Wande Atom 28 - Kutsingken Ira Rimam ti Saen Kyag

Uwae Uten ti Malta

¹ Isim ti ati kwab ba sang akaense meme, iken iki ama nde-yi unde iki uwae-ti be, ati ba nungye baa, uwog ti ati na ta atang a ku kunn wu baa Malta.

² Ande ti uten atang kyang te ti ti utob kinjo si-yi ti ti ri be. Upwen ku tswa, rijwen ku kwer ti, ikyaen yine a jwu urwa cwe u yae ti meme ti ti na ba wē urwa.

³ Bulus ru ka sha ituku urwa ku ba. Ti awu byir yi munn kujwo ti wu pu yi sang uwae urwa, ikentibi ruye uwae-yi ikyaen ayam urwa ti byag wu. Awu ba pyer Bulus ti kujwo.

⁴ Ande ba ti uten atang nung ikentibi wu kyin si kujwo Bulus, a ku ri ira te atso baa, “Unde wune si kang unde ti ku wen ande. Ko ti awu nwangru uwae uyinn amaa iticwu putsa wu tsa se.”

⁵ Amaa Bulus fwer ra ikentibi wu jwunnsi urwa. Kikin nde-yi awu be.

⁶ Ande ba som ku ji ku tang baa, kujwo-wu na u mbumbwe ko awu na u tsi-wu tsi be na u jwunnsi u cwu. Amaa, ricwunnkyi ti a som som u nung iken iki nde-yi awu be, aba kafe unju baa, awu na si apxin ti tatso risu-wu yi rimenn unde.

⁷ Ukwe ti uten atang, ti rinyi-wu si Popilo, site risaen-wu fifer ti atang. Awu kyangte ti ti utob kinjo. Ati som kununn-wu ka usir ita.

⁸ Kiye yi ti ati ta atang, itse ukwe wu nae kicaeb. Kicaeb yi si ijwe ti byag ti anying ti awu ku nja. Bulus sang ka kusog ti nae-wu u jwam Rimam u pu ajwo cwu tsa wu, u jim kicaeb-wu.

⁹ Isim ti iken yine nde, meme ande ti kicaeb ti ta uten atang ru ba uwog Bulus, ama, kicaeb-ba ya ba ta.

¹⁰ A pu iken yang-yi nyang uwae na ti. Isim ishaen ita, kiye ti ati sang kuyae u nwunn atang, a pu na ti iken ti u ndeya ti uwae ikyin-ti.

Ati Nwunn Malta Ba Roma

¹¹ Ati nde ishaen ita Malta atang itawe ti sang kuyae iki ti ru uten Alezandariya ba. Usen fam yae kuyae wune ti uten ti Melita atang. A ku kunn kuyae wu ti rinyi apxin-ba ifaen iki ti si anyisu ishe baa, Kasitor ti Poluki. Ati nwunn u kyang uwae uyinn

¹² ba sang uka na Sirakuse u som atang ka usir ita.

¹³ Ati nwunn atang u jwo ru ba sang uka ti Regiyum. Ucwefam-yi ufunn bag ti ti kae ru isim ku ba. Uwae usir ifaen ati ba sang uka na Puteyoli.

¹⁴ Ati ru ba tu ande na Yesu iki atang. Aba jwam ti baa, ati na som te ba atang fob kutsab kinjo. Ati kyang ahan ba fob uka na Roma.

¹⁵ Ti ti ati ka sang-ti Roma khika be, ameinja-ti ande na Yesu ti ta Roma fxen baa, ati na ku ba. Aba ru ba sang Ritug Apiya u kyangte ti atang. Ariki ama ba tu ti uwog ti a ku kunn baa, Afug Ita. Kiye ti Bulus nung ba, awu nde fxaefa na Rimam, ijwe-wu si fa.

Ati Ka Pu ti Uwae Uka na Roma

¹⁶ Kiye ti ati ru ba sang Roma, a cwe na Bulus ti wu na mbe kusog ti awu na u nae atang kum awu amam. Akyirten kinjo amam ti ku nungkyi wu atang.

¹⁷ Isim usir ita Bulus kunn byir ande ndufu Mbayawuda ti ta Roma atang. Kiye ti a funn tag awu ri te ba baa, “Ameinja-m! Ko ti ame raen-m ande-ti ira iki be, ama ame nyaetsa-m icwe na uten na abitse-ti be, ama a pu m sang pursuna uwae Urushelima u sa m fae si kujwo ande ti Roma.

¹⁸ Ande ti Roma byib m ira u ku sha ti a ya m ta ikyaen ti, a tu-ba ira iki titibi risu-m ti a nda m u wen be,

¹⁹ amaa, ande-ti Mbayawuda pyir-ba ira yi. Uwog wune ame shanum fengo ti ame u nwangru risu-m. Ikyaen na yine, ame jwam ba baa, a na pwen rikwen-m uwog Ukwe Tiyang ti ta Roma, ko ti ame site-m ira iki te ande-m Mbayawuda be.

²⁰ I si ikyaen yine nee ame ku sha ti m nung ayib-ni u ri ira te ni. Iken ti nde a kyab m uji kiser yine, i si ikyaen unde wu ti meme ande na Isirela sa uwae tsi uwog-wu.”

²¹ Ande ndufu Mbayawuda ri te wu baa, “Ati tu-ti kutsingken iki risu-fu ti ru Yawudiya ba be. Ameinja-ti ti ru atang ba ri-ba ira titibi iki risu-fu be.

²² Amaa, ati ku sha ti ti fxen unju-fu ikyaen ti, ko aka aka ande ku ri ira titibi risu kumbub ande tishe wune ti afu ta uwae-yi.”

²³ Ikyaen yine a sa usir tsi ti a na kafe ba uwog Bulus. Usir wu, ande yang-ba akwen ru ba uwog ti Bulus ku som atang. Awu tsag ira risu Kujwokwe Rimam te ba, ti kiskinn ti kiskinn pu usir te. Awu ku kwab ti wu shir utob-ba ba uwog Yesu u ku ri te ba ira uwae iken ti kwen Musa ti uwae ira na ande ti ku ya iskin ira Rimam.

²⁴ Ariki uwae-ba cwe ira-wu ayi, ariki cwe-ba be.

²⁵ Aba nwunn ku shaen ishaen te atso. Kiye ti a nwunn ku ru, Bulus ri baa, “Kusung ti Saen Kyag ri kubenti te abitse-ni nee awu nda Ishaya unde ti ku ya iskin ira Rimam ri baa,

²⁶ ‘Ru ka ri te ande bane baa, ani u naa atong u naa atong, ani u fxen nyang-ni be. Ani u sae u sae, ani u nung-ni iken iki be,

²⁷ ikyaen ti, ani bur kyi pu ni ayib-ni. Atong-ni ama ku fxen-yi ira be. Utob-ni cwunn kyi pu yi. Á baa, ayi na si-yi ahan be, ayib-ni ú sae tu pu yi ayi. Atong-ni ama ú fxen nyang pu yi ayi. Utob-ni ama ú kab tu pu wu ayi, ti ani ú kafe ba uwog-m Rimam, ti ame ú nwangru ni uwae ikentitibi-ni.’ ”

²⁸ Bulus ri ama baa, “Ni nung nyinyang! Ira Rimam ti ku nwangru ande yine, a sa yi ka pu ba uwog ande ti apxin. Aba u kyangte yi.”

³⁰ Bulus som kusog wu ti awu mbe fob asang ifaen. Awu ku kyang te meme ande ti ku ba nung wu.

³¹ Awu ku tatso ba ira risu Kujwokwe Rimam u ku kwen na ba ira risu Itsekuru-ti Yesu Kristi. Awu ku ri ira te ba ti ribom u kyen-wu ikyenricwu be. A byang kyi-ba wu ama be.