Yohana 11 - Kutsingken Ira Rimam ti Saen Kyag

Iticwu na Lazaru

¹ Unde iki ti rinyi-wu si Lazaru nae kicaeb. Awu ta uwae uten ti Betani ti aba mbiya-wu Mberimu ti Marta.

² Awu Mberimu si unda wu ti sa kindob ti ku nung kuyang yaen si ijwe Itsekuru-ti Yesu ti kucang, u ye ikyinn risu-wu fen yi atang. Ru ba sang kiye iki, Lazaru wune nae kicaeb.

³ Aba ambakaya-wu tom atom ru ka uwog Yesu baa, “Itsekuru, urwan-fu nae kicaeb.”

⁴ Kiye ti Yesu fxen ira yine awu ri te ande ti putsa wu baa, “Kicaeb yine u nda-yi Lazaru iticwu be. Ayi si ikyaen ti yi u nda Rimam kuko, ti Umbae Rimam ama ā tu itiyetso.”

⁵ Ikyaen yine, ko ti Yesu site ure te Marta ti kaya-wu ti Lazaru meme,

⁶ kiye ti awu fxen baa, Lazaru na nae kicaeb, awu som ti uwog ti awu ta atang ka kyi usir ifaen.

⁷ Isim yine awu ri te ande ti putsa wu baa, “Ni nwunn ti ti kafe ru ti yi uten ti Yawudiya.”

⁸ Ande ti putsa-wu aba ri te wu baa, “A! A! Unde ti uwe, fengo rwen-yi be ti Mbayawuda ti ta akwen ku sha ti a na u jwunn wen fu ti atxom, ama afu ku sha ti fu u kafe ru ti yi atang a?”

⁹ Yesu sunn ira te ba baa, “Ande ku sae uwog tsi ti kiskinn fifae ru ba sang ureb. Asiti unde a ku kyang ikyin usir taen awu u kyen-wu kufxen be, ikyaen ti, awu ku sae uwog ti saen kyag na usir.

¹⁰ Amaa asiti awu a ku kyang ikyin utitang awu u kyen kufxen ikyaen ti, awu site-wu urwa be.”

¹¹ Isim ti Yesu ri mam fe ira yine awu ri kyi baa, “Urwan-ti Lazaru si pu wu kicwag uwe akwen. Ame u ru ka atang ti m kaa shwu wu shwu.”

¹² Ande ti putsa wu ri te wu baa, “Itsekuru, asiti awu a nae kicwag awu u shwur pu wu.”

¹³ Imbyi ira yi ti Yesu ri, awu ku ri baa, Lazaru na cwu pu wu. Amaa, aba ku tang-ba baa, ayi na si kicwag ti cwag ne.

¹⁴ Ikyaen yine Yesu ri te ba farang baa, “Lazaru cwu pu wu,

¹⁵ amaa ikyaen ira-ni ame ku tsen utob ti m ta-m atang te wu be. Iken yine nde ikyaen ti ni na ru uwae kinjo. Ni sunwunn ti ti ru yi uwog-wu.”

¹⁶ Toma, ti a ku kunn wu baa, Umbashe, ri te ande ti putsa Yesu ti tsitsi baa, “Ni ru ba ti ti putsa-wu ru ti ti ru ka te wu cwu te atso.”

Itinwunn Lazaru Uwae Iticwu

¹⁷ Kiye ti Yesu ru ba sang Betani atang, awu nung ti a sa rukom Lazaru nae pu ba uwae kuskab ka pu wu usir inje.

¹⁸ Fengo ti sa tsi Urushelima ru ka Betani ka-yi lamba ifaen be.

¹⁹ Ikyaen yine Mbayawuda ko timambe nwunn Urushelima ti a na u ru ba nung Marta ti Mberimu ti a na ri jim ba utob ikyaen iticwu na inja-ba.

²⁰ Kiye ti Marta fxen ye baa, Yesu na ru ku ba, awu nwunn ruye u ka kyangte wu fengo, ama Mberimu som ti uwae kusog.

²¹ Marta ri te Yesu baa, “Itsekuru-m, a baa, afu na ta ike inja-m ú cwu-wu be!

²² Amaa ame nung pu m baa, tine, afu a jwam Rimam awu u nde iken meme ti afu ku sha.”

²³ Yesu ri te wu baa, “Inja-fu u kafe ba ti unyang-wu.”

²⁴ Marta ri baa, “Ame nung pu m baa, awu u nwunn uwae kuskab uwae usir ti ricwunnkyi.”

²⁵ Yesu ri te wu baa, “Ame ti si itinwunn uwae iticwu. Ame ti si unyang. Unde titini ti awu a ru uwae kinjo uwog-m, awu u tsi ti user ko ti awu a cwu.

²⁶ Unde titini ti a site unyang u ru uwae kinjo uwog-m, awu u cwu-wu cwu ama be. Afu ru uwae kinjo ti ira yine a?”

²⁷ Awu ri te Yesu baa, “Een, Itsekuru-m, ame ru pu m uwae kinjo baa, afu ti na si unde wu ti Rimam tsab tsi. Afu na si Umbae Rimam ti a ri baa, awu na ku ba sang utense.”

Yesu Jwub Ira

²⁸ Ti Marta ri mam ira yine awu kafe ru ka kunn kaya-wu Mberimu ira ti kitam u ri te wu baa, “Unde ti uwe ta ike u ku rang fu rang.”

²⁹ Ti Mberimu fxen ira yine awu nwunn ruye ti ritsen u ru ka tu Yesu.

³⁰ Yesu ta ti isim uten uwog ti Marta tu wu, u sang ba-wu uwae uten atang khika be.

³¹ Kiye ti Mberimu nwunn ti kife u ter ruye yi ise, ande ti ta uwae kusog atang u ku ri jim wu utob, ruye ama u putsa wu. Aba ku tang-ba baa, awu na ku ru yi kuskab Lazaru ti wu na u ru ka jwub ira atang.

³² Kiye ti Mberimu ru ka sang uwog ti Yesu ta atang awu jwunn ikyig uwe-wu u ri baa, “Itsekuru, a baa afu na ta ike, inja-m ú cwu-wu be.”

³³ Ti Yesu nung Mberimu ti Mbayawuda ti te wu ta tetso meme-ba ku jwub ira, ayi ten wu utob.

³⁴ Awu rang ba baa, “Ani sa rukom wu nae aka?” Aba ri te wu baa, “Itsekuru, ba sae.”

³⁵ Yesu ta iten ayib bxib.

³⁶ Mbayawuda ti ta atang ri baa, “Ni nung itso ure ti awu ye te Lazaru!”

³⁷ Ama ariki uwae-ba ri baa, “Unde ti mbubta ayib unde ti mbub ayib si si unde wune be a? Imi ti nde awu nde-wu fengo ti Lazaru u nwangru be? Awu nde tu-wu ti wu byangkyi iticwu Lazaru be a.”

Itishwur Lazaru

³⁸ Iken yi ten sang ka kyi utob Yesu cwucwo, ama awu nwunn u ru ka kuskab atang. Kuskab wu si uwáe kutxú, ama a kaen kutxom ba cwunn kyi wu.

³⁹ Yesu ri te ba baa, “Ni kaen kutxom wune ru atang.” Marta, kaya unde ti cwucwu wu, ri baa, “Itsekuru, uwog wune u shinnkyi ti akong, ikyaen ti, a nji wu nde pu yi usir inje yaka.”

⁴⁰ Yesu ri te wu baa, “Ame ri te m afu baa, afu na a ru uwae kinjo afu na u nung kuko Rimam, be a?”

⁴¹ Ama aba kaenra kutxom wu ru. Yesu sae ayib tso yi apupwen u ri baa, “Ame fxaefa te fu Itse-m ti afu naa kutong u ku fxen m.

⁴² Ame nung pu m baa, afu na ku fxen m ko kiye titini, amaa ame ku ri ira yine ikyaen ande ti ta ike ne, ikyaen ti ā nungye baa, afu ti na tom m ba utense.”

⁴³ Isim ti awu ri mam fe ira yine, awu kunn ira ti ribom-wu meme baa, “Lazaru, ruye ba!”

⁴⁴ Unde ti cwucwu wu ruye ba tsi, afxen-wu te ajwo-wu yir kyi ti atupwa iticwu. Kutupwa iki yir sang kutxuwe-wu. Yesu ri te ba baa, “Ni saen atupwa yine ru ti ni ya wu ta ti wu ru.”

A Myae Fengo ti A u Wen Yesu

⁴⁵ Ande yang-ba ti ru ba ku nung Mberimu, nung iken ti Yesu nde u ru uwae kinjo uwog-wu.

⁴⁶ Ama ariki uwae-ba kafe ru ka ri te ande ti kumbub Farisi iken ti Yesu nde.

⁴⁷ Ikyaen yine aba ande ti Farisi ti ande ti uwe akwen Rimam ru ka kunn byir ande ndufu ti ku myae ira meme u ru ka ri te ba baa, “Ati u nde rimang? Unde wune ku nde wande ti tsotso ti ku fur ayib.

⁴⁸ Asiti ati a byang kyi-ti awu be, meme ande u ru uwae kinjo uwog-wu, ama ande ti Roma u ru ba mbub kusog Rimam-ti si u twenji uten-ti meme.”

⁴⁹ Kinjo uwae-ba ti a ku kunn rinyi-wu baa Kayafas, awu ti si kukwen Rimam tiyang uwae kusang wu, nwunn u ri baa, “Ani nung-ni ira iki be!

⁵⁰ Ani nung-ni ti ayi nyang skeb ti unde kinjo ā cwu ricwu ikyaen ande ti tsitsi meme be a? Ayi a si-yi ahan be, ande ti Roma u ru ba twenji ande-ti patag?”

⁵¹ Kayafas ri-wu ira yine ti risu-wu be. Awu ri ira yine ikyaen ti, awu ti si kukwen Rimam tiyang uwae kusang wu. Rimam nda wu ya iskin baa, Yesu na u cwu ikyaen Mbayawuda meme.

⁵² Si-yi nyáng aba ande ti uten Yawuda amam be, ayi si ikyaen ti awu u kunn byir anyisu na Rimam meme ti shag fa shag fa, ti aba na ru ba ren ba ti uwog kinjo.

⁵³ Ikyaen ira yine, iken ti tsi usir wune ru fe yi uwe, andufu ku kwab ti a na u wen Yesu wen.

⁵⁴ Ikyaen yine Yesu ku kyang-wu ikyin wurr uwae uten Yawudiya cwucwo be. Awu nwunn u ru yi uwog iki ti fer ti kutur u ka som uten ti a ku kunn wu baa, Efiremu. Uwog wune awu te ande ti putsa wu som atang.

⁵⁵ Kiye kyang ku yaen ku pu wu ti Mbayawuda ku nde Ukwab Itiyafe, ti aba ku tangsom ti itiruye-ba uwae uten ti Ejib. Ande nwunn ruye ko umbae uten titini uwae uten atang tso yi Urushelima.

⁵⁶ Ti aba ru ka sang pu ba atang, aba ku sha rifab Yesu. Aba funn uwae kusog Rimam u ku rang atso baa, “Ani ku tang baa, awu na u ru ba uwog Ukwab wune njwaa?”

⁵⁷ Aba ande ndufu ti ku fen Rimam ti Ande ti kumbub Farisi ya iskin te ande baa, unde titini ti a nung pu wu uwog ti Yesu na ta atang, awu na ri te ba te ti a na u ye wu.