1 Korenti 1 - UWONBƆR A GBƆNPƆŊ LIKƆƆNL

¹ Pɔɔl wan wee Masiya nan yin u ki ta u ŋa u toom Uwonbɔr a bam bu-n, nin ti na a big Sositenesi,

² le sɔb ki poor nim biwonjiɛm a laginn ban be Korenti a tiŋin, nin ban wee Uwonbɔr ŋa bi u yaab Masiya bu-n, le u yin bi ki ŋa bi kasi nin ban biɛn be nan yaan biɛn ki yi ti Yudaau Yisa Masiya a yinl ke bi yudaau nin ti mu a yudaau win.

³ Ti Baa Uwonbɔr nin ti Yudaau Yisa Masiya a nyunyunbasanl nin nposɔɔn li be ni bu.

Tinyɔɔr tan be Yisa ban

⁴ N poor Uwonbɔr iyoo biɛn ni bu, nin waah san ni kunyunyunbaag Masiya bu.

⁵ Naah be nin Yisa-n ni ŋa biwandam le niwann biɛn ni, nin ni pipagir nin ni biɛmin,

⁶ Masiya a bɔr tan wee ti nan wɔɔn ni-n, ni gaa ti nbamɔma.

⁷ Ni bu naa lann Uwonbɔr a Naaŋ a piini ke naah ŋa sili ki guu ti Yudaau Yisa Masiya a jirimin.

⁸ U li ŋmag ni nbamɔm hali nin ndiɛm, wee ni laa nan jɔɔ igalin ti Yudaau Yisa Masiya a jirin daali.

⁹ Uwonbɔr wan yin ni ke ni li jɔɔ nɔɔnintab nin U bija Yisa Masiya wan ye ti Yudaau win, U ye yada daan le.

Nbɔgirim man be biwonjiɛm a sisiigin

¹⁰ N nabum, n balin ni le ti Yudaau Yisa Masiya a yinlin, ke ni biɛn chee sei taba wee nbɔgirim laa be ni sisiigin ni, wee ni li jɔɔ nmɔkpaa man pɔɔ nin lipotiɛl liba.

¹¹ N nabum, Kiloe a niin yaab biba beim ke ni jɔɔ limɔkpel le nin tab.

¹² Nan wee n pag nmɔn ye nan le: Ni ni uba ke “Min nɔɔ Pɔɔl le”, le uba mu ke “Min nɔɔ Apolosi le”; le uba mu ji ke “Min nɔɔ Piita le”; le utɔ mu ke “Min nɔɔ Masiya le.”

¹³ Masiya nmɔn bɔgir lee? Bi nan kpaa Pɔɔl le lidapunpunl bu ni buu? Bee bi fun ni Uwonbɔr a nyunful Pɔɔl a yinl buu?

¹⁴ N poor Uwonbɔr nin maah kaa fun ni ni uba Uwonbɔr a nyunfuli see Kerepusi nin Gayɔsi a binba.

¹⁵ Ni bu, uba kaa li fir len ke bi fun u Uwonbɔr a nyunful n yinlin ni.

¹⁶ (Nn, amaa n ji nan fun Stefana a niin yaab Uwonbɔr a nyunfula, amaa maa ji tiɛr maah fun wan ki kpiɛ.)

¹⁷ Nan bu-n Masiya kaa tum ke n na li fu bininfob le, amaa u tum ke n nan mɔɔn u bɔŋann nle. Tan kaa ye uninfosaal a biɛmi, ni ye man ke Masiya a kum lidapunpunl bu li ŋa yɔli.

Masiya le ye Uwonbɔr A lam nin U pɔɔm

¹⁸ Masiya a kum lidapunpunlin bu-n a bɔr ye ijɔrig le ki sei ban borin, amaa tim ban kan feegabin n ma ni ye Uwonbɔr a pɔɔm le.

¹⁹ Ni sɔb Uwonbɔr a gbɔŋin ke, “N li bii bilandam a lam ki che bibiɛndam a biɛm npaar yɔli.”

²⁰ Ni ye man ke, ulandaan nin be laa? Bee ubiɛndaan nin be laa? Bee ban jɔɔ nnyinyin dulinya nan yaan nin be laa? Naah ye Uwonbɔr taa dulinya nan a lam le ki labir ijɔrig aa?

²¹ Uwonbɔr tɔɔl a lamin bu che dulinya nan yaab a lam kaa fir biɛ wi. Ni nan gbee Uwonbɔr a num nin baah nan ke nan ye ijɔr leen nin kaah nan mɔɔn wee bininfob ban nan ŋa yada-n kan feeja-n bu.

²² Juu yaab ban bin kan ligaril a toonl le, le Girig yaab mu ban nlam,

²³ amaa ti mɔɔn Masiya a kum lidapunpunl bu nle: Tibɔr nmɔn ye litangbag gbiɛrikaal le Juu yaab ban, le ki ji ye ijɔr leen ban kaa ye Juu yaabin ban.

²⁴ Amaa ban wee Uwonbɔr yin bin, Juu yaab nin Girig yaabin, bi ma nyi Masiya kaah ye Uwonbɔr a pɔɔm nin u lam.

²⁵ Uwonbɔr a jɔrigi jɔɔ nlam jon uninfosaal a lama, le Uwonbɔr a daburigi mu pɔɔ jon uninfosaal a pɔɔma.

²⁶ N nabum, ni li tiɛr naah nan ye ban, n-yonn man wee Uwonbɔr nan yin ni. Ni takpem kaa nan ye ban jɔɔ nlam tininforin nin; takpem mu kaa nan ye jilima a ninfobi; le ni takpem mu kaa nan ye nnaam a ninfobi.

²⁷ Amaa Uwonbɔr gann ban wee dulinya nan yaab yi bi ke tijɔri nle ke bin jin ban ke bi ye dulinya nan a landamin ifa; ki ji gann ban wee dulinya yaab yi bi ndaburimin ke bin jin ban ye bipɔɔndam dulinya nan yaan nin ifa.

²⁸ U gann nim ban kaa ye nnaam a ninfob dulinya nan yaan nin nim ban kaa nan ye niba-n, amaa le ki ŋa nan wee dulinya yaab tiɛr ke ni ye niba-n yɔli.

²⁹ U ŋa man le ke uba nlaa fir fa ligbingbanl U nintogili.

³⁰ U ma Uwonbɔr bu le nim be nin Masiya, le u tenn ti U tɔɔl a lam. U ma ŋa ti bibuchim, ki ŋa ti kasi, le ki sei ti nkpenim a manug.

³¹ Ke naah sɔb Uwonbɔr a gbɔŋin man ni, ke, “Wan far u gbingbanl ke, u li far u gbingbanl Uyudaan kaah tun nan nin bu.”