1 Korenti 8 - UWONBƆR A GBƆNPƆŊ LIKƆƆNL

Ibinbaan yan baan ki jiin tibawojiir paam

¹ Ki jiin tibawojiir paam: Ti nyi ke ti biɛn jɔɔ nbiɛm. Nbiɛm mu che uninfo far ligbingbanl le, amaa njiɛm ma pɔɔgir uninfo le.

² Wan tug ke u nyi niba ke, u yaadaan kaa la nyi waah bi ye u li nyi man ni.

³ Amaa uninfo wan ban Uwonbɔrin, u ma le Uwonbɔr nyi.

⁴ Tɔ, ki ta jiin ibawol a jiir a jim paam: Ti nyi ke ibawol ye yɔli le dulinya nan yaan, le nweenba kaa ji be ki kpiɛ Uwonbɔr uba nmɔn bu.

⁵ Hali baah yi nan iween nin i be papaab bee dulinya nan yaan ke ni, “iween” takpem nin “biyudam” takpem sin be,

⁶ tim ban ma ke, Uwonbɔr uba kpeŋileŋ le be, u ma ye ti Baa Uwonbɔr wan nan naan niwann biɛn, le Uyudaan uba kpeŋileŋ mu le be u ma ye Yisa Masiya, u ma bu le tiwann biɛn nan naan, le ti mu be u ma bu le.

⁷ Amaa naa ye uninfo biɛn le nyi man ni. Bininfob biba la jɔɔ libawol manil a potiɛl le bi sufu ni, ni bu ni ye bi jin man a jiir ke, ti nann tibawojiir le, bi yada mu kaah kaa pɔɔ-n, bi ban ni ye tibir le.

⁸ Amaa tijiir kaa li fir che ti mal Uwonbɔr ban ni; taa jin ti ke naa yin kpiɛ ti niba, ti mu ji jin ti ke naa yin war ti niba.

⁹ Amaa ni li nyi man, wee ki laa che ni wiib a binbem nkpann litangbag gbiɛrikaal ndaburim a samin ni.

¹⁰ Ni ye uninfo wan a yada waar kan fin wan jɔɔ nbiɛm nan be ji tijiir nbawodiin ke, naah li pɔɔg u sufu wee un ji tibawojiiraa?

¹¹ A biɛm nmɔn bu le che a na big wan a yada kaa pɔɔ-n, wee Masiya nan kpo u bu-n ngab yɔli.

¹² Ni ye a tun man a bir ki sei a nabum ban a yada kaa pɔɔ nan ki che idaburig choo bi ke, Masiya le a ŋa tibir.

¹³ Ni bu, ni ye nan wee n ji-n li che n na big n tun tibir ke, maa ji li ŋman tinann ni, wee ki che un lu.