1 Korenti 3 - UWONBƆR A GBƆNPƆŊ LIKƆƆNL

Uwonbɔr a toontum a bɔr

¹ N nabum, maa li fir pag ki sei ni ke maah bi li pag ki sei kinaaŋ a ninfob man nni, amaa n yin pag ki sei ni ke maah bi li pag ki sei dulinya nan yaab man nle, ke bininfob ban nann nbuwaab finfim ban la biɛn nwonjiɛn binben nle.

² N tenn ni nbiim le, naa ye bisaabi, naa la nan kpaan nin bisaabi. Hali daandaan nan naa la kpaan nin bisaabi.

³ Ni le la be le ke dulinya yaabin, ni la jɔɔ lipiiponl le nin limɔkpel ni sisiigin, ni toon kaa be le ke dulinya yaab a toon yaa?

⁴ Ni ye uba ke u nɔɔ Pɔɔl le, wee uba mu ke u nɔɔ Apolosi ke, naa tun le ke dulinya yaab kaah tun man nin nnaa?

⁵ Nin ni ma biɛn nan a bɔɔn, ŋma ye Apolosi? Ke ŋma ye Pɔɔl aa? Ti le ye bitoontum le, ban wee Uyudaan nan ta itoon ki ŋa uninfo uba biɛn a nɔɔn wee ni ŋa yada-n.

⁶ Min le nan bun iwanbool, le Apolosi mu wur nnyum amaa Uwonbɔr le che ni pan ki yabig.

⁷ Wan bun nin wan wur nnyum kaa ye niba, Uwonbɔr le ye niba, nan bu-n U ma che ni pan ki yabirig chaa.

⁸ Wan bun nin wan wur nnyum ye nba le, bi biɛn yin gaa tiyɔr bi toon kaah ye man le.

⁹ Tim le ye Uwonbɔr a toon tun tab; nim le ye Uwonbɔr a kpaab ki ji ye Uwonbɔr a diig.

¹⁰ Uwonbɔr kaah sam kunyunyunbaag nbu, n bil lifiɛl le ke litanma kpegilin, le uba maa tɔɔg li bu, amaa uninfo biɛn li nyi waah maa ki tɔɔg li bu man.

¹¹ Lifiɛl liba kaa ji be wee uba li fir fiɛ wee kaa ye lifiɛl lan pii chinn be nni, li ma ye Yisa Masiya

¹² Ni ye uba yin maa tɔɔn lifiɛl nmɔn bu wee ki jɔɔ salima, bee tikur ninann bee itangbag pɔɔr bee tidaar bee timɔɔr bee ikikag ke,

¹³ u toonl nmɔn li wɔɔn liba la ye lan, nan bu-n Yisa a jirin daal nŋmi li na yin kpiir li ki mag uninfo biɛn a toonl ki lig li ŋam kaah ye man.

¹⁴ Ni ye nŋmi kaa gaa waah maa nan nin ke u li kan u yɔr.

¹⁵ Wan yaal gaa nŋmi ke, u li lann u yɔr, amaa u baantɔɔl ma li kan nŋmarim, le ki nin be ke uninfo wan ŋmar ki nyan nŋmi ni.

¹⁶ Naa nyi ke nim le ye Uwonbɔr a wonjiɛndiig nnaa, le Uwonbɔr a Naaŋ be ni nii?

¹⁷ Ni ye, wan bii Uwonbɔr a wonjiɛndiig n ke, Uwonbɔr mu li bii u yaadaan; Uwonbɔr a wonjiɛndiigin ye kasi a diig le, le ni mu le ye kudiig nmɔn.

¹⁸ Ni laa lar niba. Ni ye uba tiɛr ke u ye ulandaan le dulinya nan yaan ke, un ŋaam u ba “kujɔrug” wee ki fir ŋa ulandaan.

¹⁹ Dulinya nan yaab a lam ye ijɔrig le Uwonbɔr ban. Ke naah sɔb Uwonbɔr a gbɔŋin ke, “Uwonbɔr ta bilandam a lam le ki pen choo bi;”

²⁰ ki ji sɔb niba yaan ke, “Ti yudaau nyi bilandam a potiɛri kaah ye yɔli.”

²¹ Ni bu uba la far u gbingbanl uninfosaal bu! Niwann biɛn ye ni yaal le,

²² Naah ye Pɔɔl, bee Apolosi, bee Piita, bee dulinya nan, bee limiɛfol, bee nkum, bee daandaan nan nin iyoo yan chaan ni, nim le ye ni biɛn,

²³ Masiya le ye ni, le Uwonbɔr mu ye Masiya.