1 Korenti 2 - UWONBƆR A GBƆNPƆŊ LIKƆƆNL

Masiya kaah kpo lidapunpunl bu man a bɔr

¹ N nabum, maah nan dan ni ban ni, maa nan mɔɔn Uwonbɔr a bɔr ki tenn ni nin nmɔmɔn bee nbiɛn takpen ni.

² Amaa maah nan be ni ban ni, maa nan ban n biɛ niba ki ji kpiɛ see Yisa Masiya nin u kum lidapunpunl nbu.

³ N nan dan ni ban nin idaburig, le bijawaam jɔɔm le n gbanann jegil.

⁴ Naa ye bininfosaalib a biɛm le n jɔɔ mɔɔn Uwonbɔr a bɔrin ki tenn ni, amaa ni nyan Kasi a Naaŋin le nin u pɔɔmin

⁵ Naah li ŋa man wee ni yada laa be bininfosaalib a biɛm bu, amaa wee ki li be Uwonbɔr a pɔɔm bu.

Uwonbɔr a lamgɔrikaam a bɔr

⁶ Ti pag nlam a bɔr ki tenn binunwondam ban chegir Uwonbɔr a samin nin le, amaa naa ye dulinya nan a lam man wee bi jɔɔ wɔɔn nni bee dulinya nan a bɔrtiib ban kaa na yin jɔɔ tinyɔɔr kaah ŋmag nlam man n ni.

⁷ Aai, ti pag Uwonbɔr a lam man woo n-yaa bɔr le, amaa le Uwonbɔr pii nan chinn ŋa nlam man li sei ti jilima nmɔn a sili ki guun ti le mi saŋi nin foo.

⁸ Dulinya nan a a bɔrtiib, uba kaa be ki nyi nlam nmɔn ni. Bi bi nyi mi ke, baah nan bi li kpaa ti Yudaau, wan ye jilimadaan nni.

⁹ Ke naah sɔb Uwonbɔr a gbɔŋin ke, “Linunbil kaa kan ni, Litul mu kaa gbiri, le uninfosaal a sufu mu kaa nyi, nan wee Uwonbɔr ŋa ni sili ki guun ban ban win ni.”

¹⁰ Amaa Uwonbɔr ma che U Naaŋin kpiir ki wɔɔn ta, U Naaŋ nmɔn le feen niwann biɛn, hali nin Uwonbɔr kaah woon tibɔr tan gbaa.

¹¹ Ni ŋma nyi Uninfosaal a potiɛl wee naa ye uninfosaal nmɔn a naaŋ kan be u ni nnaa? Man le ye ni, uba kaa nyi Uwonbɔr a potiɛli see Uwonbɔr a Naaŋin a binba.

¹² Kinaaŋ kan wee ti gaa-n, kaa ye dulinya nan a naaŋi, amaa ki ye Kinaaŋ kan nyan Uwonbɔr ban le. U li che U naaŋin ter ti wee ti biɛ u piini nmɔn.

¹³ Taah pag imɔleen yan nmɔn kaa nyan Uninfosaal a wɔɔnim a lamin ni, amaa imɔleen nmɔn nyan Kinaaŋin le, yan ye kinaaŋ a mɔleen ki wɔɔn ibamɔn ni.

¹⁴ Wan kaa jɔɔ Kinaaŋ nmɔn kaa cheel tibɔr tan nya Uwonbɔr a Naaŋin ban ni, tibɔr nmɔn ye ijɔr leen le ki sei u, le waa li fir biɛ ti taai yi, nan bu-n ti ye kinaaŋ a leen le.

¹⁵ Uninfo wan jɔɔ Kinaaŋ nmɔn man feen niwann biɛn le ki biɛ ni taai, amaa uninfo uba kaa li fir biɛ u yaa binbem.

¹⁶ A li ke naah sɔb Uwonbɔr a gbɔŋin ke, “Ŋma nyi Uwonbɔr a potiɛlaa wee ki li fir wɔɔn waa?” Amaa tim ma jɔɔ Masiya a potiɛl.