Wande Atom 24 - Kutsingken Ira Rimam ti Saen Kyag

Mbayawuda Kunn Bulus Rikwen Uwog Unde ti Uwe Uten

¹ Isim usir itsong, Ananiya kukwen Rimam tiyang ti ande ndufu na kusog Rimam na Mbayawuda si ba Kaisariya. Aba pu loya fa imbyi. Rinyi-wu si Tertulu. Aba ba kunn Bulus rikwen uwog Gomna Felis.

² Ti a ka ye pu Bulus ba, Tetulu fa sunwunn u fxen nyáng ira titibi ti ri risu Bulus amam. Awu ri te Gomna Felis baa, “Unde tiyang! Unyang-fu ā ko ra ru yi uwe! Usom ti som na ben-ayib-fu nda uten jimshwur ko ru yi uwe. Afu kyaenyang iken yang-yi akwen ko aka uwae uten-ti wune.

³ Ati kyangte iken yine te ajwo ifaen. Ati ku nde fu fxaefa si-yi ti ti ri be.

⁴ Tine ame ku sha-m ti m u ci-m kiye-fu be. Ame ku jwam fu, afu a cwe ira, naa atong uwae ira yi ti m u ri kpang ne.

⁵ Ati nung pu ti baa, unde wune si unde titibi ti ku ndembeb uten. Ko aka uwae utense awu ku sa kukyikab sang kutampwa Mbayawuda. Awu si kinjo uwae ande ti uwe na kumbub Nazareti.

⁶ Awu cwucwo ku kwab ti wu ye Kusog Rimam sormbeb. Ama ati ye wu.

⁷ Amaa, ukwe akyirten, Lisiya, ka ru ba ti rinae u shi mbe ra wu kujwo-ti.

⁸ Asiti afu a rang unde wune afu ti risu-fu u fxen meme ira ti ati ku ri risu-wu.”

⁹ Isim ti Tetulu ri mam fe ira yine, Mbayawuda ti tsitsi cwe unju wu u ri meme baa, ira ti awu na ri na si kubenti.

Bulus Ri Unju-wu Uwe Felis

¹⁰ Gomna wu nde na Bulus kujwo baa, awu na ri ana-wu. Ama Bulus ri baa, “Ame nung pu m ti afu nae ukwe uten wune ka aye yang-yi, ikyaen yine ame ku tsen utob ti ame u ri unju-m uwe-fu.

¹¹ Afu a nùng putsa ira yi nyinyang, ayi yafe-yi usir rijwe asu ifaen ti wur ruru be, nee ame ru ka Urushelima ti m ka u fen Rimam.

¹² Mbayawuda tu-ba ame ti unde iki ku shaen ishaen be. Aba ama tu-ba ame ti ame ku shir kukyikab sang kutampwa ande be, ko uwae kusog Rimam tiyang ko uwae asog Rimam-ba ti kitinying ko uwae uka.

¹³ Aba site-ba ira iki ti kubenti ti a tso fu baa, ira yi ti a ku ri risu-m na si kubenti be.

¹⁴ Amaa iken kinjo ti ame cwe si ti ame ku putsa fengo Yesu nee ande bane ku ri baa, awu na si fengo ti ukaen. Ame ku fen Rimam na abitse-ti. Ama ame ku ru kubenti uwae na meme iken ti kwen Musa, ti uwae atsingken na ande ti ku ya iskin ira Rimam.

¹⁵ Ame sa utob-m tsi uwog Rimam baa, meme ande, aba ti ku nde iken ti tinyang ti aba ti ku nde iken titibi, na u ba nwunn uwae iticwu. Ande bane ike ti risu-ba ku cwe ira risu iken yine ama.

¹⁶ Ikyaen yine ko usir titini ame ku kwab ti m som ti utob ti sisaen uwe Rimam te ande.

¹⁷ “Isim ti ame ya Urushelima ta fob asang yang-yi, ame kafe ru ka atang ikyaen ti m u pu rinyangwae ru ka na ande-m, ti ikyaen ti m u ka u fen Rimam.

¹⁸ Ayi si uwae kiye ti ame ku nde iken yine, nee aba tu m kusog Rimam. Ame jwosaen pu m risu-m pu. Ande ta-ba atang yang-yi be, unde iki ama ndembeb-wu utob te m be.

¹⁹ Amaa, Mbayawuda iki ti ru Asiya ba, aba ta atang kiye wu. A baa, aba ti risu-ba na ta ike ti a u ri ira, ayi ú nyang skeb, asiti aba a ta te ira iki te m.

²⁰ Amaa, ti aba ta-ba ike be, ande bane ā ri te fu riraen ti a tu uwog-m kiye ti ame tsi uwog ande ti ku pwen rikwen Urushelima.

²¹ Ayi si nyáng ira kinjo ti m ri kiye ti ame tsi uwe-ba baa, ‘Iken ti shir m ba sang rikwen wune yaka ne si ira itinwunn ande uwae iticwu.’ ”

²² Tiri, Gomna Felis, ti fxen nyang pu wu ira risu fengo wune na Yesu ti kucang, shir ra rikwen yi ru yi usir iki. Awu ri baa, “Kiye ti Lisiya ukwe akyirten a ka ru ba, ame u nung nyang ira-ni ayi.”

²³ Awu ri te unde ti uwe akyirten ti wu na nungkyi Bulus, ama awu na nde nam tur te wu, u ya ta na wu riyae ikyaen ti arwan-wu na sha na wu iken ti awu ku sha.

Bulus Tsi Uwe Felis ti Durusila

²⁴ Isim usir kpang, Felis ka ru ba ti uwa-wu Dursila, unda Mbayawuda. Awu ka kunn Bulus ba u naa atong uwae ira ti Bulus ri risu fengo ti unde u ru kubenti uwog Yesu Kristi.

²⁵ Ti Bulus tsi kunn ti ku ri ira risu wande ti pang atang uwe Rimam, ti risu ijwe ti ti ye su, ti risu rikwen Rimam ti ku ba, ira yi nda Felis kyen ricwu. Awu sa ri baa, “Ayine pang pu yi. Ru-fu. Kiye ti ame a ba tu riyae, ame ka u kunn fu ba kyi.”

²⁶ Ti awu ri ira yine, awu sa uwae tsi baa, Bulus na u sha na wu aser. Ikyaen yine, awu ku kunn kob wu ira ru ba u ku te wu tsag rikaen.

²⁷ Isim ti asang ifaen wur ru, Porkiyo Festu fen kyi kutxom Felis u si unde ti uwe uten. Felis ku sha ti wu u tu risu ti tinyang uwog Mbayawuda, ikyaen yine awu ya Bulus ta ti pursuna.