Yohana 18 - Kutsingken Ira Rimam ti Saen Kyag

A Ye Yesu

¹ Isim ti Yesu jwam mam pu wu Rimam, awu ti ande ti putsa wu nwunn uwog wu u yen ukab ti Kediron. Aba ru ka sang uwae rukong iki ti ta uwog wu.

² Yawuda, unde ti u ye Yesu jabci, nung pu wu uwog wu ikyaen ti, Yesu ti ande ti ku putsa wu ku ru ba kob uwog wune.

³ Ti uwe-yi, Yawuda ru ka uwog ande ti kumbub Farisi, ti ande ti uwe akwen Rimam tiyang u ru ka jwam akyirten yang-ba akwen ti dogari iki uwog-ba u pu ba ru ka uwae rukong atang ama. Aba ye su isu rika ti kucwen urwa atang, ti urwa fitila.

⁴ Yesu nung tag pu wu iken ti a u nde te wu meme. Ikyaen yine, kiye ti aba Yawuda ru ba fob uwae rukong atang awu ruye u ru ka tu ba u rang ba baa, “Ani ku sha aye wu?”

⁵ Aba ri te wu baa, “Ati ku sha Yesu unde ti Nazareti.” Awu cwe baa, “Ame ti si awu.” Awu Yawuda ti ye wu jabci tsi te ande ba atang.

⁶ Kiye ti Yesu ri te ba baa, “Unde wu si ame,” ayib fe ba, aba ru ti isim ti isim u ru ka si ipu.

⁷ Yesu rang kyi ba cwucwo baa, “Ani ku sha aye wu?” Aba ri te wu baa, “Ati ku sha Yesu unde ti Nazareti.”

⁸ Yesu ri te ba baa, “Ame ri te pu m ani baa, ame ti si unde wu. Ayi a si ame ti ani ku sha, ni ya ta ti ande-m bane ā ru-ba iken-ba.”

⁹ Awu ri ira yine ikyaen ti, ti kucang-yi awu ri te Itse-wu Rimam baa, ko kinjo uwae ande ti awu na pu na wu na yag ta-wu be. Ira-wu yine u kumunn kang.

¹⁰ Uwog wune, Siman Bitrus nwaen ra kisim rika-wu u kwab ti u pyera upyi na kukwen Rimam tiyang, ama awu pye ra nyáng kutong-wu ti kujwo rici ru amam. Rinyi na upyi wu si Malikus.

¹¹ Yesu ri te Bitrus baa, “Sa kisim rika-fu kafe si ti uwae imbxa-wu. Ame u ngwa-m kitu rikaen ti Itse-m nda m be a.”

A Pu Yesu Ru yi Kusog Rikwen

¹² Akyirten bane ti unde ti uwe-ba ru ba ye Yesu tiri, u cwong wu ajwo.

¹³ Aba tawe pu wu ru yi uwog unde ti uwe-ba, Anas. Awu si uyeb na Kayafas ti si unde ti uwe na akwen Rimam uwae kusang wu.

¹⁴ Awu Kayafas ti si unde wu ti ri te ande ndufu Mbayawuda ti kucang baa, ayi na nyang skeb ti unde kinjo na cwu ricwu ikyaen ande meme.

Bitrus Shaen Yesu

¹⁵ Ama Siman Bitrus ti atugbug Yesu iki putsa Yesu. Awu atugbug ti ifaen ne si unde ti kukwen Rimam tiyang nung pu wu awu, ikyaen yine awu ti Yesu sang fe yi uwae tabshi kununn kukwen Rimam tiyang.

¹⁶ Amaa Bitrus tsi ti ise unju ufu tabshi. Awu atugbug Yesu ti kukwen Rimam tiyang nung pu wu awu kafe ba u ba ri ira te mbawandab ti ku nungkyi ufu atang u pu Bitrus sang yi uwae tabshi.

¹⁷ Ama mbawandab wu rang Bitrus baa, “Afu si-fu kinjo uwae ande ti putsa Yesu wu be a.” Bitrus ri te wu baa, “Ei! Ame fa-m atang be.”

¹⁸ Kiye wu rijwen ku nde timambe ama apyi aba ti dogari kyae urwa tsi u ku wē. Bitrus ru ka tsi fer ba atang u ku wē urwa ama.

¹⁹ Uwog wune, awu kukwen Rimam tiyang byib Yesu ira risu ande ti ku putsa wu ti risu iken ti awu ku kwen na ande.

²⁰ Yesu ri te wu baa, “Ame ku ri ira-m uwe ande meme ko kiye titini. Iken ti kwen-m meme, ame nde yi uwae asog Rimam ko aka, ti uwae Kusog Rimam Tiyang ike, uwog ti meme Mbayawuda ku funn kob atang. Ame ri fob-m ira iki uwae kitam be.

²¹ Imi ti nde titawe afu ku rang me ira risu iken ti kwen-m? Rang ande ti fxen iken ti m kwen na aba. Rang ba iken ti ame ri te ba. Aba nung pu ba yi.”

²² Kiye ti Yesu ri ira yine, dogari iki ti tsi atang tae wu kujwo u ri baa, “Afu nde rimang u ku ri itso ira yine te kukwen Rimam tiyang?”

²³ Yesu ri te wu baa, “Asiti ame a ri raen ira uwae ira ti m ri ne, ri te ande ti ta ike riraen yi. Asiti ame a ri kubenti ama, imi ti nde titawe afu tae me kujwo?”

²⁴ Ama Anas tom wu ru yi uwog Kayafas, kukwen tiyang. Iji ti a cwong wu ajwo ta ti atang bwe.

Bitrus Pyir Kyi Yesu Cwucwo

²⁵ Ti Bitrus tsi ti atang bwe ku wē urwa, ande ti tsi te wu atang rang wu baa, “Afu si-fu kinjo uwae ande ba ti ku putsa unde wu be a” Amaa, Bitrus shaen ishaen risu-yi baa, “Iyee, m fa-m uwae-ba be.”

²⁶ Kinjo uwae apyi na kukwen tiyang ta atang ama, awu si inja na unde ti Bitrus pyera kutong-wu. Awu rang Bitrus baa, “Ame nung fu uwae rukong akwen, afu te wu tetso ree, re si-yi afu be?”

²⁷ Bitrus pyir kyi cwucwo baa, ayi na si-yi awu be. Ti ira unju-wu ne, mbakunn ta ira tiri.

A Pu Yesu Ru ka Tsi Uwe Bilatus

²⁸ Ti ucwe fam ku yae aba nwunn kununn Kayafas u pu Yesu ru yi ofis na gomna. Awu si urae Roma. Aba ande ndufu Mbayawuda sang-ba uwae kusog atang be, ikyaen ti, aba ku cwe unju risu ira ukwab-ba ti ku ba.

²⁹ Ikyaen yine Bilatus ruye ba tu ba ise u rang ba baa, “Ani ye unde wune ti riraen na imi?”

³⁰ Aba ri baa, “A baa, awu na raen-wu ira iki be, ati ú ye wu ru ba-ti ike be.”

³¹ Bilatus ri te ba baa, “Ni pu wu ru ti ni ka pwen wu rikwen risu iken ti Icwe-ni ri.” Mbayawuda aba ri te wu baa, “A cwe na-ba ati ti ti na pwen unde rikwen iticwu be.”

³² Iken yine nde ikyaen ti ayi ā kumunn ira ti Yesu ri risu iticwu-wu, ti itso iticwu ti awu u cwu.

³³ Bilatus kafe ba sang yi kusog gwamna u nda dogari pu Yesu ru ba tsi uwe-wu u byib wu baa, “Afu ti si ukwe na Mbayawuda a?”

³⁴ Yesu ri te wu baa, “Ira ti rang ayine si ana-fu ti risu-fu ree, re ande iki ti ri ira risu-m te fu?”

³⁵ Bilatus ri te wu baa, “Ame na si urae Yawudiya a. I si ande-fu ti aba kukwen tiyang-ba ti ye fu ru ba sang kujwo-m. Ri te m, imi ti afu nde?”

³⁶ Yesu ri te wu baa, “Kujwokwe-m si-yi ana utense ike be. A baa kujwokwe-m na si ti utense ike ande ti imbyi-m ú ta rika ikyaen ti ame na sang-m kujwo ande ndufu Mbayawuda be. Kujwokwe-m si ana uwog iki.”

³⁷ Bilatus rang wu baa, “Ayi a si ahan, afu si ukwe a?” Yesu ri te wu baa, “Afu ti ri ira yi. Iken ti nde titawe a mbae m sang ba uwae utense wune si ikyaen ti m na ri ira ti kubenti. Unde titini ti si unde ti kubenti, awu ku naa kutong ku fxen m.”

³⁸ Bilatus rang wu baa, “Imi ti si kubenti?” Ti Bilatus ri tag ira yine, awu nwunn u kafe ruye yi ise uwog ande ndufu Mbayawuda u ri te ba baa, “Ame tu-m unde wune ti riraen iki be.

A Pwen Yesu Rikwen Iticwu

³⁹ Amaa pangma ti ani Mbayawuda ku nde ko kusang ti kusang, kiye na Ukwab Itiyafe, ame u saen ta na ni unde kinjo ti ta pursuna. Ani ku sha ti m na saen ta na ni ukwe-ni a”

⁴⁰ Ama aba taen ira ti ribom-ba meme baa, “Iyee! Si-yi unde wune be! Nda ti Barabas.” Barabas ta uwae ande iki ti nwunn u tsi ikub ti gomnati.