1 Tesalonika 2 - UWONBƆR A GBƆNPƆŊ LIKƆƆNL

Pɔɔl kaah nan tun man Tesalonika a tiŋin

¹ Ti nabum, ni tɔɔl nyi ke ti dam ni ban kaa gab yɔli.

² Ni nyi taah nan be Filipi a tiŋin wee bi sugir ti ki jin ti fala man, biba nan gbaar le ke bin gɔɔ ti wɔɔnimin, amaa Uwonbɔr a pɔɔmin le ti kan lipoobil ki mɔɔn U bɔŋann nan ki tenn ni.

³ Taah bei ni tibɔr tan nan kaa ye kuŋmaruŋi, kaa ji ye ti jɔɔ lipotiɛbiril liba le, kaa ye kularug mu.

⁴ Amaa ti pag le ke ban wee Uwonbɔr ke bi ŋan nin, Uma ta tibɔŋann nmɔn ki ŋa ti nɔɔn, ni ma bu taa ban ti pag ki penn bininfob a sufu amaa ti ban ti penn Uwonbɔr wan magir ti potiɛlin a sufu le.

⁵ Ni nyi ke taa la nyi ki dan nan pag ni nmɔmɔmi, bee tibɔr tan degin kujaŋuuŋ a bɔri, Uwonbɔr le ye ti siɛra daau.

⁶ Taa nan ban bininfob n pag ti, bee ni ni uba n pag ti bee uninfo uba n pag ti. Taah ye Yisa a toon yin ti bi yin ye litugil le ki sei ni,

⁷ amaa ti nan be le soon, ke upii kaah ŋmag u buwaab man nin.

⁸ Taah jiɛ nim takpemin bu le che ti nan mɔɔn Uwonbɔr a bɔŋann nin ki sei ni, naa ye tibɔŋann nin a binba amaa ki ban ti junn ti miɛfol ni bu taah ban nim takpem n bu.

⁹ Ibamɔn buu, n nabum, ni li tiɛr ke taah mɔɔn Uwonbɔr a bɔŋann nin ki tenn nin, ti yaa baginn nin ti pɔɔninba-n; ti tun itoon nin le nween nin kunyiɛg naah li ŋa man wee ti laa ye litugil ki sei ni ni uba.

¹⁰ Nim nin Uwonbɔr le ye ti siɛradam, taah nan be nin nim ban ŋa yada-n, ti nan be kasi le ki jɔɔ nbuchin binben, kaa jɔɔ igbarigi.

¹¹ Ni nyi ke ti le ŋmag nim le ke baa kaah ŋmag u baan tɔɔl a buwaab man nin,

¹² ki pɔɔgir ni gbanann, ki sɔŋir ni sufu, ki balin ni ke ni li be nbinben ŋan man gbeeg Uwonbɔr wan yin ni ki ta ni kɔɔn U naam man jɔɔ jilima-n a num.

¹³ Ti mu le poor Uwonbɔr le iyoo biɛn, nan bu-n, naah gaa Uwonbɔr a bɔr tan wee ni gbir ti ban nin, ni chee sei tibɔr nmɔn le ke taa ye bininfosaalib a bɔri, amaa ke ti sin ye Uwonbɔr a bɔr ibamɔn le, tan tun nin nim ban ŋa yada-n.

¹⁴ Amaa nim ban ye ti nabum nan, ni toog biwonjiɛm a laginn ban be Judiya wee ki be Masiya ni nle. Ni jin fala ni tɔɔl a bol yaabin le ke biwonjiɛm a laginn nmɔn kaah nan jin fala Juu yaab a nɔɔn man nin,

¹⁵ bi ma nan ku Yisa nin bilinlemin ki mugir ti mu. Bi nan fiin Uwonbɔr a ŋuul pam. Le ki ji ŋa bininfob biɛn a dataag

¹⁶ ki gbaar ban baah li ŋa man wee ti laa pag sei ban kaa ye Juu yaabin wee bin kan nŋmarimi. Man nmɔn le che bi bir lagin ki nan kpaa man. Le Uwonbɔr a ŋuul fii bi bu le u dar bi tul ni joorimin.

Pɔɔl kaah jɔɔ kɔlisa nin un ji gɔnn bi man

¹⁷ N nabum, baah nan fee ki nyan ti wee ti nan fɔɔr sin jiɛn ni-n, ni nan ye tigbanann nin le amaa naa nan ye lipotiɛlin ni, ti gbaar le ke ni ye man biɛn ke ti le ji li kan ni.

¹⁸ Ti bi ban ti dan ni ban le, min Pɔɔl baan tɔɔl le gbaar le ki le gbaar, amaa le sintani kaa sei ti nsan ni.

¹⁹ Ti tama nin ti mɔm ye baa, bee ti nyaŋim a yuchigirig kan wee ti na yin ta kan jilima u Yudaan Yisa ban u jirin daalin ye ki laa? Naa ye nimaa?

²⁰ Ibamɔn nim le ye ti pag nin ti mɔm.