Yohana 1 - Kutsingken Ira Rimam ti Saen Kyag

Yesu Si Ira Unju Rimam u Si Uwog ti Saen Kyag

¹ Ti kucangtsi ti Rimam mam utense, Ira Unju-wu ta pu wu atang. Ira Unju-wu ne, awu ti Rimam ta te atso. Ira Unju-wu wune te Rimam si iken kinjo.

² Bag ti kucang, Ira Unju Rimam te Rimam ta te atso.

³ Ira Unju Rimam wune ti si fengo ti Rimam kyae meme iken uwae utense ike. Rimam kyae-wu iken iki be, se yi fengo Ira Unju-wu awune.

⁴ Meme iken ti site unyang tu unyang-yi uwog Ira Unju Rimam wune. Unyang wune nda ande ti utense sae uwog paenine.

⁵ Uwog ti saen kyag wune ku cwe uwog ti kufub, ama kufub jim fob-wu awu be.

⁶ Rimam tom unde iki ru ba, rinyi unde wu si Yohana.

⁷ Awu ru ba ti wu ri te ande ira risu uwog ti saen kyag.

⁸ Awu ti risu-wu si-wu Uwog ti Saen Kyag be, awu ru ba ti wu ri ira risu unde wu ti si Uwog ti Saen Kyag.

⁹ Kiye wu, Uwog ti Saen Kyag ti kubenti sang ku ba yi uwae utense. Awu ti ku ci ku jaen wurwur risu ande meme.

¹⁰ Ti kucang, awu ta pu wu uwae utense. A kyae utense ruye uwog-wu, ande ti utense nungye-ba wu be.

¹¹ Ayi si uten-wu ti awu ru ba sang atang, amaa ande ti uten-wu kyangte-ba wu be.

¹² Ko ti ayi si ahan, meme ande ti paembe wu u ru uwae kinjo uwog-wu, awu nda ba kuko ti a na kafe anyisu Rimam.

¹³ I si-yi unda iki ti kyaen rishwu u mbae ba be, ira unde fa-yi atang be. Rimam ti risu-wu ti si Itse-ba.

¹⁴ Ira Unju Rimam wu sa ijwe rimenn-ti ande u ru ba som kutampwa-ti uwae kiye kpang. Ati ama nungye pu ti riyinn-wu. Ayi si riyinn ti si ana Umbae kinjo ti ruye uwog Itse-wu ba. Awu munn ti ayibrisi ti kubenti.

¹⁵ Yohana ri ira risu-wu u ya iskin baa, “Awune si Unde wu ti ame ri te ni baa, awu na ku ba isim-m, amaa awu si undufu-m, ikyaen ti, ti ti a mbae-ba ame khika be, awu ta pu wu atang.”

¹⁶ Awu ku nda ti rinyangwae risu rinyangwae, ruye uwae itinyang-wu ti ititsikunn-yi ta-yi be.

¹⁷ Uwog Musa ati tu Icwe Rimam, amaa uwog Yesu Kristi ati tu rinyangwae ti ira ti kubenti.

¹⁸ Unde iki ta-wu ti nung ji pu wu Rimam be. Umbae-wu kinjo-wu amam, awu ti risu-wu ti si Rimam, ku som rinwan Itse-wu. Awu ti nda ande nungye Rimam.

Yohana Unde ti ku Nde na Ande Batisma

¹⁹ Kiye iki ande ndufu Mbayawuda ti ta Urushelima tom ande ti imbyi-ba ti ande ti ku nde wande kusog Rimam ru yi uwog Yohana ti a na ka rang wu ira baa, “Afu si aye?”

²⁰ Awu tam-wu aba ira iki be, awu ri te ba farang baa, “Ame si-m Unde wu ti Rimam Tsab Tsi be.” Awu ri ira yine uwe ande meme.

²¹ Ama aba rang kyi wu ira cwucwo baa, “Ayi a si ahan, afu si Eliya a?” Awu ri baa, “Ame si-m Eliya be.” Aba rang wu cwucwo baa, “Afu si unde wu ti ku ya iskin ira Rimam nee ati som ku ji wu a?” Awu ri baa, “Iyee.”

²² Ama aba rang kyi wu baa, “Afu si-fu aye ama? Ati ku sha ti ti na u tu amsa ti ti u sa ru ka ri te ande ti tom ti ru ba. Afu ri baa imi risu-fu?”

²³ Ama Yohana sa ira Ishaya atom Rimam u sa ri te ba baa, “Ame si unde ti tsi uwae kutur u ku ya iskin baa, Itsekuru na ku ba, ni ndab nyang fengo ikyaen-wu.”

²⁴ Ande ti tom ande bane ru ba si ande ti kumbub Farisi.

²⁵ Aba rang wu baa, “Asiti afu a si-fu Unde wu ti Rimam Tsab Tsi be u si-fu Eliya be u si-fu unde wu ti u ru ba ya iskin ira Rimam be ama, imi ti nde ne afu ku nde na ande batisma?”

²⁶ Yohana ri te ba baa, “Ame ku nde batisma-m ti ambyi, amaa unde iki ta kutampwa-ni ti ani nung-ni awu be.

²⁷ Awu ti si unde ti u ru ba isim-m. Ame ko-m ti m u tunn apwafxen-wu be.”

²⁸ Iken yine nde kiye ti Yohana ta Betani u tsi ukunn unyim ti Yordan u ku nde na ande batisma atang.

Yesu Kristi Umbae Mbawen na Rimam

²⁹ Ucwefam kiskinn Yohana nung Yesu ru ku ba yi uwog-wu. Awu ri baa, “Ni sae unde ti ru ku ba ne. Awu ti si umbae iwentam Rimam ti u su ikentitibi na ande ti utense ru.

³⁰ Awune si unde wu ti ame ri ira risu-wu baa, unde iki na ru ku ba isim-m ti rurob-wu skeb pu wu ana-m, ikyaen ti, ti ti a mbae-ba ame khika be, awu ta pu wu atang.

³¹ Ti kucang ame ti risu-m nung-m awu be. Iken ti sa m ba si ikyaen ti ande ti Isirela na nungye wu.”

³² Yohana ri ira risu-wu uwe ande baa, “Ame nung Kusung Rimam si apupwen ba pangma kikwae u ba som tsa risu-wu.

³³ Ti kucang-yi, ame ti risu-m nungye-m awu be. Rimam tom me ba ti m nde na ande batisma, ama awu ri te m baa, unde ti afu a nung Kusung Rimam si ba som tsa risu-wu, awu ti si unde wu ti u nde na ande batisima ti Kusung-m. Ama awu ri baa, ‘Unde ti afu nung Kusung-m si ba som tsa risu-wu, si unde wu ti u nde na ande batisma ti Kusung-m.’

³⁴ Ame nung pu m iken yine ti ayib-m. Ame ku ri te ni kubenti baa, unde wune si Umbae Rimam.”

Yesu Kunn Ande ti Tawe ti Putsa-wu

³⁵ Ucwefam-yi Yohana tsi te ande ifaen ti awu ku kwen na ba iken atang.

³⁶ Ti awu nung Yesu kyang ikyin ku ru awu ri baa, “Ni sae umbae iwen na Rimam ta akwen ne.”

³⁷ Ti ande ifaen abane fxen ira yine aba nwunn u ru ka putsa Yesu.

³⁸ Yesu kafe uwe u sae ti aba putsa wu, ama rang baa, “Imi ti ani ku sha?” Aba rang wu baa, “Rabbi, afu ku nae-fu aka?” (Imbyi “Rabbi” baa, unde ti ku kwen na ande.)

³⁹ Awu ri te ba baa, “Ni ru ba nung.” I si aser inje ti ureb ti aba ku ri ira yine. Aba ru ba nung uwog ti awu ku nae atang u som te wu atang pu usir te.

⁴⁰ Unde kinjo uwae ande ifaen aba ti fxen ira ti Yohana ri risu Yesu titawe u ru ba putsa-wu, rinyi-wu si Andarawu. Awu si inja Siman Bitrus.

⁴¹ Ti awu fxen ira Yohana ne, awu nwunn ti ritsen u ru ka tu inja-wu Siman u ri te wu baa, “Ati tu pu ti Mesiya wu.” (Imbyi “Mesiya” si Awu ti Rimam Tsab Tsi).

⁴² Ama awu pu wu ru ba tu Yesu. Yesu sae Siman sae sae u ri baa, “Rinyi-fu si Siman, umbae Yohana. Tine a u kunn fu baa, Kefas.” Kefas si si Bitrus ti imbyi-yi si kutxú.

Yesu Kunn Filip ti Nataniyel

⁴³ Ucwefam-yi Yesu sa uwae tsi baa, awu na u nwunn ru yi uten ti Galili. Ti awu ku ruru, awu tu unde iki ti rinyi-wu si Filip u ri te wu baa, “Putsa m!”

⁴⁴ Filip wune si unde ti uten ti Betisaida, uten na Andarawu ti inja-wu Bitrus.

⁴⁵ Filip ama ru ka tu Nataniyel u ri te wu baa, “Ati tu pu ti unde ti Musa ti ande ti ku ya iskin ira Rimam bae ira risu-wu ti kute. Awu si Yesu unde ti Nazareti. Ite-wu si Yusufu.”

⁴⁶ Nataniyel rang wu baa, “Kikin ti tinyang u ruye uwae uten ti Nazareti njaa?” Filip ri te wu baa, “Ru ba nung.”

⁴⁷ Ti Yesu nung Nataniyel ru ku ba yi uwog-wu, awu ri ira risu-wu baa, “Ni sae umbae Isirela ti kubenti. Ira ti kong ta-yi uwog-wu be.”

⁴⁸ Nataniyel rang wu baa, “Afu kyang rimang u nungye m?” Yesu ri te wu baa, “Ame nung fu kiye ti afu som umbyi kututung ti ti Filip kunn-wu afu ira khika be.”

⁴⁹ Nataniyel ri te wu baa, “Unde ti uwe, afu ti si Umbae Rimam. Afu ti si Ukwe na Isirela!”

⁵⁰ Yesu rang wu baa, “Afu ru uwae kinjo uwog-m ikyaen ti ame ri baa, ame na nung fu imbyi kututung a? Afu u nung iken ti ku fur ayib yang-yi ti skeb ayine.”

⁵¹ Yesu ri te wu ama baa, “Ame ku ri te fu ira ti kubenti. Afu u nung apupwen u mbubta, afu u nung atom Rimam ku tsutso ku sisi risu Umbae Unde.”