1 Korenti 6 - UWONBƆR A GBƆNPƆŊ LIKƆƆNL

Biwonjiɛm kaah ji tab a bɔr man

¹ Ni ye ni ni uba jɔɔ limɔkpel nin u kpiɛg wee ki ta ti jon ban kaa ye biwonjiɛmin ban ke bin tan ji ti ke, naa bi ye un ta jo ban ye biwonjiɛmin ban lee?

² Naa nyi ke biwonjiɛm le na yin ji dulinya nan yaab tibɔraa? Ke ni ye nim le na yin ji dulinya nan yaab tibɔr ke, ba ŋa naa kpaan nin ni mann nbɔfinfim nan naa?

³ Naa nyi ke ti na li ji Malakam tibɔraa? Ke ŋma nin chaa baan dulinya nan yaab a binbem maa!

⁴ Ni ma bu ni ye ni jɔɔ limɔkpel nin tibɔr nmɔn a bol ke, ni ta tibɔr nmɔn ki ŋa ban kaa jɔɔ tininkper biwonjiɛmin wee bin ji ti.

⁵ N jin ni ifa nin maah len man nmɔn na. Limɔkpel dan nim a sisiigin ke, nim kaa jɔɔ ulandaan wan li fir mann tibɔr nmɔn naa?

⁶ Le ni tug tab ki chaa bibɔjib ban, hali nin ban kaa ye biwonjiɛmin, le bi ji ni bɔr!

⁷ Ibamɔn buu, naah ji tab a bɔr man ni pii wɔɔn ke ni luu. Ba ŋa wee ŋaa ban a chee igalin naa? Ba ŋa wee ŋaa chee bin jiŋ dulim maa?

⁸ Nan bu-n, ni tɔɔl ji dulim ki galin le ki ŋaan ni na a buwaab mu man.

⁹ Naa nyi ke bipootondam kaa na li kɔɔ Uwonbɔr a naamin naa? Ni laa lar niba: Bininfob ban tun iwanchɔgin toon lipiibanl bee lijabanl bee bibawomanib, bee iwanchɔgin toon bee bijab ban chon tun iwanjaab toon bee bijab ban taar bijatab ki kpann bipiibin,

¹⁰ bee binaayigib, bee kujaŋuuŋ, bee bidanyub bee bitingbiib, bee ban ji tab dulim bi niɛ nan biɛn kaa na yin kɔɔ Uwonbɔr a naamin ni.

¹¹ Nim bibam nan ye man le. Amaa le Uwonbɔr ŋunn ni bir, ki ŋa ni kasi, ki ke ni bɔr ŋan Uyudaan Yisa Masiya a yinlin nin Uwonbɔr a Kasi a Naaŋin bu.

Che ni gbanann ndon Uwonbɔr a yinl

¹² Ni ni biba len ke, “Niwann biɛn kaa bi kɔ.” Amaa naa ye niwann biɛn le li ter ti. Ni ke, “Niwann biɛn kaa bi kɔ.” Amaa maa yin che niba nŋaam tiyomiri.

¹³ “Tijiir ye lipool yaal le, le lipool ye tijiir yaan.” Ni ye ibamɔn le, amaa Uwonbɔr li bii niwann nilee nmɔn biɛn. Tigbanann kaa ye nan wee ti li jɔɔ tun iwanjaab toon ni, amaa ti ye Uyudaan yaan le, le Uyudaan mu ye tigbanann.

¹⁴ Uwonbɔr a pɔɔm bu le fiin Uyudaan nkumin, U na li fiin ti mu nkumin.

¹⁵ Naa nyi ke ni gbanann tug nin Masiya a gbanann lee? Ke n ta Masiya a gbanann nmɔn ki lagin nin wan tun iwanjaab toon naa? Naa li firi.

¹⁶ Bee naa nyi ke wan ta uba ki tugin nin wan tun iwanjaab toon ke, bi nin ye gbanann tiba lee? Ke naah sɔb Uwonbɔr a gbɔŋin ke, “Bi bilee nmɔn le ŋa gbanann tiba-n.”

¹⁷ Amaa wan ta uba ki tugin nin Uyudaan ke, udaan nin Uyudaan nin jɔɔ Kinaaŋ kiba le.

¹⁸ Ni guun nya iwanjaab toon nin na man. Tibir tan biɛn wee uninfosaal tun kaa be u gbanann ni, amaa wan tun iwanjaab toon ke, u tun ki bii u tɔɔl a gbanann le.

¹⁹ Naa nyi ke ni gbanann ye Kasi a Naaŋ a diig lee? Naa ye u ma le Uwonbɔr ta u ki sei ni nnaa? Naa ye niba

²⁰ Uwonbɔr le daa ni kudaapɔɔrug, ni ma bu ni che ni gbanann le jɔɔ jilima ki tenn Uwonbɔr a.