yada a bɔwoonkaar tan ye ibamɔn nin, wee bi sufu li ween.

¹⁰ Ni kpaa le nin bin mag bititerib nmɔn a binbem ki lig, ni ye baa jɔɔ igalin ke, bin jiɛn bi wee bin ŋa bititerib.

¹¹ Ni ye man le ki sei bititerib nmɔn a piib mu, bi li ye ban jɔɔ jilima, ki laa ye bibɔɔnsubi, amaa wee ki laa ye ban jɔɔ kiŋuufiiŋi ki li be soon ki ye ban wee bininfob ŋa bi yada.

¹² Ni kpaa le nin utiter li jɔɔ upii uba kpeŋileŋ ki ji li ye wan li fir ŋmag u buwaab nin u niin yaab biɛn nbamɔm.

¹³ Ban tun nbamɔm kan sisibol ŋan na ki jɔɔ lipoobil takpem nin bi yada wan wee bi jɔɔ nin Masiya-n.

Tibɔwoonkaar tan polig

¹⁴ Hali nin maah le jɔɔ tama ke n li dan ki nan gɔnniŋ daandaan nan nin, n sɔb kugbɔŋ nan le n seiŋ ikpaan,

¹⁵ ni ye maa dan weem ke, kugbɔŋ nmɔn li che a biɛ bininfob a binbem kaah ye man Uwonbɔr a niin, ban ye Uwonbɔr wan fo a wonjiɛmin, ki ye kijaantelig nin ibamɔn a fiɛl.

¹⁶ Ti biɛn chee tibɔwoonkaarin kaah polig man ti wonjiɛnlin na: U nan degirin nin tigbanann na, Kinaaŋ nan wɔɔn waah kan nnyaŋim man na, Malakam nan kan wa, Bi nan mɔɔn u bɔr ki sei ibol biɛn na, Bi nan ŋa u yada dulinya nan yaan na, U nan ta u don paab nin jilimau.