Yohana 8 - Kutsingken Ira Rimam ti Saen Kyag

¹ Ama Yesu tso yi risu Rikwen Zetunn.

² Ti ucwe fam ku si, awu nwunn u kafe ru yi Kusog Rimam tiyang. Meme ande ru ba funn pakob wu. Awu som riben u ku kwen na ba iken.

³ Ande ti ku kwen na ande ira Icwe, ti ande ti kumbub Farisi pu unda iki ba. Awu si unda ti aba ye wu ti amae ti nae. Aba sa wu ba tsi uwe ande.

⁴ A ri te Yesu baa, “Itse, ati ye unda wune ku nae iyag.

⁵ A bae uwae kutsingken na Icwe Musa baa, utso ande abane ati na jwunn wen ba ti atxom. Afu ri ana-fu baa imi?”

⁶ Ira yine, aba ri yi ti uwae kutxae ti aba na u ye Yesu ti riraen. Ama awu pu ku riben u sa kukyikyin kujwo-wu u ku bae iken riben.

⁷ Ti aba tsikunn ti ku rang wu ira, awu nwunn ritsen u ri te ba baa, “Unde iki uwae-ni ti nde ji-wu ikentitibi be, ā sa kutxom jwunn wu tawe.”

⁸ Ama awu kafe kú ti riben ku bae iken riben.

⁹ Ti aba fxen ira yine aba ruye kinjo kinjo sa ti unde ti uwe ru ba tsi ti unde ti ricwunnkyi. Aba ya Yesu ta te unda wu ushi uwog wu. Unda wu tsi si ti kutampwa.

¹⁰ Yesu nwunn ritsen cwucwo u rang unda wu baa, “Unda, aba ta-ba aka? Unde iki uwae-ba ye tu-wu afu ti riraen be a”

¹¹ Unda wu ri baa, “Unde ta-wu be.” Ama Yesu ri baa, “Ame ama ye-m afu ti riraen be. Ru-fu iken-fu. Tsikunn ti yaka ne ru fife yi uwe nde-fu ikentitibi be.”

Yesu Si Uwog ti Saen na Utense

¹² Yesu ri te ande ti kumbub Farisi cwucwo baa, “Ame si uwog ti saen na utense, ko aye ti a putsa m u kyang-wu ikyin uwae kufub be. Ame u nda wu nung uwog paenine, u tu unyang.”

¹³ Ikyaen yine, aba Farisi ri te wu baa, “Afu ku tso risu-fu, ira ti afu ri meme tso-yi kubenti iki be.”

¹⁴ Yesu ri te ba baa, “Ko asiti ame a ku tso risu-m, ayi si ira ti kubenti ikyaen ti, ame nung pu m uwog wu ti ame ru atang ba, ti uwog ti ame ku ru yi atang.

¹⁵ Ani ku pwen itso rikwen na utense. Ame ama ku pwen-m unde iki rikwen be.

¹⁶ A baa, ame na ku pwen rikwén, rikwén-m ú si rikwén ti kubenti, ikyaen ti, ayi si-yi ame kinjo-m amam ti u pwen rikwén yi be. Ame ti Itse-m ti tom m ba ti u pwen yi tetso.

¹⁷ A bae uwae kutsingken Icwe-ni baa, asiti unju ande ifaen a rukwer atso, ira ti aba ri na si kubenti.

¹⁸ Ame ti ku ri ira risu-m, awu Itse-m ti tom m ba ama ku ri ira risu-m.”

¹⁹ Aba rang wu baa, “Itse-fu awu ta aka?” Yesu ri te ba baa, “Ani nung-ni ame, ko Itse-m be. A baa, ani na nung m, ani ú nung pu ni Itse-m ama.”

²⁰ Kiye ti Yesu ku kwen na ba iken yine awu ta kusog Rimam tiyang. Awu tsi fer ti uwog ti ande ku pu rinyangwae na Rimam tsi atang. A ye-ba wu be, ikyaen ti, kiye ti Rimam sa tsi wu ru ba-yi khika be.

Kuru Yesu Apupwen

²¹ Yesu ri te kyi ba cwucwo baa, “Ame ku ru ru yi uwog iki. Isim ti ame a ru fe, ani u sha rifab-m, amaa ikentitibi-ni u tsi ti risu-ni ka sang kiye ti ani u cwu. Ani u ru ka sang tu-ni uwog ti ame ku ru yi atang be.”

²² Ande ndufu ba ku rang atso baa, “A! A! Awu ku ru yi aka nee awu ri baa, ati na ka sang-ti atang be? Ko awu u wen ijwe-wu ti ajwo-wu njwaa?”

²³ Yesu ri te ba baa, “Ani si ana utense ike. Ame si-m ana utense ike ama be. Ame ru uwog Rimam ba.

²⁴ Ayine ti si iken ti nde tawe ame ri te ni baa, ani na u cwu uwae ikentitibi-ni. Asiti ani a cwe-ni baa, ame na si unde wu ti ame si be, ani u cwu kang ti ikentitibi-ni ukwae-ni.”

²⁵ Aba rang wu baa, “Afu si aye?” Yesu ri te ba baa, “Ame si si unde wu ti ame ri te ni ti ti kucang.

²⁶ Ame site ira kuko ti m u ri risu-ni, ti ira kuko ti u tso ikentitibi-ni, amaa ira ti ame ri te ande ti utense si ira ti ame fxen uwog unde wu ti tom me ru ba. Awu tsi kunn kubenti.”

²⁷ Aba nung-ba ti awu ku ri ira te ba risu Itse-wu Rimam be.

²⁸ Ikyaen yine, Yesu ri te ba baa, “Kiye ti ani a ye ra Umbae Unde nwunn ritsen, kiye wune ani u nungye baa, ame na si unde wu ti ame si. Kiye wu, ani u nungye ama baa, ame ti risu-m ame u nde tu-m wande iki be, ama ame ku ri nyáng ira ti awu Itse-m kwen na m amam.

²⁹ Ama awu ti tom me tom ba, awu te m ta tetso, awu ya m ta-wu be, ikyaen ti, ko kiye titini ame ku nde iken ti nyang uwae-wu.”

³⁰ Ande yang-ba akwen ti fxen ira-wu ayine ru uwae kinjo uwog-wu.

Anyisu na Ibrahim ti Kubenti

³¹ Yesu ri te Mbayawuda ti ru uwae kinjo uwog-wu baa, “Asiti ani a tsi kunn ku fur risu riben ti iken ti kwen-m, ani si ande ti ku putsa m ti kubenti.

³² Ani u nung kubenti, ama kubenti u saen ni ta uwae rikaen apyi.”

³³ Ariki ri te wu baa, “Ati si rishi Ibrahim. Ati si ji-ti apyi na unde iki be. Imbyi ira yi ti afu ri baa, ati na u nwangru uwae apyi ne baa imi?”

³⁴ Yesu ri te ba baa, “Ame ku ri te ni kubenti, unde titini ti a ku nde ikentitibi, awu si upyi na ikentitibi.

³⁵ Unde ti si upyi, awu u som kunn-wu uwae kununn itsekuru-wu be, amaa umbae ti kununn itse-wu u som kukunn uwae kununn atang ru fe yi uwe.

³⁶ Ikyaen yine, asiti Umbae Rimam wu a saen fu ta, ayi si kubenti afu si-fu upyi cwucwo be.

³⁷ Ame nung pu m baa, ani na si anyisu ti rishi Ibrahim. Amaa ani ku kwab ti ni na u wen m wen, ikyaen ti, ani paembe-ni iken ti kwen-m be.

³⁸ Iken ti ame ku ri te ni si iken ti ame nung uwog Itse-m. Iken ti ani ku nde si iken ti ani fxen uwog itse-ni.”

³⁹ Aba ri te wu baa, “Itse-ti si Ibrahim.” Yesu ri te ba baa, “Á baa, ani na si anyisu Ibrahim ti kubenti, ani ú nde itso wande ti awu nde.

⁴⁰ Amaa ko ti ame ku ri te ni ira ti kubenti ti ame fxen uwog Rimam, ani ku kwab ti ni na u wen m. Ibrahim nde ji-wu itso iken yine be.

⁴¹ Iken ti ani ku nde si iken ti itse-ni nde ama.” Aba ri baa, “Ati si-ti anyisu ipaen be. Rimam kinjo-wu amam ti si Itse-ti.”

⁴² Yesu ri te ba baa, “A baa, Rimam na si Itse-ni, ani ú ye pu ni ure te m, ikyaen ti, ame ru uwog-wu sang ba utense ike.

⁴³ Imi ti nde titawe ani nungye-ni imbyi ira ti ame ku ri te ni be? Ayi si ikyaen ti, ani sa uwae tsi-ni ti ani u naa atong u fxen ira-m be.

⁴⁴ Ani si ana itse-ni, awu Ukwe Kukyaefa. Iken ti ani ku sha si iken ti nyang uwae-wu, awu itse-ni. Ti kucang-yi awu si unde ti ku wen ande. Awu ku putsa-wu kubenti ama be. Kiye ti awu a ku yer rifen, ayi si-yi iken tishe be, ayi si wande-wu ti kucang-yi akwen, ikyaen ti, awu ku yer kob rifen. Ira titikong meme ku ru uwog-wu ba.

⁴⁵ Iken ti nde titawe ani ru-ni uwae kinjo uwog-m be si ikyaen ti, ira-m ti ame ku ri si kubenti.

⁴⁶ Aye uwae-ni ti u cwe tso baa, awu na ye m ti ikentitibi? Unde iki ta-wu be. Asiti ame a ku ri te ni kubenti ama, imi ti nde titawe ani ru-ni uwae kinjo uwae ira-m be?

⁴⁷ Asiti unde a ru uwog Rimam ba, awu u naa atong u fxen ira Rimam. Ani ru-ni uwog Rimam ba be, nee iken ti nde ani ku naa-ni atong ti ni na u fxen ira-m be.”

Yesu ti Ibrahim

⁴⁸ Ande ndufu ri te Yesu baa, “Enheen! Afu si unde ti Samariya pangma ti ati ri ti kucang. Afu site rijwen titibi!”

⁴⁹ Yesu ri te ba baa, “Ame si-m te rijwen titibi be. Ame ku nda Itse-m kuko. Ani ku nda-ni ame kuko ama be.

⁵⁰ Ame ku sha-m kuko ikyaen risu-m be, amaa awu ti u sha kuko ikyaen-m ta atang. Awu ti ku pwen rikwen risu iken yine.

⁵¹ Kubenti ti ame ku ri te ni, asiti unde iki a fur risu riben te ira ti ame ku ri, unde wune u cwu-wu cwu be.”

⁵² Aba ande ndufu ri te wu baa, “Tine ati nungye pu ti baa, afu na site rijwen titibi ara kubenti. Ibrahim itse-ti kyaen u cwucwu, ande ti ku ya iskin ira Rimam ti kute meme ama cwu, amaa afu ku ri-fu ana-fu baa, asiti unde a nae risu riben ti ira-fu awu na u cwu-wu cwu be.

⁵³ Afu skeb itse-ti Ibrahim ti cwucwu a? Aba ande ti ku ya iskin ira Rimam cwu pu ba. Afu ku sae risu-fu baa, afu na si imi?”

⁵⁴ Yesu ri te ba baa, “A baa, ame na ku nda ijwe-m kuko ayi ú si ti ukaen amen. Unde ti ku nda m kuko si Itse-m. I si awu ti ani ku ri baa, awu na si Rimam-ni.

⁵⁵ Amaa ani nung ji-ni awu khika be, ame nung pu m awu. A baa ame na ri baa, ame na nung-m awu be, ame ú si unde rifen pangma ani, amaa ame nung pu m awu u ku fur risu riben te ira-wu ama.

⁵⁶ Itse-ni Ibrahim tsen utob u pam upam ti wu ú nung itiba-m. Awu nung usir wu u tsen utob.”

⁵⁷ Aba ande ndufu aba rang wu baa, “Asang-fu fob-yi mae ifaen ka mbe rijwe khika be, ama afu kyang rimang u ri baa, afu na sae pu fu Ibrahim ti ayib?”

⁵⁸ Yesu ri te ba baa, “Ame ku ri te ni kubenti, a mbae Ibrahim ayib-m.”

⁵⁹ Ikyaen ira yine ti awu ri ne, aba tob pu atxom ti a na u jwunn wu ti riben atang, amaa awu tam byinn u ya kusog Rimam atang ta.