1 Korenti 9 - UWONBƆR A GBƆNPƆŊ LIKƆƆNL

Ntoon a bamɔn nin u toon kaah ye man

¹ Maa ye n baa? Maa ye ntoon naa? Maa kan ti Yudaau Yisa nmɔn naa? Naa ye nim le ye n toon nmɔn a nyɔɔr ti Yudaau nnaa?

² Ni ye maa ye Yisa a toom biba ban ke, amaa nim ban man nbiɛnim kaa be, n ye ntoon le ni ban, nim le ye ndaagim man wɔɔn ke n sin ye ntoon le Uyudaan ban.

³ Maah li ta nan ki kɔn nba bu ban li ji n bɔrin n sɔ.

⁴ Nsan kaa be nin ti li ji ki nyuu?

⁵ Nsan kaa be nin ti ta uwonjiɛnpii ki che u li nɔɔ ti choon ke ti toontuntab nin ti Yudaau a watiib nin Piita kaah ŋaan man n naa?

⁶ Bee ni ye min nin Banabasi a binba le ye ti tun ki jin tibaa?

⁷ Utɔtogir ula ba tog bitɔb wee ki ji jinn ubaa? Bee ŋma li ŋu isiig yan lo iloon wee kaa li ji isiig nmɔn a loon yaa? Bee ŋma kpaa inaa wee kaa li nyu nnaabiim maa?

⁸ Uninfosaal a lam le n ta pag man naa? Naa ye man le nsiimin len naa?

⁹ Ni sɔb Moziz a siim n-yaan ke, “Laa ta niba ki bon kinaajag a mɔb, n-yonn man wee u be kuur idi.” Uwonbɔr a baga be inaa a binba ni lee?

¹⁰ Ibamɔn tim le u pag ki sei, naa ye man naa? Nn, ni sɔb sei tim le, nan bu-n wan ko nin wan kuur biɛn jɔɔ tama uba le ke bi naah li por idi nmɔn.

¹¹ Taah li gaa dulinya nan a wan yɔɔr tan ni ban nin yab ki jon Kinaaŋ a bim man wee ti ta bu-n ni sufu-n ni waa?

¹² Ni ye biba jɔɔ nsan nin bin gaa literil ni ban ke, tim kaa jɔɔ nsan nmɔn ki jon baa? Amaa, taa ta nsan nmɔn tun mi toon yi. Amaa le ki ji fala a booli biɛn ta kaa ban niba nlegin Masiya-n a bɔŋann ni a mɔɔnimin bu.

¹³ Naa nyi ke ban tun Uwonbɔr a wonjiɛn niin n-yaan, bi jiir nya niin lee, le ban mu mann kumanug Uwonbɔr a binbinl bu-n mu por nan wee bi mann libinbinl bu-n lee?

¹⁴ Mambu le Uyudaan sei bimɔb ke ban mɔɔn u bɔŋann nin a jiir nya tibɔŋann nmɔn yaan le.

¹⁵ Amaa maa ta nsan nmɔn ki tun itoon ni. Kaa ji sɔb ni niɛ ke ni seim niba. N kpo ke ni sɔ nin uba n che n gbingbanfaal n ŋa yɔli.

¹⁶ Hali n mɔɔn tibɔŋannin ke, maa li fir fa n gbingbanli, amaa ni kpaa talar le ke n mɔɔn ti. Ni li bir ki seim ni ye maa mɔɔn tibɔŋann nmɔn ke.

¹⁷ Ni ye n bi tun nin n tɔɔl a wiib ke, n bi kpaan nin n ga tiyɔra, amaa naa ye min tɔɔl a wiib bu ke, man ke Uwonbɔr kaah siinim ke n tun man le yen.

¹⁸ Ke n yɔr le ye ni laa? Ni ye nan le: Tibɔŋannin nmɔn a mɔɔnimin ni ye n mɔɔn ti le ki tenn bininfob le bin gbir ki laa yɔ niba, n jɔɔ nsan nin n gaa niba bi ban amaa n mu kaa gaan ni.

¹⁹ Hali maah ye nba wee uba a yomu kaa yem nan, n ta nba le ki kpann uyom ki sei bininfob biɛn, ke n che bininfob takpem ndan Yisa ban.

²⁰ Ni ye n jon Juu yaab ban ke, n be le ke Juu a ninfou win, naah li ŋa man wee Juu yaab n kan nŋmarim. N ji jon ban wee nsiimin ŋmag bin ban ke, n be le ke nsiim nmɔn kaah ŋmag ban ni, (amaa min bu ke nsiim nmɔn kaa ŋmag mi), naah li ŋa man wee nsiim nmɔn kaah ŋmag ban ni n kan nŋmarim

²¹ Ni ye n be ban kaa nɔɔ nsiimin ban ke, n ta nba le ŋa wan kaa nɔɔ nsiim, ke bin kan nŋmarim. (Ni niɛ kaa wɔɔn ke maa nɔɔ Uwonbɔr a siimi, amaa n nɔɔ Masiya a siim le).

²² Maah nan be nin ban a yada waarin, n nan be le ke wan a yada waarin, naah li ŋa man wee bin kan nŋmarim. N che n binbem be le ke bininfob biɛn a binbem kaah be man ni, naah li ŋa man wee n fir fee bininfob bibam ki jaa.

²³ Tibɔŋann nbu le n tun ni niɛ nan biɛn, ke n nan ji ni nyɔɔr.

²⁴ Naa nyi ke bitaaguum gu ke, utaaguun uba kpeŋileŋ le yin guun ki ji ki gaa tiyɔraa? Ni bu, ni li gu nin inunman na wee ki gaa tiyɔr.

²⁵ Bitaaguum biɛn ŋmag biba le ntinnim biɛn ni. Bi ŋaan man ki ban bin gaa tiyɔr tan kaa yuur le, amaa tim ŋaan man ki ban ti ga tiyɔr tan yuur kaa jɔɔ ndiɛm le.

²⁶ Mambu min kaa be ke uninfo wan gu yɔli yɔli n ni, n mu kaa be ke unɔɔkufaar wan far ki lan nni.

²⁷ Aai, n mug n gbanann le ki ŋa ti tiyomir, ke maah mɔɔn tibɔŋannin ki tenn n tab man ni, ni bɔɔn bu min tɔɔl n laa nan lann n yɔri.