1 Korenti 12 - UWONBƆR A GBƆNPƆŊ LIKƆƆNL

Kasi a Naaŋ a piini

¹ Daandaan nan n nabum ki jiin kasi a Naaŋ a piini paam maa ban ni li be kaa nyi.

² Ni nyi ke naah kaa nan ye biwonjiɛm n-yonn man ni, ni nan che bi ta ibawol yan kaa fin pagin ki lar ni kɔɔn kulɔŋ.

³ Mambu le n bei ni ke, uninfo wan jɔɔ kasi a Naaŋ a pɔɔm ki pag kaa li fir poo bimɔb ki ŋa Yisa, uba mu kaa li fir ke, “Yisa ye Uyudaan ni,” see kinaaŋin be u ni.

⁴ Kasi a Naaŋ a piini be le balbal, amaa Kasi a Naaŋ ye kiba le.

⁵ Itoon ni be le balbal amaa le Uyudaan ye u ba.

⁶ Itoon a tum mu be le balbal, amaa Uwonbɔr uba le che ni niɛ nan tun bininfobin.

⁷ Uninfo biɛn nan gaa Kasi a Naaŋin kaah sei u ipiin yan ni, bininfob biɛn a teril bu le.

⁸ Kasi a Naaŋ che biba pag nlam a bɔr, Kasi a Naaŋ nmɔn a piini le che biba pag nin nbiɛm Kinaaŋ kiba nmɔn a pɔɔmin,

⁹ Kasi a Naaŋ nmɔn le che biba jɔɔ yada, le ki sei biba mu ipiin yan wee bi jɔɔ teb bibaarib, Kinaaŋ kiba nmɔn a pɔɔm bu,

¹⁰ Kinaaŋ kiba nmɔn le sei uba ligaril a toon a pɔɔm, ki sei uba ilinlen leen a pagim a piini, ki sei uba npɔɔn le u biɛr nnaam a bɔgirim, ki sei uba mu ileen pɔɔn a booli a pagim, le ki sei uba mu ileen pɔɔn nmɔn a kar wɔɔn a pɔɔm.

¹¹ Ni niɛ nan biɛn ye Kinaaŋ kiba nmɔn a toonl le, le u ta sei uninfo biɛn waah ban man.

Tigbanann tiba tan jɔɔ nbɔgirim takpem

¹² Tigbanann ye nba le, hali nin taah le jɔɔ ibɔg ibɔg takpem nmɔn, hali nin ibɔg nmɔn biɛn kaah le yab nmɔn na ti lagin ye gbanann tiba le, Yisa mu ye man le.

¹³ Ti biɛn nan fun Kasi a Naaŋ nmɔn le nin kinaaŋ kiba nin gbanann tiba, ŋaah ye Juu a ninfou bee Girig a ninfou wi, ŋaah ye uyom bee ŋaah ye a ba, Kinaaŋ kiba nmɔn le bi nan ta sei ti nyun.

¹⁴ Tigbanann nmɔn kaa lagin ye gbanann bɔgil liba, amaa ti jɔɔ ibɔg takpem le.

¹⁵ Ni ye litaal len ke, “Maah kaa ye nnɔɔ-n, maa kpiɛ tigbanann nin ke, man kaa li fir che un nya tigbanann nin ni.

¹⁶ Litul mu len ke, “Maah kaa ye nnumbimin ni bu maa kpiɛ tigbanann nin ke,” man kaa li fir che un nya tigbanann nin ni.

¹⁷ Tigbanann biɛn bi lagin ki ye nnumbim ke, ni bi yin ŋa niin wee tigbanann li gbiraa? Ke tigbanann bi lagin ki ye litul ke, ni bi yin ŋa niin wee tin gbir nbaamaa?

¹⁸ Amaa Uwonbɔr lagin igbanann bɔg nmɔn biɛn nba le waah ban ti man.

¹⁹ Ni ye igbanann bɔg nmɔn biɛn bi ye ligbanann bɔgil liba ke, tigbanann nmɔn biɛn bi yin be laa?

²⁰ A le ke naah ye man ni, tigbanann jɔɔ ibɔg ibɔg le, amaa ti ye nba le.

²¹ Nnumbim kaa li fir bei nnɔɔ ke, “Maa baŋi!” Le liyul mu kaa li fir bei itaa ke, “Maa ban ni!”

²² Amaa igbanann bɔg yan be kaa jɔɔ npɔɔn nin kaa bi be ke, tigbanann kaa bi li fir tun ni,

²³ le igbanann bɔg yan wee ti tiɛr ke yaa jɔɔ jilima takpemin, ti ma le ti ŋmag ti nbamɔm. Le igbanann bɔg yan kaa ŋan nin i li be npaan ni nin, ti ma le ti ŋmag ti nbamɔm.

²⁴ Igbanann bɔg yan ŋan ni, kaa ban nterimi. Amaa Uwonbɔr le ta igbanann bɔg nmɔn, ki tugin tab le ki ta jilima takpem sei ligbanann bɔgil lan kaa jɔɔ jilima nmɔn.

²⁵ Ni bu naa kpaan tigbanann li jɔɔ nbɔgirimi. Amaa wee igbanann bɔg nmɔn a baga li be tabin.

²⁶ Ni ye ligbanann bɔgil liba ji fala ke, igbanann bɔg yan gurin biɛn mu ji fala nmɔn le, ni ye ligbanann bɔgil liba kan jilima ke, ni mɔ igbanann bɔg yan gurin le.

²⁷ Daandaan nan ni ye Masiya a gbanann le, ni biɛn le ye tigbanann nmɔn a bɔgi.

²⁸ Biwonjiɛmin, Uwonbɔr nan gann itoon le chinchinn, le ki paan bilinlem, ban kpiɛ mitaa le u gann ban wɔɔnn, le ki nin paan ban tun ligaril a toon, le ki ji paan ban jɔɔ kutebug a piini, nin ban li fir ter bitab, le ki gann bitoontum sanliib, nin ban pag ileen pɔɔn a booli.

²⁹ Ti biɛn le ye itoon naa? Ti biɛn le ye bilinlem maa? Ti biɛn le ye ban wɔɔnn naa? Ti biɛn le tun ligaril a toon yaa?

³⁰ Ti biɛn le jɔɔ kutebug a piin yaa? Ti biɛn le pag ileen pɔɔn naa? Ti biɛn le kar wɔɔn naa?.

³¹ Amaa ni li ban ipiin yan jon i biɛn na. Ke n ji li wɔɔn ni nsan man ŋan jon niwann biɛn.