1 Korenti 11 - UWONBƆR A GBƆNPƆŊ LIKƆƆNL

¹ Ni li be ke maah be man nin nna, ke n mu kaah be ke Yisa kaah be man ni.

Sadiga a yilim a bɔr kuwonjiɛndiigin

² N pagir ni nin naah tiɛr nbu ki la biɛn nin nɔɔ maah nan wɔɔn ni nan biɛn ni.

³ Daandaan nan n ban ni biɛ ke uja biɛn a Yudaau ye Masiya le, upii mu a Yudaau ye u chal le, le Masiya mu a Yudaau ye Uwonbɔr.

⁴ Uja wan chig kiyuchigirig wee ki miɛ Uwonbɔr bee ki mɔɔn Uwonbɔr a bɔr ke, u yaa daan kaa sei u yul nmɔn jilima.

⁵ Le upii wan mu kaa yil sadiga wee ki miɛ Uwonbɔr bee ki len ilinlen leen ke, waa sei u yul nmɔn jilima, le ni nann ke u koo u yul nmɔn le-n.

⁶ Ni ye upii kaa ban un yil sadiga ke, ni ŋan nin un chiɛ u yul bee ki koo u yukper nmɔn, man mu ji ye ifa ke, see ke u yil sadiga.

⁷ Uja kaa kpaan un chig kiyuchigirig kuwonjiɛndiigin ni, nan bu-n waah jɔɔ Uwonbɔr a nunaŋ wee ki ji ye npagim ki sei Uwonbɔr nbu; amaa upii ma ye npagim le ki sei uja.

⁸ Nan bu-n, naa ye upii a gbanann le bi ta naan uja, amaa uja a gbanann le bi ta naan upii;

⁹ Naa ye uja le bi nan naan ki sei upii, amaa upii le bi nan naan ki sei uja.

¹⁰ Ni niɛ nan bu nin malakam bu, ni kpaan nin upii li jɔɔ siɛra a wan u yul bu, wee nin wɔɔn ke u chal jɔɔ u pɔɔm.

¹¹ Amaa Uyudaan ma ban ke, uja kaa li fir be u ba bu ki jiɛn upii, upii mu kaa li fir be u ba bu ki jiɛn uja.

¹² Upii kaah nan nyan uja a gbanann nin ni, man le upii mu ma uja. Amaa niwann biɛn nya Uwonbɔr ban le.

¹³ Ni baan ni bau njee ni ŋan nin upii li miɛ Uwonbɔr wee kaa yil sadigaa?

¹⁴ Ti binbemin ni pii wɔɔn ke uja jɔɔ tiyukper fufɔgir ke ni ye ifa le ki sei u,

¹⁵ upii mu jɔɔ tiyukper fufɔgir ke, naa ye u jilima le yen naa? Tiyukper fufɔgir nmɔn le bi ta sei u ke u li jɔɔ piig u yul.

¹⁶ Amaa ni ye uba ban un fa limɔkpel ki jiin tibɔr nan bu ke, tim nin tiwonjiɛn tab kaa jɔɔ nan wee ti li tun ki kpiɛ ni niɛ bu.

Uyudaan a jiir a jim

¹⁷ Maah yin wɔɔn ni nan nan, maa yin pag ni, naah ti lagin tab ki pag nan nin kaa mann ni, amaa ni bii ni le.

¹⁸ Chinchinn n gbir ke ni ye ni lagin tab biwonjiɛm a laguŋ ke, nbɔgirim be ni sisiigin le, le n sin kan ke ni ye ibamɔn le.

¹⁹ Naa jɔɔ nbiɛnimi, ni ye ni li jɔɔ nbɔgirim le ni sisiigin wee nin wɔɔn ban ye bibamɔndamin kaah ye ban ni sisiigin.

²⁰ Ni ye ni lagin tab ke naa ye Uyudaan a jiirin le ni jii,

²¹ naah be ji n-yonn man ni, ni ji mɔnn tab le, uba kaa guu u kpiɛgi. Uba mɔɔr nkom le, le uba mu nyun ki gbee.

²² Naa jɔɔ ni niin yan yaan wee ni li be ki ji ki nyuu? Bee ni ziɛn biwonjiɛmin le ki jin bilanjiimin ifaa? N yin pag ni ke baa? N li fir pag ni nan be nan buu! Aai maa yin pag ni!

²³ Maah nan gaa nan Uyudaan ban ni, ni ma le n mu ta sei ni: Kunyiɛg kan wee bi nan kɔɔr Yisa-n, le u nan yuur boroboro,

²⁴ waah sei Uwonbɔr kunɔɔpoog ki diɛ n yonn man ni, le u war war le ki ke, “N gbanann sɔ, tan ye ni yaan, ni li ŋaan man wee ki li tiɛr nbu.”

²⁵ Man nmɔn jigin baah nan jin diɛ a bɔɔn le u ji yuur kiyiinyɔɔg, ki len ke, “Kiyiinyɔɔg kan ye Uwonbɔr a poopɔnn tan ye n yaa chamin nsɔ, ni li tun man n-yonn man biɛn wee nin nan nyun ke, ni li tiɛr nbu.”

²⁶ Iyoo yan biɛn wee ni ŋman boroboro nan wee ki nyun kiyiinyɔɔg nan yaan ke, ni mɔɔn Uyudaan a kumin le nin waah na li jirin.

²⁷ Mambu wan ŋman boroboro nan bee ki nyun u yiinyɔɔg n-yaan wee kaa sin nɔɔ nsan man li sei Uwonbɔr a yinlin jilima ke, u yaa daan tun tibir ki sei u Yudaau a gbanann nin u chamin na.

²⁸ Uninfo biɛn ye un mann dibir uba le nbamɔm, wee ki nin fir ŋman boroboro-n wee ki nyu kiyiinyɔɔg n-yaan.

²⁹ Nan bu-n, wan ŋman wee ki nyun wee kaa sin feen ki biɛ Uyudaan a gbanann nmɔn a taai ke, u jin ki nyun litudaril le ki jaa uba bu.

³⁰ Mambu le ni ni bibam gbarig ki buŋ le ni ni bibam kpeg.

³¹ Amaa ni ye ti bi ji ti ba a bɔr ke taa ji bi na li kɔɔ tibɔr a jimin ni.

³² Amaa ni ye Uyudaan jin ti tibɔr ke, ti ga litudaril le na li ŋa man wee ti laa won nan kpo nin dulinya yaabi.

³³ Mambu n nabum, ni ye ni nan lagin ni ji ke ni guur taba.

³⁴ Ni ye nkom jɔɔ wan ke un chinn ji u niin na, wee ni lagin tab ke nin laa ta tibɔr a jim foon ni. Tibɔr tan gurin, n nan dan ke n li wɔɔn ni.