1 Korenti 5 - UWONBƆR A GBƆNPƆŊ LIKƆƆNL

Iwanjaab toon yan be biwonjiɛmin

¹ Ni ye ibamɔn le ke iwanjaab toon be ni sisiigin, nan wee ban kaa ye biwonjiɛm kaa li chee tun ni: N gbir ke uba be do ki dɔɔ nin u baa a poo.

² Le ni jɔɔ kalanbaani! Naa bi ye ni li mɔr le ki sin nyan uja wan tun iwanjaab toon nmɔn ni gbanann nin naa?

³ Hali nin maah kaa be ni ban nin tigbanann nan biɛn ni, amaa n be ni ban kinaaŋin. Le ki paa chinn jin wan tun iwanjaab toon nan tibɔr a li ke n be niin len.

⁴ Ni ye ni nan lagin tab Uyudaan Yisa a yinlin bu wee n be ni ban nin Kinaaŋin ke, wee ti Yudaau Yisa a pɔɔmin be nin ti ke,

⁵ ni ta uninfo wan tun man nmɔn ki ŋubin Sintani a nɔɔn na wee un bii u binben biim a gbanann nmɔn, wee u naaŋ n nan kan nŋmarim Uyudaan a dan daal.

⁶ Naa ŋan nin ni li far ligbingbanli, naa nyi ke boroboro a nyɔgim wama le che boroboro yom fugir ki do nnaa?

⁷ Ni bu, ni jiɛn ni binben kpegim n na, ki ŋa bininfob pɔm ke naah pii be man ni. Bi ta Masiya wan ye ti yuglagir a peebigin mann kumanuga.

⁸ Ni bu ni che ti ji yuglagir a chiig wee ki laa jɔɔ nbinben kpeg man ye titoonbir nin npooton, amaa ki li kpenn ki ŋa bininfob pɔm ki li si nbamɔm nin ibamɔn na.

⁹ N gbɔŋ kan wee n sɔb ki sei ni-n, n pii bei ni ke ni laa nɔɔ bininfob ban tun iwanjaab toon nni.

¹⁰ Naa ye ni nyan niba dulinya nan a ninfob ban tun iwanjaab toon, bee linunchɔril bee ban ji bitab dulim bee ban mann ibawol nle. Ni ye man ke, see ke ni nyan ni ba dulinya nan yaan.

¹¹ Amaa n sɔb ki bei ni ke ni laa jɔɔ nɔɔ nin tab nin ban yi biba ke biwonjiɛm wee ki sin chon tun iwanchɔgin toon lipiibanl bee lijabanl, bee kujaŋuuŋ bee libawomanil bee kutingbiig bee bidanyub bee ban ji bitab dulim. Ni laa lagin ki ka nin u yaadaan ki ji tijiiri.

¹² Ni ye n toonl le ke n ji ban kaa ye biwonjiɛm tibɔraa? Naa ye ti ji ban ye biwonjiɛmin nlee?

¹³ Uwonbɔr le yin ji ban kaa ye biwonjiɛmin tibɔr. “Ni ŋɔɔr bipootondamin ni ban na.”