Yohana 3 - Kutsingken Ira Rimam ti Saen Kyag

Yesu ti Nikodemu

¹ Unde ti uwe Mbayawuda iki ta uten atang ti a ku kunn rinyi-wu baa, Nikodemu. Awu si kinjo uwae kumbub Farisi.

² Utitang usir iki awu ru ba uwog Yesu u ri baa, “Unde ti uwe, ati nung pu ti baa, afu na si unde tiyang ti Rimam tom ru ba. Unde iki u nde tu-wu wande tiyang ti afu ku nde ne be, se unde ti Rimam a te wu som tetso tawe.”

³ Yesu ri te wu baa, “Ame ku ri te fu kubenti, unde ta-wu ti awu u sang Kujwokwe Rimam be, se iken ti a mbae shem pu ba awu tawe.”

⁴ Nikodemu rang wu baa, “A u nde rimang titawe a u mbae shem unde ti kwèn mam pu wu? Awu u kafe sang kyi ti uwae rishwu iya-wu itawe a mbae shem wu a?”

⁵ Yesu ri te wu baa, “Ame ku ri te fu kubenti, unde iki u sang-wu Kujwokwe Rimam be se unde ti a mbae pu ba awu yi fengo na ambyi, ti ana Kusung.

⁶ Unde ku mbae unde, Kusung ku mbae kusung.

⁷ Ti ame ri te fu baa, a na mbae kang ni tishe, ayi ā si-yi iken ti ku fur ayib uwog-fu be.

⁸ Ufunn ku kae ku ru yi uwog ti awu ku sha. Ande ku fxen ujwin ti awu ku kunn, amaa aba nung-ba uwog ti awu kae ku ru atang ba be, u nung-ba uwog ti awu kae ku ru yi atang be. Ayi si ahan uwog unde titini ti a mbae wu uwae Kusung Rimam.”

⁹ Nikodemu rang wu baa, “Ayine u nde rimang tawe ayi u nde tu?”

¹⁰ Yesu ri te wu baa, “Afu si undufu tiyang yi Isirela, ama afu nde rimang u nungye-fu ira yine be?

¹¹ “Ame ku ri te fu kubenti baa, ati ku ri ira risu iken ti ati nungye u ku ri te ni ira risu iken ti ati sae ti ayib-ti, amaa ani paembe-ni ira-ti ayi be.

¹² Ame ku ri te fu ira risu iken ti utense ike. Amaa asiti afu a ru-fu uwae kinjo atang be afu u nde rimang u ru uwae kinjo kiye ti ame a ri te fu ira risu iken ti apupwen?

¹³ “Unde iki ta-wu ti tso ka pu wu apupwen be, se awu Umbae Unde amam. Awu ti nung iken ti apupwen, ikyaen ti, awu si apupwen ba.

¹⁴ Pangma kiye ti Musa ti ande-wu ta uwae kutur, Musa sa akyab kiser u kwen ikentibi u sa kwer risu ukum ikyaen itinwangru ande. Ayi si ahan ama, a u ye ra Umbae Unde kwer risu kutuku

¹⁵ ikyaen ti unde titini ti a ru uwae kinjo uwog-wu, awu ā tu unyang ti tsi kukunn.

¹⁶ “Rimam ye ure te ande ti utense ko timambe, ne iken ti nde awu nda ba Umbae-wu ti si nyáng kinjo-wu amam, ikyaen ti unde titini ti a ru uwae kinjo uwog-wu, awu ā twenji-wu be, amaa, awu ā tu unyang ti tsi kukunn.

¹⁷ Iken ti nde Rimam tom Umbae-wu ba utense si-yi ti wu na pwen ande rikwén be. Ayi si ti wu na nwangru ba.

¹⁸ “Unde titini ti a ru uwae kinjo uwog Umbae Rimam wu, rikwen u ye-yi awu be. Amaa unde ti a ru-wu uwae kinjo uwog-wu be, rikwen ye pu yi awu, ikyaen ti, awu ru-wu uwae kinjo uwog Umbae Rimam awu kinjo-wu amam be.

¹⁹ Nung fengo ti a ku pwen rikwen yi ta ri: Uwog ti saen sang ba pu wu uwae utense, amaa ande pyir-ba awu u ku sha skeb-ba kufub ikyaen ti, aba si ande ti ku nde ikentitibi.

²⁰ Unde ti ku nde ikentitibi ku sha-wu uwog ti saen kyag be, ikyaen ti, awu ku sha-wu ti ikentitibi-wu na nae ise be.

²¹ Amaa unde ti a ku nde iken ti kubenti awu ku ter-wu uwog ti saen kyag be, awu ku ru ba sang uwae-yi ikyaen ti ayi ā tso paenine baa, Rimam ti nda wu nde iken yi.”

Yesu ti Yohana

²² Isim ayine, Yesu ti atugbug-wu nwunn ru yi uten ti Mbayawuda. Awu nde usir ifaen te ba atang u ku nde na ande batisma.

²³ Ti uwae kiye wu ama, Yohana ta uten ti Ayenon ti fifer ti Salim u ku nde na ande batisma atang, ikyaen ti, ambyi ta atang ko timambe. Ande ku ru ba uwog-wu atang, awu ku nde na ba.

²⁴ Kiye wune a ye Yohana sang-ba pursuna khika be.

²⁵ Uwae kiye wune ande ti putsa Yohana ku shaen ishaen ti urae Mbayawuda iki risu icwe na ijwe ti ti jwo ti Mbayawuda ku putsa.

²⁶ Aba ande na Yohana kafe ru ba uwog Yohana u ri te wu baa, “Unde ti uwe, unde wu ti tu fu unju unyim ti Yordan akwen, nee afu ri ira risu-wu, awu ta ike u ku nde na ande batisma, ama ande meme ku ter ku ru yi uwog-wu.”

²⁷ Yohana ri te ba baa, “Unde u tu-wu iken iki be, se ti Rimam a nda wu.

²⁸ Ani ti risu-ni fxen pu ni ira ti m ri baa, ame na si-m Unde wu ti a Tsab Tsi be, ame si nyang atom ti Rimam tom ru ba uwe.

²⁹ Uwog ukwab unda ishe, ayi si ubaen unda ishe ti ku mbe unda ishe wu. Urwan ubaen unda ishe tsi te wu atang u ku fxen wu amam. Awu ku tsen utob kiye ti awu a ku fxen afxenjwin ubaen unda ishe wu. Utob ti tsen yine si ana-m tine. Ijwe-m si fa pu yi.

³⁰ Awu ā ko tsutso, ame ā ko sisi.

³¹ “Awu unde ti ru uwog Rimam apupwen si ba, awu skeb tag iken meme. Unde ti utense ike si iken na utense. Ira ti ri-wu ama si ana utense ike. Amaa, awu ti ru apupwen si ba skeb pu wu ande meme.

³² Awu ku ri ira risu iken ti awu nung ti ayib, ti iken ti awu fxen ti atong, ama ande kyangte-ba ira-wu ayi be.

³³ Amaa unde titini ti paembe ira-wu ayi ku tso baa, Rimam na si Rimam ti kubenti.

³⁴ Awu ti Rimam tom wu tom ba, ira-wu ti awu ku ri, si ana Rimam, ikyaen ti, Rimam nda wu kuko na Kusung-wu ti ititsikunn-yi ta-yi be.

³⁵ Rimam site ure ti Umbae-wu ko timambe. Awu sa iken meme fae si wu kujwo.

³⁶ Unde titini ti a ru uwae kinjo uwog Umbae Rimam wu site unyang ti tsi kukunn. Unde titini ti a pyir ira Umbae Rimam, awu u tu-wu unyang ti tsi kukunn be. Rinae Rimam u tsikunn risu-wu ru fife yi uwe.”