1 Jɔnn 3 - UWONBƆR A GBƆNPƆŊ LIKƆƆNL

Uwonbɔr a buwaab

¹ Ni lig ti Baa Uwonbɔr kaah pu ki jiɛ ti tan lagir man, ke bi li yi ti ke Uwonbɔr a buwaab! Man mu le ti sin ye! Nan bu wee dulinya yaab kaa nyi ti-n ye baah kaa nyi Uwonbɔr nle.

² N jɔtiib, daandaan nan ti ye Uwonbɔr a buwaab le, le taah na yin be man kaa la kpiir wɔɔn ti. Amaa ti nyi ke u nan degirin ke, ti yin be le ke uma-n, nan bu-n ti na yin kan u le ke waah be man nin.

³ Uninfo wan biɛn jɔɔ tama Uwonbɔr ni ke, udaan ŋa uba le kasi ke Yisa kaah be man ni.

⁴ Wan tun tibir ke u bii nsiima; ibamɔn bu, tibir kaa ŋmag nsiimi.

⁵ Amaa ni nyi ke u nan degirin un nan ta ti yaa bir le. Le u ni tibir kaa be.

⁶ Wan biɛn be nin Yisa kaa gbaa tun tibiri. Le wan gbaa tun tibir mu kaa la kan u bee ki nyi wi.

⁷ N bibankaam, ni laa che uba nlar ni ki kɔɔn kulɔŋi. Wan tun nan ŋan nin uma ye ubuchin, a li ke Yisa kaah ye ubuchin man nin.

⁸ Wan tun nan bir ke u ye ulinlaril a ninfou le, nan bu-n ulinlaril pii ye wan tun tibir le npiinimin na. Nan bu wee Uwonbɔr a Bija nan degirin ni, nan ye un bii ulinlaril a toon le.

⁹ Uwonbɔr kaah ma wan biɛn kaa yin gbaa tun tibiri, nan bu-n Uwonbɔr a nunaŋ be u ni, ni bu waa li fir gbaa tun tibiri, Uwonbɔr kaah ma win bu.

¹⁰ Ni niɛ le che ti biɛr ban ye Uwonbɔr a buwaab nin ban ye ulinlaril a buwaab: Ban kaa tun nan ŋan bee kaa jiɛ bi nabumin kaa ye Uwonbɔr a buwaabi.

Ni li Jiɛ taba

¹¹ Tibɔr tan wee ni gbir npiinimin nin sɔ: Ke ti li jiɛ taba.

¹² Ni laa be ke Keenn ni, wan nan ye ulinlaril a ninfou wee ki nan ku u waalin nni. Babu wee u nan ku u waalaa? Nan bu-n u toon yin nan ye tibir le, le u waal mu a toon nan ye tibuchinn.

¹³ Ni laa che nin gar ni, n nabum, ni ye dulinya yaab nan ni ke.

¹⁴ Ti nyi ke ti pii nyan nkumin ki kɔɔ limiɛfolin na, nan bu-n taah jiɛ ti nabumin bu. Uninfo wan kaa jiɛ ke udaan la be nkumin le.

¹⁵ Wan nan u nabig ke u ye uninfokur le, le ni nyi uninfokur kaa jɔɔ limiɛfol lan kaa jɔɔ ndiɛmin ni.

¹⁶ Ni niɛ nan le che ti biɛr njiɛm kaah ye nan: Yisa Masiya kaah nan gaa ti kum ki kpe-n. Ni ŋan nin ti mu nkpo ti nabum bu.

¹⁷ Ni ye uba jɔɔ dulinya nan a faal wee ki kan u nabig wan ban literil, amaa wee kaa jogir u ke, Uwonbɔr a jiɛm yin ŋa nii ki be udaan ban naa?

¹⁸ N buwaab, ni laa che ti jiɛm ye imɔleen bee lilanbil a binba, amaa ni li nɔɔ nin itoon nin ibamɔn.

Lipoobil a jɔɔm Uwonbɔr a nintogil

¹⁹ Ni niɛ nan bu le ti biɛr ke ti nɔɔ ibamɔn, le ni che ti jɔɔ lipoobil Uwonbɔr ban,

²⁰ iyoo yan wee ti sufu bii ti ke ti jɔɔ igalin ke, ti li nyi ke Uwonbɔr jon ti sufu nmɔn na, ki ye wan nyi niwann biɛn.

²¹ N jɔtiib, ni ye ti sufu kaa bii ti ke, ti jɔɔ tidindann Uwonbɔr ban,

²² ki li kan nan biɛn wee ti miɛ U, nan bu-n ti chee U siima, ki tun nan li gbee U num.

²³ U siim sɔ: Ke ti ŋaam U bija Yisa Masiya a yinl yada, wee ki li jiɛ tab ke waah siin ti man nin.

²⁴ Ban chee U siimin be U ban le, le U mu be nin bi. Ni nan le che ti biɛr ke U be nin ti: Kinaaŋ kan wee U sei ti nbu le che ti nyi.