Wande Atom 5 - Kutsingken Ira Rimam ti Saen Kyag

Ananiya ti Safiratu

¹ Amaa unde iki ta atang rinyi-wu baa, Ananiya, ti uwa-wu Safiratu. A sa risaen ufang-ba iki jaeb ci.

² Aba yer unju te atso u ka aser-yi iki titam. Ananiya pu ti tsitsi ru ba na ande ti atom na Yesu.

³ Bitrus ri te wu baa, “Ananiya, afu kyang rimang ya ta ti Shetann sang utob-fu u nda fu yer rifen te Kusung ti Saen Kyag na Rimam? Afu mbe aser risaen-fu ayi u ka aser-yi iki titam.

⁴ Risaen wu ti afu sa jabci si ana-fu be a. Mbaa afu nde yi ti utob kinjo re! Isim yi ti afu sa risaen wu jabci ama, aser yi si ana-fu re. Afu kyang rimang ba nde kyi-fu iken yine? Afu yer rifen ne te Rimam, si-yi unde be.”

⁵ Ti ti Ananiya fxen ira yine, awu jwunnsi mbyog u cwu. Ikyen ricwu ye unde titini ti fxen ira yi.

⁶ Anyisu itaen iki ru ba bur kyi wu ti kutupwa u ye wu ru ka nji.

⁷ A paji kpang, uwa-wu Safiratu ka ru ba. Awu nung-wu iken yi ti nde te ubaen-wu be.

⁸ Bitrus rang wu ira baa, “Ayine si funntag aser risaen wu ti ani sa jabci a.” Safiratu cwe baa, ayi na si funntag-yi.

⁹ Bitrus ri baa, “Afu ti ubaen-fu kyang rimang ku myae Kusung na Itsekuru-ti Rimam myae? Fxen! Ande ti nji ubaen-fu ta ufu kusog. Aba ku ba ti a ba ye fu ru ka nji pangma ti a nji ubaen-fu!”

¹⁰ Ti ritsen, awu jwunnsi u cwu. Anyisu itaen ti nji ubaen-wu sang ba. Ba fob, awu cwu pu wu. A ye wu ru ka nji fer ti kuskab ubaen-wu.

¹¹ Ande na Yesu ti ande meme ti fxen ira yine, ikyenricwu ye ba si-yi ti ti ri be.

A ku Nde Iken ti ku Fur Ayib

¹² Ande ti atom ku nde wande ti ku fur ayib ti iken ti ku tso kuko na Rimam uwog ande. Ande na Yesu meme ku byir atso uwog iki ti a ku kunn baa, Ukag Solomon.

¹³ Ande ti tsitsi ku kyen ikyenricwu ti a sang itifunn ande na Yesu. Ko ti yi si ahan ama, ande ku ri ira ti tinyang risu ande na Yesu.

¹⁴ Aba ko fufa. Ariki yang-ba akwen, arom ti anda ti ku ru kubenti uwog Yesu, a sang fa ba.

¹⁵ Ikyaen na yine, uwog iki, a ku pu ande ti kicaeb yang akwen ba nae iken ti nae-ba putsa iyen fengo ku ru, ikyaen ti Bitrus a ba ku yafe ku ru, kusung-wu u ba yafe ba ku ru, a u nwangru uwae kicaeb-ba.

¹⁶ Ande yang akwen ti ta uten ti pakob Urushelima pu ande ti kicaeb, ti ande ti rijwen titibi byinn ba, ba uwog na ande ti atom. A nwangru ba meme patag.

Bitrus Nwangru Uwae Pursuna

¹⁷ Uwog wune kukwen Rimam tiyang, ti ande ti ku som te wu ti ta kumbub Saduke, aba ku tsinn kitsinn risu atom Yesu.

¹⁸ A ru ka ye ande ti atom ru ba kwer kyi kusog pursuna.

¹⁹ Amaa uwae utitang wu Itsekuru Rimam tom atom-wu ti apupwen ru ba mbub ufu pursuna u pu ba ruye ise u ri te ba baa,

²⁰ “Ni ru ka tsi uwae kusog Rimam tiyang. Ni ri te ande ira Yesu wune ti nda ni unyang tishe wune.”

²¹ Ti atom na Yesu fxen ira yine, aba nwunn ti kiskinn fifae, ru ka tsi Kusog Rimam Tiyang, ku kwen na ande ira risu Yesu atang. Ti Kukwen tiyang, ti ande ti ta te wu ru ba, aba kunn byir ande ti rurob na Isirela meme ikyaen ti a na pwen rikwen yi. A tom ande ru yi kusog pursuna ti a na ka pu atom Yesu na ru ba.

²² Amaa ti dogari ru ka pursuna, a tu-ba ande ti atom Yesu atang be. A kafe ba uwog ande ti ku pwen rikwen u ri te ba baa,

²³ “Ati ka pu ti atang, ati nung ufu kusog kwer kyikyi, ande ti ujwin tsi atang. Ati mbub ufu kusog, amaa atom Yesu ta-ba atang be.”

²⁴ Unde ti uwe dogari, ti akwen Rimam tiyang, kiye ti a fxen ira yine, ayi fur ba ayib. A ku kab baa, “Ira yine u kyang rimang tine?”

²⁵ Unde iki ru ba ri te ba baa, “Ande ba ti ani ye kwer kyi pursuna, ame nung ba, a tsi ku kwen iken Kusog Rimam akwen!”

²⁶ Ikyaen na yine, unde ti uwe dogari pu ande-wu ru ka kusog Rimam u pu ande ti atom ru ba. A nde nam tur te ba ikyaen ti, ande ti uten atang cwe ira ande ti atom Yesu timambe. Dogari ku kyen ricwu baa, asiti aba a nde-ba aba nyinyang be, ande u jwunn wen ba ti atxom.

²⁷ A pu ande ti atom Yesu ru ba som uwe na ande ti ku pwen rikwen. Kukwen tiyang byib ba ira baa,

²⁸ “Nung! Ati fwa ni kusen ti kucang baa, ani na kwen na ni ande iken uwae rinyi Yesu cwucwo be. Amaa ani fxen-ni be, u sa ira Yesu ne ri kyi fe uten Urushelima meme. Cwucwo, ani ku sha ti ani u shir ira iticwu Yesu ba risu-ti!”

²⁹ Bitrus ti ande ti atom ti tsitsi ri baa, “Ayi nyang skeb ti ati fxen ira Rimam skeb ira na ande.

³⁰ Isim yi ti ani kwer Yesu risu kutuku ti cice, awu cwu, ama Rimam na abitse-ti kunn nwunn wu uwae kuskab.

³¹ Rimam sa wu tso yi kujwo rici-wu apupwen ti wu na si unde ti uwe, u si unde ti nwangru ande. Awu nde ayine ikyaen ti ande ti Isirela na ā tu riyae ti a na ya ikentitibi-ba ta, ti a na kafe ba uwog Rimam ti wu na ya ta na ba.

³² Ira na Yesu yine meme, ati nung pu ti ti ayib-ti. Kusung ti Saen Kyag na Rimam nung pu wu ama, ayi si Kusung wu ti Rimam nda ande ti ku nae risu riben ti ira-wu.”

³³ Ti ande ti ku pwen rikwen fxen ira Bitrus yine, a tso rinae timambe. A ku myae ti a wen Bitrus ti ande ti atom na Yesu ti tsitsi.

³⁴ Amaa, unde kinjo ta uwae ande ba ti ku pwen rikwen, rinyi-wu baa, Gamaliyel. Awu si unde ti kumbub Farisi, ti ande ku nda wu rurob yang-yi akwen. Awu sunwunn ritsen u ri te ba baa, a na pu ande ti atom Yesu na ruye tsi ise kpang.

³⁵ Isim yine, awu ri te ande ti byir kusog atang baa, “Ani ande ti Isirela! Ni tang ira nyinyang risu iken ti ani u nde te ande ti atom na Yesu bane.

³⁶ Asang ti wur ru ne, unde iki ti a ku kunn wu baa Teyudas nwunn ku ndub ijwe baa, ande na si kum awu amam, ama ande fob pangma ukob inje putsa wu. Isim yine, awu sa cwu. Ande ukob inje ne ter shag fa atso. Ira-wu ayine cwu be riben.

³⁷ Isim yine cwucwo, unde iki ti a ku kunn wu baa, Yawuda, unde ti Galili, nwunn ku ndub ijwe kiye ande ti pwen. Ande yang-ba akwen putsa wu. Awu ama sa si sa u cwu. Ande ti putsa wu ter shag fa atso.

³⁸ Ikyaen yine ama, ame ku ri te ni, ni ya fengo ande na Yesu bane ta! Ni nde-ni aba iken iki be. Asiti wande-ba yine si ana ande, ayi u cwu be riben.

³⁹ Amaa, asiti ayi a si ana Rimam, ani u nde num. Iki be ani u nung-ni be ani ku tsi ukub te Rimam.”

⁴⁰ Ande ti ku pwen rikwen cwe ira Gamaliyel yine. A tom ande ru ka pu atom Yesu ba, ba byinn ba kimbab. A ri te ba baa, a na ri-ba ira uwae rinyi Yesu cwucwo be. Isim yine aba ya ba ta.

⁴¹ Ande ti atom ba ruye kusog rikwen atang. A tsen utob, ikyaen ti, Rimam nung ba baa, a na pang pu ba ti a na ngwa rikaen ikyaen Yesu.

⁴² Ti usir usir, a ku kwen iken Kusog Rimam, ti anunn ande. A ku ri te ande ira ti tinyang risu Yesu baa, awu na si Unde wu ti Rimam Tsab Tsi.