Yohana 20 - Kutsingken Ira Rimam ti Saen Kyag

Itinwunn Yesu Uwae Iticwu

¹ Kiskinn fifae usir ti kucang uwae kutsab, ti ucwefam ku yiyae Mberimu Magadalen ru ka kuskab atang. Ti awu sae, kutxom ti a sa burkyi ufu uwáe kutxú wu mbub ru pu wu.

² Awu ter inyae kafe ru yi uwog Siman Bitrus ti unde wu ti Yesu cwe ira-wu timambe u ri te ba baa, “A ye ra Itsekuru-ti ru pu ba uwae kuskab atang! Ati nung-ti uwog ti aba ye wu ru ka nae atang be!”

³ Uwog wune Bitrus ti unde wu nwunn ru yi kuskab atang.

⁴ Aba meme ifaen-ba ku ter inyae, amaa awu unde ti ifaen wu ter skeb Bitrus u ru ka fob kuskab atang uwe.

⁵ Awu puku u sae unju uwáe wu u nung atupwa atikicwu cwu riben atang, amaa awu sang-wu uwae atang be.

⁶ Ama Siman Bitrus ru ba isim-wu u ba sang fife yi uwáe atang. Awu ama nung atupwa iticwu yi cwu atang,

⁷ ti kutupwa ti a pu cwin sang Yesu risu, awu cwu-wu te atupwa atikicwu wu ti tsitsi be, awu fur kyi u nae kum awu kinjo-wu amam.

⁸ Ama awu unde wu ti ru ba kuskab atang uwe, sang ka uwae uwàe atang tiri. Ti awu sae pakob, awu ru kubenti baa, Yesu na nwunn pu wu ti unyang.

⁹ Ti kucang-yi aba nungye-ba ira ti a bae uwae Kutsingken Rimam baa, awu na u cwu na u shwushwur be.

¹⁰ Ama aba kafe ru yi uwae kununn.

Yesu Tu Mberimu Magadalen

¹¹ Mberimu tsi ufu kuskab atang u ku jwub ira. Ti awu ku jwub ira, awu puku ti wu na sae uwae kuskab wu

¹² u nung atom Rimam ifaen som uwog ti a sa rukom Yesu nae atang kucang. Aba sī atupwa ti tsen. Kinjo som risu, kinjo som umbyi uwog afxen-wu.

¹³ Aba rang wu ira baa, “Unda ne, afu ku jwub imi?” Awu ri te ba baa, “A su ra Itsekuru-m ru pu ba ike, ame nung-m uwog ti a sa wu ka nae atang be.”

¹⁴ Isim ti awu ri mam ira yine awu kafe uwe u nung Yesu tsi atang, amaa awu nung-wu ti unde wu si Yesu be.

¹⁵ Yesu rang wu baa, “Unda ne, afu ku jwub-fu imi? Afu ku sha rifab aye?” Mberimu ku tang baa, Yesu na si unde ti ku nde wande uwae rukong wu u ri te wu baa, “Ite, ayi a si afu ti ye wu ru, ri te m uwog ti afu ye wu ru ka nae atang. Ame u ru ka ye-m awu.”

¹⁶ Ama Yesu kunn wu ti rinyi baa, “Mberimu!” Mberimu kafe uwe tag wu u ri ti unju Mbayawuda baa, “Raboni!” (Imbyi-yi baa, “Unde ti ku kwen iken.”)

¹⁷ Yesu ri te wu baa, “Tekunn-fu ame be, ikyaen ti, ame tso ka-m uwog Itse-m, ti si Itse-ba ama khika be. Amaa ru yi uwog ameinja-m ti ru ka ri te ba baa, ame kafe ku tso yi uwog unde ti si Itse-m u si Itse-ba ama, awu ti si Rimam-m u si Rimam-ba.”

¹⁸ Mberimu, unda ti Magadalen, nwunn ru ka ri te ande ti putsa Yesu ti tsitsi baa, awu na nung pu wu Itsekuru ti ayib, ama awu ti na ri te wu ira ti awu na sa ri ku te ba ne.

Yesu Tatso Risu-wu Uwog Ande ti Putsa-wu

¹⁹ Ureb usir ti tawe wu, ande ti putsa Yesu aba byir risu-ba ti uwog kinjo u cwunn kyi ufu kusog kyi ikyaen ti, aba ku kyen ikyenricwu ande ndufu Mbayawuda. Aba na u nunung, Yesu ru ba tsi kutampwa-ba u kunnji ba ira baa, “Kujimshwur ā te ni som tetso!”

²⁰ Isim ti awu ri mam ira yine, awu tatso ba ajwo-wu ti ishi-wu. Ti aba nung Itsekuru-ba atang, aba tsen utob si-yi ti ti ri be.

²¹ Ama awu ri te kyi ba cwucwo baa, “Kujimshwur ā te ni som tetso.” Ama awu ri baa, “Ame tom ni ku ru pangma ti Itse-m tom me sang ba utense wune.”

²² Awu ri ira yine u nyang unyang si ba risu u ri te ba baa, “Ni mbe Kusung Rimam.

²³ Asiti ani a yata na ande ikentitibi-ba, Rimam ama yata na pu wu aba. Asiti ani a yata na-ni aba be, Rimam yata na-wu aba be ama.”

Yesu ti Toma

²⁴ Toma, ti a ku kunn wu baa, Umbae íshe, kinjo uwae atugbug Yesu rijwe asu ifaen, ta-wu uwae-ba kiye ti Yesu ba be.

²⁵ Ikyaen yine aba ri te wu baa, “Ati nung pu ti Itsekuru ti ayib!” Toma ri te ba baa, “Se iken ti ame a sae pu m nyiyinn ribang ana kusa ajwo-wu u sa kujwo-m tekunn uwog wu, u sa kujwo tekunn kyi ribang ishi-wu titawe ame u ru uwae kinjo.”

²⁶ Isim usir itsongta ande na Yesu som kyi ti uwae kusog atang cwucwo u cwunn kyi ufu kusog kyi. Toma ta te ba atang ama. Ufu kusog cwucwunn, amaa Yesu kpug fa ba atang cwucwo u ru ba tsi kutampwa ba u kunnji ba ira baa, “Kujimshwur ā te ni som tetso.”

²⁷ Ama awu ri te Toma baa, “Sa kujwo tekunn ajwo-m ike ti sae yi. Ndab ta kujwo-fu ti tekunn ishi-m ike. Ya uwae ti kab-fu ta ti ru kubenti!”

²⁸ Toma ri te wu baa, “Afu si Itsekuru-m! Afu si Rimam-m!”

²⁹ Yesu ri te wu baa, “Tine afu ru uwae kinjo ikyaen ti afu nung me a? Titinyang ā si ana ande ti ru uwae kinjo ko ti aba nung-ba ame be!”

Iken ti Nde Titawe A Bae Kutsingken Wune

³⁰ Yesu nde wande ti ku fur ayib ko timambe ayib ande ti putsa-wu ti a bae-ba ayi uwae kutsingken wune be.

³¹ Amaa iken ti a bae tsi ne, a bae yi ikyaen ti ni na ru uwae kinjo baa, Yesu na si Unde ti Rimam Tsab Tsi, ama na si Umbae Rimam, ikyaen ti ni na ru uwae kinjo yi rinyi-wu, u tu unyang.