Wande Atom 9 - Kutsingken Ira Rimam ti Saen Kyag

Itinwangru na Sawulu

¹ Sawulu tsi kukunn ti ti ku nda ande na Yesu kyen ricwu baa, awu na u wen ba. Awu ru ka uwog kukwen Rimam tiyang

² u ka jwam wu baa, awu na nda wu kuko yi fengo na atsingken ti awu u nda andufu asog Rimam na Mbayawuda ti ta uwae uka na Damasiku, ikyaen ti wu na ka u ye ande ti putsa rifab Yesu, arom ti anda, u pu ba ba Urushelima.

³ Ti awu ta fengo ku ba Damasiku, fer ti uten wu, iken iki ti pangma imam jaen wur si apupwen ba uwog ti awu ta atang.

⁴ Awu jwunnsi riben u fxen unde ku kunn wu ira baa, “Sawulu! Sawulu! Imi ti nde ne afu ku nde m rikaen?”

⁵ Sawulu ri baa, “Itsekuru, afu aye ti ku kunn me ira?” Awu fxen afxenjwin wu cwucwo ri baa, “Ame si Yesu ti afu ku nda m rikaen.

⁶ Nwunn ti tsi ritsen. Sang uwae uka ne. Afu a ka pu fu atang, a u ri te pu ba afu iken ti fu u nde.”

⁷ Ande ba ti putsa Sawulu kya tsi. A tsi skirr, a ri fob-ba ira iki be. Aba fxen afxenjwin yi, amaa a nung-ba unde iki be.

⁸ Sawulu fa sunwunn u baa, awu na nunung, ayib-wu bur kyi. Awu ku sae tu-wu uwog cwucwo be. A tae wu tae ahan ka sang uka ti Damasiku.

⁹ Fob usir ita, awu sae tu-wu uwog be, u ci-wu be, u ngwa-wu be.

¹⁰ Kinjo uwae ande na Yesu ta uwae Damasiku atang, rinyi-wu si Ananiya. Kiye wu, Rimam nda wu sunn iken iki pangma kurwa. Uwae-yi, awu nung Yesu kunn wu ira baa, “Ananiya!” Ananiya cwe baa, “Ame ta ri, Itsekuru-m.”

¹¹ Yesu ri baa, “Nwunn, si fengo ti a ku kunn wu baa, Fengo ti Ndabta. Ru ka kununn Yawuda. Afu a ka pu fu, rang rifab unde iki ti ru uten Tarsus ba atang. Rinyi-wu baa, Sawulu. Awu ku jwam Rimam.

¹² Awu ama sunn kurwa baa, awu na nung unde iki ti rinyi-wu baa, Ananiya na sang ba u ba pu ajwo cwu tsa wu risu, ayib-wu na mbubta.”

¹³ Ananiya ri baa, “Itsekuru, ande yang-ba akwen ri te pu ba ame ira risu unde wune. Meme iken ti awu nde te ande-fu uwae Urushelima nyang-yi be.

¹⁴ Tine awu tu pu wu kuko uwog andufu Rimam tiyang ti wu na ye ande-fu uwae Damasiku ike.”

¹⁵ Yesu ri te wu baa, “Ru! Ame tsab ra pu m awu ti wu na nde na m wande. Awu u sa rinyi-m ri te ande ti nung-ba ira-m be, te akwe-ba te ande na Isirela.

¹⁶ Ame ti risu-m, ame u tatso wu meme rikaen ti awu u ngwa ikyaen na me.”

¹⁷ Ikyaen yine, Ananiya ru ka tu Sawulu kununn atang u ka pu ajwo cwu tsa wu risu. Awu ri baa, “Inja-m Sawulu, Itsekuru-m Yesu ti tso risu-wu uwog-fu fengo kiye ti afu ku ba né awu ti tom m ba uwog-fu. Awu tom m ba ikyaen ti fu na tu itinung uwog, cwucwo ti fu na tu Kusung ti Saen Kyag.”

¹⁸ Ti ritsen, iken iki pangma afob iwag bong ru ayib-wu. Ayib-wu mbubta, awu tu uwog ti nung cwucwo. Awu fa sunwunn, a nde na wu batisma.

¹⁹ Isim yine, awu ci wuci, ama rimenn ijwe-wu kafe ba. Uwae uka na Damasiku, Sawulu som te ande na Yesu fob usir kpang.

Sawulu Ri Ira Rimam te Ande ti Damasiku

²⁰ Isim ayine, ti kujwo, awu gbug nwunn ru yi asog Rimam na Mbayawuda, u ku tsag ira Yesu te ande. Awu ku ri baa, “Yesu si Umbae Rimam ara.”

²¹ Meme ande ti fxen Bulus, ayib fur ba. Aba ku rang baa, “Awune si-wu unde wu ti ta uwae Urushelima, ku wen ande ti putsa Yesu be a? Iken ti sa wu ba ike, si-yi ikyaen ti awu u ba ye ande ti ta ike u yir ba u pu ba ru ka na akwen Rimam tiyang be a.”

²² Amaa, Sawulu ri ira Rimam ti skeb pu wu ti kucang. Kiye ti Mbayawuda ti ta Damasiku nung Sawulu ku tatso ba sisaen baa, Yesu na si Unde ti Rimam Tsab Tsi, a ri tu-ba ira iki be.

²³ Isim ti usir yang-yi wur ru, Mbayawuda iki byir atso ku kab fengo ti a wen Sawulu.

²⁴ Usirtaen ti utitang a ku nungkyi kiye na ukoh ti pakob uka uwog ti ande ku sang ku ruye uka atang, ikyaen ti awu a ka ru ku ye, a na u ye wu u wen wu. Amaa, Sawulu fxen iken ti ande bane ku pwen ti a na u nde.

²⁵ Ikyaen yine utitang iki ande ti putsa-wu te wu tso ibaen kupwe ukoh, u ye wu som si uwae kicika u ye wu si ba riben. Awu tam ru.

Sawulu Ru Ba Urushelima

²⁶ Kiye ti awu kafe ba Urushelima, awu kwab ti wu sang fa ande na Yesu ti ta atang. Amaa a kyen ikyenricwu wu, u ru-ba kubenti baa, awu na si unde na Yesu ama be.

²⁷ Amaa, Barnaba ka ru ba u pu wu ru uwog atom u tsag te ba ira Sawulu né awu nung Yesu fengo, ama Yesu na ri ira te wu. Cwucwo, awu ri te ba fengo ti Sawulu ri ira yi rinyi Yesu ti ribom-wu uwae uka na Damasiku.

²⁸ Ikyaen yine, a kyangte wu, awu ku kyang meme uwae Urushelima. Awu tsikunn ti ku ri te ande ira risu Yesu ti ribom-wu.

²⁹ Awu ku ri ira te Mbayawuda ti ku fxen unju Helene u ku shaen ishaen te ba risu Itsekuru-ti Yesu. Amaa aba ku sha ti a wen wu.

³⁰ Ti ande na Yesu ti tsitsi nungye baa, Mbayawuda na ku pwen ti a na wen Sawulu, aba ye pu wu si yi Kaisariya u ka tom pu wu ru fe uka ti Tarsus.

³¹ Tiri, meme ande na Yesu ti ta uten Yawudiya ti Galili ti Samariya tsi ti ribom-ba. Aba tu kujimshwur. Yi uwae ti tinyang na Kusung Rimam ande yang ahan sang fa ba, a som usom-ba ti ikyenricwu na Rimam.

Bitrus Ru ka Lida ti Yopa

³² Bitrus ku kyang ku tsutso, ku sisi, ku baen ande na Yesu. Kiye iki awu ru ti wu ka nung ande na Yesu ti ta uten ti Lida.

³³ Ti awu ka atang, unde iki ta atang ti a ku kunn wu baa, Eneyas. Awu cwu afxen ti ajwo. Uwae asang itsongta awu nde tu-wu ti wu u nwunn iken ti nae-wu be.

³⁴ Bitrus ri te wu baa, “Eneyas, Yesu Kristi nwangru pu wu afu. Sunwunn ti fur iken ti nae-fu!” Ti ritsen, Eneyas fa sunwunn.

³⁵ Meme ande ti ta Lida ti Sarona nung wu, a ba putsa ira Yesu.

³⁶ Uwae uten ti Yopa, unda iki ti putsa Yesu ta atang, a ku kunn wu baa Dorkas. (Rinyi-wu unju Helene si Dorkas. Imbyi-yi baa, utxong.) Awu si unda ti ku nde iken ti tinyang. Awu ndeya ande ti rikaen ti iken ti tinyang yang-yi.

³⁷ Kiye iki, awu nae kicaeb u cwu-wu. A jwo tag rimenn-wu u sa wu nae kusog ti apupwen.

³⁸ Ti ande na Yesu ti ta uten Yopa atang fxen baa, Bitrus na ta Lida, uten ti fifer ti atang, a tom ande ifaen ru ka uwog-wu ti ira baa, “Ati mbyae ajwo, ter ba uwog-ti ike ti ritsen.”

³⁹ Ikyaen yine, Bitrus te ba ru te atso. Ti aba ru ka ku sang, a ye pu wu tso kusog ti apupwen. Meme awa icwu ba pakob-wu, ku jwub ku tatso wu atupwa ti Dorkas kob na ba kiye ti awu site unyang.

⁴⁰ Bitrus pu ba ruye kusog atang u ku riben u jwam Rimam. Tiri, awu kafe uwe tag rukom Dorkas u ri baa, “Dorkas, fa sunwunn!” Dorkas mbubta ayib. Ti awu nung Bitrus, awu fa sunwunn u som ritsen.

⁴¹ Bitrus ba sa kujwo na wu u shir ra wu nwunn ritsen. Tiri awu kunn byir ande na Yesu ti tsitsi ti awa icwu u sa Dorkas kafe na aba ti atang ti unyang-wu.

⁴² Ira yine shag kyi fe uwae uten ti Yopa meme, ande yang-yi ru kubenti uwog Itsekuru-ti Yesu.

⁴³ Bitrus som Yopa fob usir yang-yi uwae kununn unde iki ti rinyi-wu baa Siman. Awu si unde ti ku fwa apwa.