Yakubu 2 - Kutsingken Ira Rimam ti Saen Kyag

Ni Kag-ni Atso Kag be

¹ Ameinja, ti ani si ande ti ru uwae kinjo uwog Itsekuru-ti Yesu Kristi, awu Itsekuru ti site riyinn, ni kag-ni ande kag be.

² Asiti unde iki ti fwa kunyang zinariya, u sī atupwa ti rinyi a sang ba úfunn-ni, ama unde ti rikaen ti sī kutupwa ti fwa tag a sang ba,

³ asiti ani a saeru unde ti rikaen, u ri te unde ti sī atupwa ti rinyi baa, “Som uwog ti tinyang wune,” u ri te unde ti rikaen baa, “Afu, ru ka tsi uwe akwen” ko “Som riben ukaen isim iken ti som-m ike,”

⁴ ayine tatso-yi itikata kutampwa-ni, u nda ni kafe ande ti ku pwen rikwen ti ira ti kab titibi be a.

⁵ Ameinja-m ti utob-m, ni fxen! Ayi si-yi Rimam ti tsabsa ande ti rikaen uwae utense ti aba na si ande ti rifunn yi fengo uwae kinjo-ba be a. Aba u ci-ba rifunn kujwokwe ti wu yer unju te ande ti site ure te wu be a.

⁶ Amaa, ani saeru ande ti rikaen. Ayi si-yi ande ti rifunn ti ku twén ni acwutong ayib, ku tum ni ru yi kusog rikwen be a.

⁷ Si-yi aba ti ku txun mbeb rinyi ti tinyang ti Rimam sa fwa ni be a.

⁸ Asiti afu a ye su Icwe Kujwokwe Rimam ti a bae uwae Kutsingken Rimam baa, “Ye ure te unde ice-fu pangma ti afu ku ye ure te risu-fu,” afu ku nde iken ti pang atang.

⁹ Amaa, asiti afu a ku tso itikata, afu ku nde ikentitibi, rikwen ye pu yi afu, ikyaen ti, afu nyatsa icwe.

¹⁰ Ko unde a ye su tag icwe Rimam meme, ama, jwunnsi kinjo, awu nyatsa pu wu patag Icwe Rimam ti tsitsi.

¹¹ Ikyaen ti, awu Rimam ti ri baa, “Nae-fu amae be,” ayi si sí awu ti ri baa, “Wen-fu unde be.” Ikyaen yine, asiti afu a nae-fu amae be, ama u wen unde, afu nyatsa pu fu Icwe Rimam.

¹² Ikyaen yine, ni ri ira-ni, ti ni nde wande-ni, pangma ani na si ande ti a u pwen ba rikwen ti icwe ti a ku saen ande ta.

¹³ Asiti unde a ku kab-wu risi unde be, Rimam u sae-wu awu te ayibrisi be ama. Ayib risi u ci rika risu rikwen ti pwen.

Uwae Kinjo ti Kubenti ku Waen Awaen

¹⁴ Ameinja-m, ayi u ndeya imi, asiti unde a ri baa, awu na site uwae kinjo, amaa awu ku nde-wu wande iki ti ku ndeya ande be, uwae kinjo-wu ayi u nwangru wu njwaa?

¹⁵ Asiti inja-ni ko mbiya-ni iki a ku nde rikaen, u shanum te atupwa ti wuci ti awu u ci,

¹⁶ ama unde iki uwae-ni a ri te wu baa, “Ka-fu nyinyang, Rimam ā ndeya fu ti fu tu iken ti afu ku sha,” ama sha na-wu unde wu iken ti awu ku sha be, ira yine u ndeya unde wu njwaa?

¹⁷ Asiti uwae kinjo a ku tso-wu ijwe-wu yi wande ti ti nde be, ayi cwucwu.

¹⁸ Iki be unde iki u shaen ishaen baa, “Afu site uwae kinjo, ame ama site kujwo wande.” Amaa, ame u ri te wu baa, “Tatso m uwae kinjo-fu ti site-yi kujwo wande be, ame ama u tatso fu uwae kinjo-m uwae kujwo wande ti ame ku nde.”

¹⁹ Ani ru uwae kinjo baa, Rimam na si kinjo. Ayi nyang timambe! Asung titibi ti risu-yi ru kubenti uwae ira yine ama, ama ku fwer caen caen caen ikyaen na Rimam.

²⁰ Kuskwab-fu! Afu nung-fu ti uwae kinjo ti renfa-yi te kujwo wande be, na si iken ti ukaen be a.

²¹ Kiye ti itsekam-ti Ibrahim sa uyin-wu Ishaku na Rimam risu kuta, ayi si-yi ikyaen kujwo wande ti awu tu risu tinyang uwe Rimam be a.

²² Nung wur wur baa, uwae kinjo-wu ti ajwo wande-wu na ku nde wande te atso. Iken ti awu nde ti ajwo-wu kumunn uwae kinjo-wu.

²³ Iken yine kumunn ira ti a bae uwae Kutsingken Rimam baa, “Ibrahim ru uwae kinjo uwog Rimam, ama ikyaen uwae kinjo-wu Rimam sa wu tsi baa, awu na si unde ti tinyang.” Ande ku ri ama baa, Ibrahim na si urwan Rimam.

²⁴ Ikyaen na yine, ani nung ama baa, unde na u nwangru ikyaen kujwo wande, si-yi nyang uwae kinjo amam be.

²⁵ Ti mbwe-yi ama, Rahaba, ti si iyaen, tu itinyang uwe Rimam ikyaen kujwo wande-wu kiye ti awu paembe ande ti a tom ka baen uten, u tatso ba fengo iki ti a ruye atang.

²⁶ Pangma ti rimenn ijwe unde a site-wu unyang be, awu si rukom, ayi si ahan ama, uwae kinjo a site-wu kujwo wande be, awu cwucwu.