Wande Atom 6 - Kutsingken Ira Rimam ti Saen Kyag

A Tsab Ande Itsongfaen

¹ Isim yine, kiye ti ande ku putsa ira Yesu ko ku fufa, Mbayawuda ti ku fxen-ba unju Mbaibrane be ku jwub ira baa, Mbayawuda ti tsitsi na ku ci ba ci uwae wuci ti ti kan. Awa icwu-ba na ku tu-ba wuci be.

² Ikyaen yine, ande ti atom na Yesu kunn byir ande na Yesu meme uwog kinjo. A ri te ba baa, “I nyang-yi ti ati atom u ya ira Rimam ti ri ta, ti ti ba kan wuci be.

³ Ikyaen yine, ameinja, ni tsab ande itsongfaen ti kumumunn ti Kusung ti Saen Kyag, ande ti ku tang tu ira, ti a na ku kan wuci na ni.

⁴ Wande-ti ama u si itijwam uwog Rimam, ti ira Rimam ti ati ku kwen na ande.”

⁵ Ande ba meme cwe ira yine. A tsab Stefana, unde ti site kubenti u munn ti Kusung Rimam utob-wu. Ti tsitsi si Filip ti Purokoru ti Nikanor ti Timon ti Parmenas ti Nikolawu. Unde wune si urae unde ti Antiyok u ba putsa ira Rimam tishe u si-wu urae Mbayawuda be.

⁶ Ande na Yesu pu ande itsongfaen bane ba uwog ande ti atom na Yesu. A jwam Rimam u pu ajwo cwu tsa ba risu u wae ira ti tinyang na ba.

⁷ Ikyaen na yine, ira Rimam shag kyi ku fe uten meme. Ande yang-ba akwen ti ta uka ti Urushelima ru kubenti u sang fa ande na Yesu. Aba kora fa. Ariki yang akwen uwae akwen Rimam na Mbayawuda ru uwae kinjo uwog na Yesu ama.

A Ye Stefana

⁸ Ama uwog wune Stefana munn ti itinyang na Rimam te kuko Rimam u nde iken ti ku fur ayib ti iken ti ku tso kuko na Rimam uwog ande.

⁹ Amaa, Mbayawuda iki nwunn ku shaen ishaen te Stefana. Aba si ande ti ku ta kusog Rimam ti a ku kunn wu baa Kusog Rimam ana apyi ti a saen ba ta. Ariki ama si ande ti uten Kirene ti ande ti uten Alezandariya. Ariki ama si ande ti ru Kilikiya ti Asiya ba.

¹⁰ Amaa, a tsi tu-ba ti a u ri ira te wu be, ikyaen ti Kusung na Rimam nda Stefana ben ayib.

¹¹ Ikyaen na ayine, a yer unju te ande iki risu-wu baa, aba na ā ri baa, “Ati fxen Stefana ku ri ira titibi risu Musa ti Rimam.”

¹² Ira yine nda ande kyirunn, fa ti ande ndufu ti ande ti ku kwen na ande icwe Rimam. Aba nwunn ru ba ye Stefana u pu wu ka tsi uwe ande ti ku pwen rikwen.

¹³ Uwog rikwen atang, ariki nwunn u ri ira tikong baa, Stefana na tsi kunn ti ira titibi ti ri risu Kusog Rimam ti saen kyag ti Icwe Rimam.

¹⁴ A ri baa, “Ati fxen wu awu ku ri baa, Yesu unde ti Nazareti na u mbub Kusog Rimam wune. Cwucwo awu na u kafe icwe ti Musa nda ti, u mam tishe na ba.”

¹⁵ Ande ti fxen ira yine ti ta uwae kusog rikwen atang pu ayib cwu tsa Stefana piin. A nung kutxuwe-wu ru kutxuwe na atom Rimam ti apupwen.