Wande Atom 27 - Kutsingken Ira Rimam ti Saen Kyag

A Pu Bulus Sang Kuyae Ru yi Roma

¹ Isim ti a myae mam pu ba baa, ati na u sang kuyae na ru uten ti Itali, a pu Bulus ti ariki ti ta pursuna ama fae si kujwo Juliyo, unde ti uwe kumbub akyirten iki ti a ku kunn baa, Kumbub na Ukwe.

² Ati sang kuyae iki ti ru Adar-Mitiyum ba. Ande ti kuyae wune tsi ku ji ti a nwunn u putswa unju uyinn iyen kyaeb uten Asiya. Aristarku, urae Makedoniya ti ru Tesalonika ba, te ti putsa atso.

³ Ucwefam-yi ati ru ba sang Sidon. Uwog wune Bulus tu risu ti tinyang uwe Juliyo. Juliyo nda wu riyae ti wu na ru ka nung arwan-wu ti ta uwae uka atang ti a na nungkyi wu.

⁴ Ati nwunn atang u fxen ira ti ru. Ama ti ati ba ku ye uten Kuburus, ti uyinn pakob wu fa uwae, ufunn ku kae kuyae kafe ti isim. Ikyaen yine ati putsa iyen kyaeb Kuburus uwog ti ufunn ku kae-wu atang ti ribom be.

⁵ Ati putsa uyinn ti ta fer te ikyaeb uten ti Kilikiya ti uten Pamfiliya ba sang umbae uka Mira ti ta uwae ikyaeb uten ti Likiya.

⁶ Uwog wune Juliyo nung kuyae iki ti ru Alezandariya ba ku ru Itali. Ikyaen yine awu ye pu ti sang atang.

⁷ Ufunn kae ti sku sku ku ru fob usir yang akwen. Ande ti ku ter kuyae ngwa rikaen yang-yi akwen, ama ati sa sa ba sang fer umbae uka ti Kinidu. Ati ndenum u ka tu-ti uwe be. Ikyaen yine a ya ta ti kuyae ru iyen kyaeb uten ti Kirete uwog ti ufunn ku kae-wu atang ti ribom be, u ba yafe uten Salamone ti ta iyen kyaeb uten ti Kirete.

⁸ Ati putsa unju uyinn ti fer ti uten ti Kirete. Ti uwae rikaen yine ati sa sa sa u ba sang uwog iki ti a ku kunn wu baa Ukunn ti Jimshwur, awu ti fifer te umbae uka ti Lasaya.

⁹ Ati ndembeb pu ti pu usir yang-yi fengo. Usir Ukwab Itiyafe wur ru mam pu wu. Itiru-ti uwe ike u cicaeb, ama Bulus myae kumyae te ba,

¹⁰ u ri baa, “Ande-m! Ame nung pu m baa, itiru-ti uwe ike, ira titibi u tu ti, ama usu-ti ti kuyae-ti ka u ndembeb, ande ama u cwu.”

¹¹ Amaa Juliyo, unde ti uwe akyirten, fxen ira na unde ti kuyae wu, ti unde ti uwe ande ti ku ter kuyae wu, skeb pu wu ira na Bulus.

¹² Ukunn uwog wu nyang-yi ti a som ishaen usen be. Ikyaen yine, ande yang-ba uwae kuyae ri baa, i na nyang skeb ti a na nwunn atang u jwo putsa uyinn ru, ti a na kwab ba sang uten Fwenis asiti aba a na u nde tu. Fwenis si uka iki uwae uten Kirete uwog ti ayae ku ba kyaetsi atang ti ufunn ku kae-wu atang ti ribom be.

¹³ Ti ufunn ti kae ru uwe ti kujwo rici ba ku kae sku sku, ande ti kuyae tang baa, itimyae-ba na ci pu yi. Ikyaen yine a shir ra aser yi ti ku nda kuyae tsi, u ye yi sang yi uwae kuyae u jwo sku sku putsa unju uyinn ti Kirete ku ru.

Ufunn Tiyang Nwunn

¹⁴ Amaa, isim kiye kpang, ufunn iki ti ribom kae ruye kujwo kiskinn ba ru kujwo rici ku sisi. A ku kunn ufunn-wu baa Yurakulon.

¹⁵ Ufunn wune ba rug kuyae wu ti ribom. Ati kwab num ti ti sa uwe kuyae tsi ru kwar ti uwog ti ufunn kae ru atang ku ba. Ikyaen yine ati ya wu ta, ufunn kae wu putsa ku ru.

¹⁶ Ati wur yafe umbae uten iki ti ta kutampwa uyinn tiyang ti a ku kunn wu baa, Kawuda. Uwog wune ufunn ku kae-wu ti ribom be. Ikyaen yine, ati kwab u shir kupam ti a kya isim ba fer kuyae.

¹⁷ Isim yine ati shir kupam wune tso ba sang uwae kuyae tiyang. Isim yine, a pu iji u yir bom rimenn kuyae ting ting. A ku kyen ikyenricwu baa, iki be ufunn u tur kuyae ka u nji kyi uwae isabung ti ta ukunn ti uten ti Sirtis. Ikyaen na yine, a shir kutupwa ti ta risu kuyae ko si ba u ya ta ti ufunn na kae kuyae ku ru.

¹⁸ Ufunn ti ribom wu tsi kukunn ti ti kae. Ucwefam-yi ande ti ku ter kuyae fxen ira ti ti pu isu ti ta uwae kuyae jwunn si uwae ambyi.

¹⁹ Usir ti fa ti ita, aba ti risu-ba pu usu kuyae wu iki ti si ikum ti iji jwunn si uwae ambyi.

²⁰ Fob usir yang-yi akwen kufub si kyi, ati nung-ti ti ayib usir ko atitaen be. Ufunn wu ama tsi kunn ti ti kae ti ribom. Ricwunnkyi-yi ati sa ruye pu ti utob-ti baa, ati na u nwangru-ti cwucwo be.

²¹ Ti aba som usir yang-yi akwen u ci-ba wuci be, Bulus nwunn u tsi uwe ande ti kuyae u ri te ba baa, “Itaen ande, a baa, ani na fxen ira unju-m, ati ú som pu ti ti Kirete akwen, ama rikaen yi ti tu ti ne ú tu-yi ati cwucwo be. Usu ama ú yag byinn-yi be.

²² Amaa tine, ame ku jwam ni, ni yer-ni anying utob be! Uwae-ti ike unde iki u cwu-wu be, se kuyae amam ti u ndembeb.

²³ Utitang ire Rimam ti si itsekuru-m ti ame ku fen, tom atom-wu ru ba uwog-m.

²⁴ Awu ri te m baa, ‘Bulus, kyen-fu ikyenricwu be. Afu ka u tsi kang uwe Kaisar. Ikyaen-fu, Rimam u nwangru ande ti ta te fu uwae kuyae wune.’

²⁵ Ikyaen na yine, ande m, ni yer-ni anying utob be! Ame ku ru kubenti uwog Rimam baa, iken yine na u nde pangma ti awu ri te m.

²⁶ Amaa, ufunn u sa kuyae ka u nji kyi ukunn imbae uten iki ti nae fa uwae uyinn.”

²⁷ Ufunn ti ribom wune tsi kunn ti ti kae fob usir rijwe asu inje uwae uyinn tiyang. Ti ukatitang utitang na usir ti fa ti rijwe asu inje ande ti ku ter kuyae tang baa, ati na ba ku fer ku pu ti akaense.

²⁸ Ikyaen yine a myae rurong ambyi si afxen mae itsongnjo. A ko ru kpang, u myae kyi, rurong-wu si afxen mae inje mbe rijwe.

²⁹ A ku kyen ikyenricwu baa, kuyae wu na ka u rug kutxom. Ikyaen yine a pu aser inje ti rurob ti ku nda kuyae kyaetsi u pu yi jwunnsi uwae ambyi isim kuyae. Isim yine aba jwam Rimam ti wu na nwangru ba u sa ba ba sang ucwefam kiskinn.

³⁰ Uwog wune, itaen ti ku ter kuyae ku sha ti a tam ru, ti a nwangru risu-ba. A ko kupam ko si yi uwae ambyi ku nde pangma a na u pu aser ti rurob iki si uwae ambyi uwe kuyae.

³¹ Mbara Bulus ri te akyirten ti unde ti uwe-ba Juliyo baa, “Asiti ande ti ku ter kuyae bane a som-ba ti uwae kuyae be, ani u nwangru-ni be!”

³² Ikyaen yine akyirten ba yer tag iji yi ti ye su kupam wu u ya wu ta.

³³ Ti ucwefam ku yae, Bulus jwam ba meme baa, aba na ci wuci. Awu ri baa, “Yaka ne usir ti rijwe asu inje ti ani som uwae ikyenricwu u ci-ni iken iki be. Meme kiye wune rimenn ku wen ni.

³⁴ Ame ku jwam ni tine, ni ci wuci. Ayi u nda ni ribom rimenn. Ko ikyinn risu kinjo na unde iki uwae-ni u sub tika-wu be.”

³⁵ Isim ti Bulus ri ira yine, awu ye ra buredi u nde fxaefa na Rimam uwe-ba meme u nyang ta wu u fxen ira ti ci.

³⁶ Ijwe-ba si fa. Meme-ba ama ci wuci.

³⁷ Meme-ti ande ti ta uwae kuyae atang fob ande ukob ifaen ti mae ande ita ka mbe rijwe asu itsongnjo.

³⁸ Isim ti meme-ba ci kyaen pu ba wuci, a pu ayaen witi ti ta uwae kuyae wu yaen mbub uwae uyinn ikyaen ti a na ko si rurob na kuyae.

Kuyae Byinn Mbub

³⁹ Ti ucwefam yae, ande ti ku ter kuyae nung-ba rinyi uwog ati ta atang be. Amaa a nung uwog iki ti ambyi ru ka rug ku ru atang. Kiye ti a nung isabung nae atang, a kwab baa, asiti a u nde tu, a na u kwab kuyae ru yi atang.

⁴⁰ A yer tag aser ti ku nda kuyae tsi tika u skog uji kufxae ti a ku ter kuyae atang u shir kutupwa ti ta risu kuyae nwunn ritsen ikyaen ti ufunn na kae kuyae na ru yi ukunn uyinn ti a na ka u kya tsi atang.

⁴¹ Amaa a fob-ba atang be. Ufunn shir kuyae ter ba tso tsa kumunn isabung iki ti ta rita ambyi u ka rug atang. Rimenn kuyae wu ti uwe nji bom u ku kyi-wu kyi ijwe be, ama ufunn paen ambyi nwunn ti ribom u ba mbub rimenn kuyae ti isim patag.

⁴² Akyirten ba myae ti a u wen ande ti pursuna ti ta uwae kuyae atang, ikyaen ti, a ku sha-ba ti a na u pù umunn na ru yi akaense u ka tam ru fe be.

⁴³ Amaa Juliyo unde ti uwe-ba ku sha ti wu na nwangru Bulus uwae iticwu, ikyaen yine awu cwe na-wu aba be. Awu ri te ande baa, ande ti ku pù tu umunn ā mbyae si uwae ambyi ti tawe ti a na pù umunn ru akaense.

⁴⁴ Ande ti tsitsi ama na ā putsa ba, u pu ajwo ye apam ko ambumbub kuyae. Ayine si fengo wu ti meme-ti nwangru, u ba fob akaense meme.