Yakubu 3 - Kutsingken Ira Rimam ti Saen Kyag

Ujae Unde ku Nde Iken Ko Timambe

¹ Ameinja-m, ayi nyang-yi ti ande kuko uwae-ni ā si ande ti ku kwen iken be. Ikyaen ti, ani nung pu ni baa, rikwen ti byag siskeb ta risu ande ti ku kwen iken.

² Meme-ti si ande ti ku kyen kufxen. Asiti unde a ku kyen-wu kufxen yi ira ti ri-wu be, unde wune si unde ti kubenti ti ku jwen tu ira unju, ku ye su ijwe-wu.

³ Ati ku sa kiser sang kakum unju ikyaen ti wu na nae risu riben te ti, ama fengo wune, ati ku tae wu putsa uwog ti ati ku sha.

⁴ Ni nung kuyae tiyang, ti ufunn ti ribom ku kae yi ku vyiii ku kyang risu uyinn. Amaa, afxaen kuyae si iken ti yib fyin ahan, ti si iken ti unde ti ku ter kuyae ku ndab kukwae kuyae te wu.

⁵ Ti mbwe-yi, ujaen si iken ti kpang uwae iken ti ta ijwe unde, amaa awu ku pam ipam risu wande tiyang ti awu ku nde. Ayi pangma ti ukwēr urwa ku twen mbub kutur khika si riben burrr.

⁶ Ujae unju unde si urwa ara, ti munn te ira titibi. Awu si kinjo uwae iken ti ta ijwe unde, ama ku ye ijwe meme ndembeb. Ujaen ku yaen urwa si unyang unde, sa ti itimbae-wu ru ka iticwu-wu. Ayi si ititwenji ti ru kusog urwa ba.

⁷ Ana itso ibye ti rimang, ti inung, ti meme iken ti ku ten ti rishwu, ti iken ti uwae ambyi, ande u ndetu ti a ku shi yi,

⁸ amaa, unde iki u jwin tu-wu ujaen unju be. Awu si iken ti beb timambe, ti munn te rikàen titibi ti ku wen ande.

⁹ Ti ujae unju wune, ati ku teb rinyi Rimam ti si Itsekuru-ti, u si Itse-ti. Si sí unju wu ti ati ku faen ande kufaen atang, ande ti Rimam kyae ru ijwe-wu.

¹⁰ Ati ku wae ira na ande ti ujae unju-ti, ama si sí awu ti ati ku faen kufaen atang. Ayi nyang-yi ti ti nde itso iken yine be, ameinja!

¹¹ Isatsub iki ta atang ti ku ten ambyi tinyang ti ambyi rinwaen, ruye ti uwog kinjo a.

¹² Ameinja, kututung ku waen arisab a. Anam ama ku waen kututung a. Ambyi ti fifab u ba si-wu ambyi ti tinyang be.

Ben-ayib ti Kubenti

¹³ Aye ti ben ayib, u nung tu ira kutampwa-ni? Awu ā tatso-yi uwae usom ti som ti kubenti, u nde wande-wu ti ben-ayib ti risu ti nae riben.

¹⁴ Amaa, asiti ani a munn te kitsinn titibi uwae utob-ni, u ku nung nyang risu-ni amam, ni kyaefa-ni risu-ni uwae ijwe ti ndub baa, ani na si ande ti kubenti be.

¹⁵ Itso ben-ayib yine sī-yi apupwen ba be, ayi si ana utense, Kusung Rimam ta-yi atang be. Ayi si ana Shetann.

¹⁶ Ikyaen ti, uwog ti kitsinn ti ande ti ti kag a ta atang, uwog wune u munn te kukyikab, ama ikentitibi ti tsotso u munnae.

¹⁷ Amaa, ben-ayib ti sī apupwen ba si ti saen kyag. Ayi ku shir kujimshwur ba, u ku nda unde nde wande-wu sku sku, u ku naa kutong ku fxen ira ande nyanyang. Ande ti site yi si ande ti ku nung risi ande, u ku nde na ande iken ti tinyang. Aba si-ba ande ti ku tsab ande tsab be, ko ande ti ku ri unju ifaen be.

¹⁸ Ande ti ku sa kujimshwur ba kutampwa ande, aba ku tso kujimshwur, ama ku bunn usom ti som ti kubenti.