Wande Atom 7 - Kutsingken Ira Rimam ti Saen Kyag

Stefana Ri Ira te Andufu Mbayawuda

¹ Kukwen Rimam tiyang rang Stefana baa, “Ira ti a ku ri risu-fu yine si kubenti a?”

² Stefana ri baa, “Ameinja-m! Abitse-m! Ni naa atong ti ni fxen ira ti ame u ri te ni! Ti kucang kiye ti itse-ti Ibrahim ta uwae uten ti Mesopotamiya, kiye ti awu ba-wu uten Haran khika be, Rimam ba uwog-wu. Rimam ti kuko-wu skeb tag patag ru ba uwog-wu

³ u ri te wu baa, ‘Nwunn uten-fu ti ande ti kununn-fu! Ru ka som uwae uten ti ame u tatso fu.’

⁴ Ikyaen na yine, Ibrahim ya uten Kaldeya ta u ru ka som uten ti Haran. Isim-yi ti itse-wu cwu pu wu, Rimam nda Ibrahim nwunn ba som uwog ti ani ta atang yaka ne.

⁵ “Ama kiye wu, Rimam nda-wu Ibrahim riben ti u si ana-wu khika be, ko tikiyib. Amaa, Rimam yer unju te wu baa, usir na ku ba ti uten wune na u si ana-wu te ana anyisu-wu. Kiye wu ti Rimam yer unju wune te wu, Ibrahim tu-wu umbae khika be.

⁶ Rimam ri te wu baa, Anyisu-fu u som uten ti fengo ti rwen. Uten wu atang, aba u kafe apyi. Aba u ngwa rikaen fob asang ukob inje.

⁷ Amaa, isim ayine, ande ba ti uten atang ti a ye ande-m kafe apyi, ame u pwen ba rikwen. ‘Isim ayine, ande-m u nwunn ya uten wu ta. Aba u ru ba fen m uten ike.’

⁸ Isim ayine Rimam yer unju te Ibrahim u nda wu tsen kutxin na anyisu-wu. Ikyaen yine, kiye ti Ibrahim mbae Ishaku, awu tsen wu kuxin ti usir-wu si itsongta. Ishaku ama nde ahan te umbae-wu Yakubu. Yakubu tsen na abitse-ti rijwe asu ifaen ama.”

⁹ Stefana ru yi uwe baa, “Ni nung iken ti abitse-ti nde te inja-ba Yusufu. A tsinn wu kitsinn, u sa wu jabci ru yi uten ti Ejib. Awu kafe upyi atang. Amaa Rimam te wu som te atso

¹⁰ u nwangru wu uwae rikaen-wu ayine. Rimam nda wu tu risu ti tinyang uwe Firona, Ukwe ti Ejib. Ti ukwe nungye ben-ayib-wu, awu nda wu kafe unde ti uwe kununn-wu ti unde ti uwe na uten atang.

¹¹ “Isim ayine, rimenn pu uten Ejib atang ti uten Kanana meme u nda ande ngwa rikaen. Abitse-ti ama tu-ba wuci be.

¹² Ti Yakubu fxen baa, wuci na ta uten ti Ejib, awu tom anyisu-wu ru ka atang.

¹³ Ti aba ru ti apu-ifaen, Inja-ba Yusufu tso risu-wu uwog-ba. Uwog wune, Ukwe Ejib nungye ira risu kununn Yusufu.

¹⁴ Isim ayine tiri, Yusufu tom atom ru ka tu itse-wu Yakubu baa, awu na te kununn-wu meme na u nwunn ba tu wu uten ti Ejib. Meme-ba fob ande mae ita ka mbe rijwe asu itsong.

¹⁵ Yakubu nwunn u si yi uwae uten ti Ejib, Awu cwu atang, fa ti abitse-ti.

¹⁶ A pu rukom-ba nji uwae uka ti Shekem, uwog ti itse-ba Ibrahim jab ti ayaen aser azurfa uwog ande ti Hamor ti kucang akwen.

¹⁷ “Ti kiye yi kyang ku yaen ku pu wu ti Rimam u nde iken ti awu yer unju te Ibrahim kucang risu-yi, abitse-ti ti som uten ti Ejib jwunn timambe.

¹⁸ Isim ayine, unde iki ti nung-wu Yusufu be ba nae ukwe yi Ejib.

¹⁹ Awu kyaefa ande-ti u nda ba pu imbae ibyan-ba ru ka tika kutur, a cwu.

²⁰ Uwae kiye wune, a mbae Musa. Awu si umbae ti tinyang ti Rimam cwe ira-wu timambe. Musa nde ishaen ita uwae kununn itse-wu

²¹ itawe a sa wu ka tam kutur. Ama umbae Ukwe Ejib ti unda ru ka kya wu u shi ben wu pangma umbae-wu.

²² A kwen na wu ben-ayib ande ti Ejib, ama awu ser ben u kafe unde tiyang u ku ri tu ira u ku nde wande ti tinyang.

²³ “Isim ti Musa nde fob asang mae ifaen, awu myae baa, awu na u ru ka nung ande-wu ande ti Isirela.

²⁴ Ti awu ru ba fob, urae Ejib ku nde uriki uwae-ba rikaen. Musa ndeya inja-wu, ama kum wen urae Ejib wu ikyaen ti wu na pae ripab iken ti awu nde te urae Isirela wu.

²⁵ Musa ku tang baa, ande-wu na u nungye baa, Rimam na sa wu na ba ti wu na u nwangru ba uwae rikaen, amaa a nungye-ba be.

²⁶ “Ucwefam-yi, awu nung ande ti Isirela ifaen iki ku byinn kutxu. Awu ku sha ti wu na kata ba u ri baa, ‘Ni fxen! Ani si-ni ameinja atso be a? Ani nde rimang ku ten atso ifu?’

²⁷ Amaa unde wu ti ira si unju-wu tur Musa ru iyen u ri te wu baa, ‘Aye ti nda fu kuko ti fu na pwen ti rikwen?

²⁸ Afu u wen m pangma ti afu wen urae Ejib wu ire a?’

²⁹ Ti Musa fxen ira wune, awu ter nwunn uten ti Ejib u ru ka som uten ti Midiyan. Atang awu mbae anyisu ti arom ifaen.

³⁰ “Isim asang mae ifaen, Rimam tom atom-wu ti apupwen ru ba tu Musa uwae kutur ti fifer ti Rikwen Sinai. Awu tso risu-wu uwog Musa ruye uwae urwa ti ku ten ijwe afub tirisub.

³¹ Urwa wune fur wu ayib timambe. Awu ko ka ti wu ka u sae nyang afub yi, ama awu fxen afxenjwin na Itsekuru-ti Rimam ruye atang baa,

³² ‘Ame ti si Rimam na abitse-fu. Ame si Rimam na Ibrahim ti Ishaku ti Yakubu.’ Ti Musa fxen ira yine, ikyenricwu ye wu, ijwe-wu ku fufwer, awu kpag-wu utob ti wu sae urwa wu cwucwo be.

³³ Rimam ri te wu baa, ‘Tunn apwafxen-fu! Ikyaen ti, uwog ti afu tsi atang ne si uwog ti sisaen!

³⁴ Ame Rimam nung pu m rikaen ti ande-m ku ngwa uwae uten Ejib. Ame fxen pu m ira ti jwub-ba. Ame ba pu m ti m ba nwangru ba. Ru ba ti m tom fu ru yi uten ti Ejib.’

³⁵ “Musa wune, ti kucang-yi a shaen wu u ri baa, ‘Aye ti nda fu kuko ti afu u pwen ti rikwen?’ Amaa Rimam nda wu kafe unde ti uwe-ba, ti unde ti u sa ru ba uwae rikaen. Rimam nde ira ayine rutsa uwog atom-wu ti apupwen ti tso risu-wu uwog Musa uwae afub tirisub ti ku ten uwae kutur.

³⁶ Musa wune pu ba ruye uwae uten ti Ejib, ku nde wande ti ku fur ayib, ti iken ti ku tso kuko Rimam uwae uten Ejib ti uwog uyinn tibyaen, ti uwae kutur, uwog ti a kyang atang fob asang mae ifaen.

³⁷ Si si awu Musa ti ri te ande ti Isirela baa, ‘Usir ku ba ti Rimam u tom unde iki ba na ni pangma ti awu tom me ba ama. Unde wu u ya iskin ira Rimam. A u mbae wu uwae itso-ni.’

³⁸ Si sí awu Musa ti som te ande ti Isirela kiye ti a funn uwae kutur. Awu ti mbe ira Rimam ti tsi kukunn, ti ku nda ande unyang uwog atom Rimam risu Rikwen Sinai u nda abitse-ti ti a na sa ba na ati.

³⁹ “Amaa abitse-ti cwe-ba ira Musa be. Aba tur wu ru iyen, ku jwub ira baa, ayi na nyang skeb ti a na kafe ru-ba iken-ba ti Ejib.

⁴⁰ Aba ri te Aruna baa, ‘Kyae na ti apxin ti u pu ti ru. Musa wu ti pu ti ruye uwae uten Ejib, ati nung-ti iken yi ti nde wu be.’

⁴¹ Kiye wune, a kyae apxin iki ti ru indag. A fen iken yine ti a kyae ti ajwo-ba u yerwen ibye na wu u nde ukwab na awu.

⁴² Ikyaen ayine, Rimam kafe isim ta ba u ya ba ta ti a na fen aser ti apupwen. I si pangma ti a bae uwae kutsingken na ande ti ku ya iskin ira Rimam baa, ‘Ani ande ti Isirela! Kiye ti ani ta kutur asang mae ifaen, ani yer wen ibye na m a?

⁴³ Iyee, i si kufug apxin-ni Moloki ti kusung kititaen apxin-ni Refan ti ani pu kú, u ku fen yi, i si-yi be. Ikyaen apxin yine ti ani kyae ku fen yi, ame u pu ni ru ka tika isim uten ti Babila.’

⁴⁴ “Abitse-ti kyang ikyin uwae kutur ti kufug úfunn Rimam ti tatso baa, Rimam na ta te ba. A kyae wu pangma ti Rimam ri te Musa baa, aba na kyae wu.

⁴⁵ Isim yine, abitse-ti su kufug Rimam wune kyang te ba kiye ti aba ti Jeshuwa ci riben ande ti Rimam rwae ba ruye uwe abitse-ti. Kufug Rimam wu tsi atang ru ka fob ti kiye Ukwe Dawuda.

⁴⁶ Ukwe Dawuda tu uwe ti tinyang uwog Rimam u jwam Rimam baa, asiti wu a cwe ira, awu na u mbye kusog na Rimam na Itse-wu Yakubu.

⁴⁷ Amaa Solomon umbae-wu ti mbye kusog wu na Rimam.

⁴⁸ “Rimam ti skeb titag ku nae-wu kusog ti ande ku mbye be. Ande ti ku ya iskin ira Rimam ri baa,

⁴⁹ ‘Apupwen si iken ti som-m. Riben ama si uwog ti ame ku pu afxen-m tsi tsa atang. Itso kusog titini ti ani u mbye na m? Uwog wu ta aka ti ame u pu nyang atang?

⁵⁰ I si-yi ame ti kyae iken yine meme be a?’

⁵¹ “Ani ande ti bom risu. Ani si ande ti nung-ba ira Rimam be, u cwunn kyi atong-ni ti utob-ni meme. Ani ti abitse-ni pang atso. Ko kiye titini ani ku pyir kob Kusung ti Saen Kyag na Rimam, pangma ti aba nde ama.

⁵² Uwae ande ti ku ya iskin ira Rimam, abitse-ni ya uriki ta-ba ta be. A nde ba rikaen meme! A wen ande ti Rimam tom ba ba, ti ku ri te ba baa, Yesu Unde ti Saen Kyag na ku ba! Ama tine, ani sa wu jabci pu ni! Ani wen pu ni awu.

⁵³ Ani si ande ti mbe Icwe Rimam uwog atom Rimam ti apupwen amaa, ani putsa-ni ayi be.”

A Jwunn Wen Stefana te Atxom

⁵⁴ Ti aba fxen ira yine ti Stefana ri, aba tso rinae si-yi ti ti ri be. A kub kujwo anyi, uwae rinae-ba, aba tso rinae si-yi ti ti ri be utob-ba ndembeb.

⁵⁵ Ama Stefana munn ti Kusung ti Saen Kyag u sae ayib tso yi apupwen u nung riyinn Rimam, ti Yesu ti tsi kujwo rici Rimam. Awu ri baa,

⁵⁶ “Ni nung! Ame nung apwa apupwen mbub tita. Umbae Unde tsi kujwo rici na Rimam!”

⁵⁷ Ti ande fxen ira Stefana yine, a cwunn kyi atong-ba ku nyae ira. Meme-ba nwunn u ba teb shi wu ti kipaen kinjo.

⁵⁸ A shir wu ruye, ka jwunn wen wu ti atxom isim uka wu. A teya atupwa-ba ta uwog utaen unde iki ti a ku kunn wu baa, Sawulu.

⁵⁹ Kiye yi ti a ku jwunn Stefana, awu ku jwam baa, “Itsekuru-m Yesu, sa unyang-m ru tiri.”

⁶⁰ Awu ku riben u nyae ira ti ribom baa, “Itsekuru, ya ta na ba ikentitibi-ba ne.” Awu ri mam fe ayine u cwu-wu.