Wande Atom 26 - Kutsingken Ira Rimam ti Saen Kyag

Bulus Ri Unju-wu Uwe Ukwe Ageripa

¹ Ukwe Ageripa ri te Bulus baa, “A nda pu ba afu riyae ti fu ri unju-fu.” Bulus sa kujwo tso u ri unju wu baa,

² “Ukwe Ageripa! Ame fxaefa te Rimam ti ame tu riyae u tsi uwe-fu yaka ne, ti m ri unju-m u nwangru risu-m uwae meme ira titibi ti Mbayawuda bane ku ri risu-m.

³ Ikyaen ti, ame nung baa, afu nung tag meme iken na uten Mbayawuda ti ku a nde kob, ti ishaen ti shaen-ba. Ikyaen yine ame ku jwam fu, ye utob te m ti fxen ira ti ame u ri.”

⁴ “Meme Mbayawuda nung pu ba usom ti som-m ti ame som ti ti ame si umbae tinying. Ti kucang-yi a nung pu ba baa, ame na ser ben uwae uten-m ti uwae uka na Urushelima.

⁵ Ande bane nung pu ba ame ti kucang akwen. A baa, a na ku sha ti a ri ira risu-yi, a ú ri baa, ame si kinjo uwae kumbub na Farisi, ati ti ku putsa Icwe Rimam ti kpakang.

⁶ Tine ame tsi ike, a ku pwen m rikwen ikyaen ti, ame sa uwae-m tsi uwae unju ti yer ti Rimam yer te abitse-ti.

⁷ Meme-ti ande ti Isirela kumbub rijwe asu ifaen sa uwae tsi baa, Rimam na u kumunn unju ti yer-wu ne, nee iken ti nde ati ku fen Rimam usirtaen ti utitang. Ukwe tiyang! Iken ti nde Mbayawuda ku kunn me rikwén, si ti ame sa uwae tsi risu unju ti yer na Rimam wune, pangma ti aba sa uwae tsi ama.”

⁸ “Imi ti nde ne, i si ti rikaen uwog-ni Mbayawuda ti ni ru kubenti baa, Rimam na ku kunn nwunn ande ti cwucwu?

⁹ “Ti kute ame ti risu-m kab pu m baa, ame na u nde iken meme ti m na twenji rinyi Yesu unde ti Nazareti.

¹⁰ Ayine si iken ti ame nde uwae Urushelima. Ame tu kuko uwog ande ti uwe na akwen Rimam tiyang ti m na u ye ande na Yesu na sang pursuna. Kiye ti a ku pwen ba rikwen iticwu ame cwe.

¹¹ Ame kyang ka sang tag asog Rimam meme ku byinn ba kimbab ikyaen ti m na u shir utob-ba ti a na fxae ira-ba ayi. Ame tso pang-m rinae te ba, ka ti ame nwunn ku rwae rifab-ba ru yi uten ti ta fengo ti rwen.

Bulus Tsag te Ba Iken ti Nde Titawe Awu Kafe Unde na Yesu

¹² “Ayi si si ikyaen ira yine ti akwen Rimam tiyang tom m uwae rinyi-ba ru yi uka na Damasiku ti m na ka ye ande na Yesu.

¹³ Ukwe. Ame ti arwan-m ta fengo ku ru ti usir ta kitaen. Ame nung urwa iki ti tsen skeb pu wu usir ti jaen wur si apupwen ba pakob m ti ande ti ku putsa m.

¹⁴ Meme-ti jwunnsi riben, ame fxen afxenjwin ku ri ira te m unju Mbayawuda baa, ‘Sawulu! Sawulu! Imi ti nde nee afu ku tsi ukub te m? Kakum ti bom risu ku sa ijwe-wu ter unju ukum ti a ku byinn wu atang. Afu ku nde ijwe-fu rikaen.’

¹⁵ Ame rang baa, ‘Unde ti uwe, afu si aye?’ Itsekuru ri te m baa, ‘Ame si Yesu ti afu ku nde m rikaen.

¹⁶ Sunwunn ti tsi ritsen. Iken ti nde nee ame ba uwog-fu si ti m tsab ra fu ti afu na u si upyi-m. Afu u ri te ande iken ti afu nung yaka ti iken meme ti ame u tatso fu uwe ike.

¹⁷ A u nwangru fu kujwo ande na Isirela ti ande ti si ba Mbayawuda be ti ame u tom fu ka uwog-ba.

¹⁸ Afu ti u mbubta ayib-ba u shir ba ruye uwog kufub ba uwog ti sisaen. Afu u nwangru ba uwae kujwo Shetann ba uwog Rimam ikyaen ti wu na ya ta na ba ikentitibi-ba u nda ba kutunn-ba kutampwa ande ti ana-wu ti ku ru uwae kinjo uwog m!’ ”

Bulus Ri Ira Risu Wande-wu

¹⁹ “Ukwe Ageripa, ame pyir-m iken ti Rimam ri te m fengo be.

²⁰ Ame ti tawe u ru ka ri ira te ande ti uka na Damasiku te ande ti Urushelima ti meme ande ti uten na Mbayawuda, ti ande ti si-ba Mbayawuda be. Ame ri te ba baa, a na ya ikentitibi-ba na ta, u kafe ba yi uwog Rimam, ti a na ba nde wande ti tinyang ti u tso ande baa, a na ya ta pu ba ikentitibi-ba.

²¹ Né iken ti nde Mbayawuda teb shi m kiye ti ame ta uwae Kusog Rimam, a ku kwab ti a wen m.

²² Amaa, Rimam ndeya m ba ku sang ti yaka ne. Iken ti Musa te ande ti ku ya iskin ira Rimam ti tsitsi ri baa, ayi na u ba nde uwe, si sí ayi ti ame ku ri te ni, ani ande ndufu ti ande ti tsitsi.

²³ A ri baa, Unde wu ti Rimam Tsab Tsi na u ngwa kang rikaen. Awu ti na u si unde ti tawe u nwunn uwae iticwu u ya iskin ira Rimam uwog Mbayawuda te ande ti si-ba Mbayawuda be baa, Rimam na u pu ba ba uwog ti sisaen-wu.”

²⁴ Ti Bulus tsi ku ri unju-wu ne ahan, Festu nyae ira ri baa, “Bulus! Afu ku jwub kijaen! Iken ti nung-fu sa ku na fu kijaen!”

²⁵ Bulus ri te wu baa, “Unyang-fu a ko ra ru yi uwe, ukwe! Ame ku jwub-m kijaen be. Ira ti ame ku ri si kubenti! Ayi ru risu.

²⁶ Ukwe! Afu nung pu fu iken yine. Né iken ti nde ame ku ri ira te fu ti ribom, m kyen-m ikyenricwu be, afu nung pu fu iken yine meme ti ayib-fu. Ame tang baa, afu nung pu fu iken yine meme ikyaen ti, a pu yi tam-ba tam uwog iki be.

²⁷ Ukwe! Afu ku ru kubenti uwog ira ti ande ti ku ya iskin ira Rimam ri a? Ame nung pu m afu ru kubenti!”

²⁸ Ukwe Ageripa rang Bulus baa, “Afu ku tang baa, uwae kiye kpang ne, afu u ci ra utob-m, ti m kafe Unde ti ku fen Kristi ti ritsen ti ritsen a”

²⁹ Bulus ri te wu baa, “Ko ame a ri ira kpang, ko ame a ri ira yang-yi, ame ku jwam Rimam ti afu te ande ti ta ike meme ti ku fxen m yaka ne, na u kafe pangma ti ame tsi ne, se iticwong ti a cwong m nae ne.”

³⁰ Tiri, ukwe wu ti gomna wu, ti Bernike, ti meme ande ti tsitsi fa sunwunn ritsen.

³¹ Aba ruye kusog atang. Isim ti a ruye pu ba, a ku ri te atso baa, “Unde wune raen-wu ira ti a u wen wu ko ti a u sa wu sang pursuna be.”

³² Ukwe Ageripa ri te Festu baa, “Awu ri pu wu pu baa a na pwen rikwen-wu uwe Ukwe Tiyang. A baa ayi na si-yi ahan be, a ú saen wu ta.”