1 Korenti 4 - UWONBƆR A GBƆNPƆŊ LIKƆƆNL

Masiya a tooi a bɔr

¹ Man bu ni ŋan bininfob li nyi ke ti ye Masiya a toontum le, Uwonbɔr ta U bɔwoonkaar ki ŋa ti nɔɔn ke ti ta pag ki bei bininfob.

² Daandaan nan ni kpaa talar le ke ban wee bi ŋa bi yada-n n tun bi toon nbamɔm.

³ N baga kaa be naah ji n bɔr man bee dulinya a ninfob kaah ji n bɔr man ni, maa ji n ba a bɔr gbaa.

⁴ Maa tiɛr n galin yi, amaa naa wɔɔn ke maa tun tibiri, Uyudaan le ji n bɔr.

⁵ Ni bu ni laa ji uba tibɔr daandaan nan wee n-yonn kaa la foo, ni li guu n-yonn man wee Uyudaan na li foon. U ma na li nyan nan be libunbɔnlin nween ni, ki kpiir tibir tan be uninfo a sufu-n npaan ni, iyaayoo bininfob biɛn na li kan bi pɔg Uwonbɔr ban.

⁶ Daandaan nan, n nabum, nim a nyɔɔr bu le n bigin ni niɛ ki sei min nin Apolosi, ke ni tinn ti ban n wɔɔm man ke, “Ni la tun ki lagir nan sɔb Uwonbɔr a gbɔŋin nin bu” wee nin che ni laa jɔɔ kalanbaani uba bu ki jon u kpiɛgi.

⁷ Ŋma che a jɔɔ nbɔgirim a tab ban naa? Ba wee a jɔɔ wee naa ye bi seiŋ lee? Ke ni ye bi seiŋ le ke, ba ŋa wee ni far igbingban ke baa pu ni lee?

⁸ See ni pii jɔɔ nan biɛn wee ni ban! See ni pii ye bijɔɔndam le! See ni pii ye bibɔrtiib le! Amaa naa ye timi. N sin bi ban ke na ni ŋa bibɔrtiiba, wee ti mu n ŋa bibɔrtiib ki kpiɛ ni bu.

⁹ Min ban ke, n tiɛr ke Uwonbɔr gann tim ban ye itoon nan le ki jiin ti bɔɔn ke taa kpaa talar le liwonjiɛnlin ni. Ki nann bininfob ban wee bi li ku ti npaan ni ki ŋa ti ligaril a ninfob ban wee bi pag ki galin ti wee dulinya nan a ninfob nin Malakam ligin.

¹⁰ Tim ye tijɔri le ki sei Masiya, amaa nim ye bilandam le Masiya ban! Tim ye ndaburim le, amaa nim ye bipɔɔndam le! Ni jɔɔ jilima, amaa tim kaa jɔɔ jilima!

¹¹ Ki nan kpaa iniɛ a yoo nkom nin nnyunyum jɔɔ ti le, ti yee tiwanchar le, le bi boo ti, le ti choon yelin kaa jɔɔ binbeboli.

¹² Ti nɔɔi le ti jɔɔ tun itoon nin inunman. Bi poo imɔɔŋ ŋa ti ke, ti mu kaab ikaab ŋan le ki tenn bi, bi mugir ti le amaa le ti mu chee sei bi.

¹³ Ni ye bi jɔɔ ti kutingbiig ke ti jiin tibɔŋann le. Ki nan kpaa daandaan nan ti nann tiwanchɔgin le dulinya nan yaan, ki ji nan dulinya nan a fatanpol a mɔɔr.

¹⁴ Maa sɔb ni niɛ ke n jin ni ifa le, amaa n kpaan ni le, naah ye nbibankaam nbu.

¹⁵ Nin naah le jɔɔ ban wɔɔnn ni Masiya a bɔr turpiig nan biɛn na, naa jɔɔ baam takpemi, Masiya a bɔŋann nbu le n nan ŋa ni baa.

¹⁶ Mambu n balin ni le, ni li nɔɔ n binbem ma.

¹⁷ Mambu le n tun Timoti, n bija wan wee n ban wee u si ibamɔn Uyudaan a samin ni. U li tiɛr ni maah jɔɔ nbinben man Masiya-n wee ni nɔɔ nan wee n wɔɔn nan yaan biɛn wee n be nin ni tiwonjiɛndirin.

¹⁸ Ni ni biba tiɛr ke maa yin dan nan gɔnn ni, ni ma bu le bi jɔɔ kalanbaani.

¹⁹ Ni ye Uyudaan chee ke, n li gɔnn ni daandaan nan, naa ye kalanbaanidam nan a pipagir a binba bu le n na yin ligi, amaa n ban n kan npɔɔn man wee bi jɔɔ le.

²⁰ Uwonbɔr a naamin kaa ye tipipagir a binba amaa mi ye npɔɔn le.

²¹ Ni ban ni laa? Ni ban n dan ki nan dar ni tul le bee n dan nin njiɛm a Naaŋ nin jiininbaa?