Wande Atom 22 - Kutsingken Ira Rimam ti Saen Kyag

¹ “Ameinja-m! Abitse-m! Ni naa atong ti m ri te ni iken ti nde ti ni nung baa ame na ta-m ti riraen be.”

² Ti aba fxen wu ku ri unju uten-ba, a ka bwe tag skirr skeb pu ba ti kucang. Bulus ku ri baa,

³ “Ame si urae Mbayawuda. A mbae me uwae uka na Tarsus ti ta uten ti Kilikiya. Amaa, a shi m uwae Urushelima ike. Gamaliyel ti kwen na m iken ike. Awu ti kwen na m icwe na abitse-ti ti imbyi ti imbyi-yi. Ame sa utob-m meme tsi uwae icwe Rimam, pangma ti meme-ni ku nde tine.

⁴ Ti kucang ame ku nda ande ti ku putsa fengo Yesu wune rikaen. Ame wen ariki. Ame ye ariki, arom te anda, sang pursuna.

⁵ Kukwen Rimam tiyang ti ande ndufu ti u cwe baa, ira yi ti ame ku ri ne si kubenti, ikyaen ti, aba ti nda m atsinken itawe ame ku ru yi uwog ameinja-ti ti ta Damasiku. Ame ru ka atang ikyaen ti m u ka u ye ande na Yesu u cwong ba ti aser u pu ba ba Urushelima ikyaen ti ati na nde ba rikaen ike.”

Bulus Ri te Ba Iken ti Nde Awu Ba Putsa Ira Yesu

⁶ “Ti ame ta fengo ba ku ye Damasiku ti usir ta kitaen pam pam, ti ritsen iken iki jaen wur apwa apupwen ba pakob m riben ike.

⁷ Ame jwunnsi riben u fxen afxenjwin ku ri te m baa, ‘Sawulu, Sawulu, afu nde rimang ku nde m rikaen?’

⁸ Ame rang baa, ‘Itsekuru-m, afu si aye ti ku ri ira te m?’ Awu ri te m baa, ‘Ame si Yesu na Nazareti, ti afu ku nde m rikaen.’

⁹ Ande ti putsa m nung urwa wu ama, amaa aba fxen-ba afxenjwin unde wu ti ku ri ira te m be.

¹⁰ Ame rang baa, ‘Itsekuru-m, ame u nde rimang tine?’ Awu ri te m baa, ‘Fa sunwunn ti ru uwae uka na Damasiku. Atang a u ri te fu meme iken ti a ku sha ti fu na nde.’

¹¹ Arwan-m ti putsa m tae m tae ti kujwo ka sang uka na Damasiku, ikyaen ti, urwa ti byinn m ne tsen pang-wu, ame sae tu-m uwog cwucwo be.

¹² “Unde iki ta Damasiku atang ti rinyi-wu si Ananiya. Awu si unde ti ku fen Rimam ti utob-wu kinjo, u ku putsa Icwe-ti. Meme Mbayawuda ti ta uwae Damasiku ku ri ira ti tinyang risu-wu.

¹³ Awu ru ba uwog-m u ba tsi fer m u ri baa, ‘Inja-m Sawulu, tu itisae-fu ti atang!’ Ti ritsen, ayib-m mbubta, ame sae wu.

¹⁴ Awu ri baa, ‘Rimam na abitse-ti tsab ra pu wu afu ti fu na nungye iken ti awu ku sha ti awu na u nde te fu; cwucwo ti afu na nung unde-wu ti sisaen, ti afu na u fxen afxenjwin-wu.

¹⁵ Ikyaen ti uwe ike, afu na u ri te ande meme ira risu iken ti afu fxen ti iken ti afu sae.

¹⁶ Afu som ku ji-fu imi tine? Sunwunn ti a nde na fu batisima. Jwam Itsekuru ti wu jworu ikentitibi uwae utob-fu.’ ”

Bulus Ri te Ba Ira Risu Wande ti Rimam Nda Wu

¹⁷ Bulus ri baa, “Isim-yi ti ame kafe ba ti yi Urushelima, ti ame ku jwam Rimam uwae kusog Rimam tiyang iken iki pangma kurwa sunn m.

¹⁸ Uwae iken yi ame nung Yesu ku ri ira te m baa, ame na nde fife ti m na nwunn Urushelima, ikyaen ti, ande ti ta ike na u cwe-ba ira ti ame na ku ri risu-wu be.

¹⁹ Ame ri baa, ‘Itsekuru-m, ande ti ta uwae uka wune nung pu ba baa, ame kyang ka asog Rimam na Mbayawuda ku ru ka ye ande ti ku ru kubenti uwog-fu u ku byinn ba ku cwunn ba pursuna.

²⁰ Kiye ti a wen Stefana unde ti ku ri te ande ira-fu, ame ta atang. Ame cwe iken ti a ku nde. Ame nungkyi atupwa ande ti wen wu.’

²¹ Ama awu ri te m baa, ‘Nwunn ike, ame ka u tom fu ru fe fengo ti rwen uwog ande ti si-ba Mbayawuda be.’ ”

²² Ande ba ti ku fxen ira Bulus yine sa sa sa ba sang ira risu ande ti si-ba Mbayawuda be, tiri a nwunn ba ira ti nghae. A ku nghae yang-yi baa, “Ni pu wu ru ka wen wu! Itso unde wune ā cwu!”

²³ Aba ku taen shi taen shi, ku pu atupwa-ba yang apupwen u ku pu ibung yaen tso yi apupwen.

²⁴ Unde ti uwe na akyirten na ande ti Roma nda ande-wu ti a na pu Bulus na sang ti uwae kusog-ba. Awu ri te ba baa, aba na byinn wu kimbab ikyaen ti a na nung imbyi iken ti nde ne Mbayawuda ba ku taen itso ira yine risu-wu.

²⁵ Ti a cwong mam wu ti a u byinn wu kimbab, Bulus ri te unde ti uwe ti tsi fer wu baa, “Ame site kati na Ukwe. Ayi nyang uwog-ni ti ni byinn me ti ti a pwen-ba ame rikwen khika be a?”

²⁶ Ti unde wu fxen ira yine, awu nwunn ru uwog ukwe akyirten tiyang u ka rang wu baa, “Iken yine si imi ti afu ku nde? Nung! Unde wune, Bulus, site kati na Ukwe ti Roma!”

²⁷ Ikyaen yine ukwe akyirten wu ru ka byib Bulus baa, “Ri te m, afu site kati na umbae Roma a.” Bulus cwe baa, “Een.”

²⁸ Ukwe akyirten wu ri baa, “Ame pae aser yang-yi titawe ame si kinjo uwae ande ti ye su kati na Roma.” Bulus ri te wu baa, “Ana-m, a mbae m uwae kununn unde ti site kati na Ukwe.”

²⁹ Ti ritsen, ande ba ti ku sha ti a byib wu ira ter kafe ti isim. Ukwe akyirten wu ku kyen ikyenricwu ama, ikyaen ti, awu nungye baa, Bulus ti awu nda ba cwong wu ti aser na si unde ti site kati na umbae Roma.

Bulus Tsi uwe Ande ti ku Pwen rikwen

³⁰ Ucwefam-yi, ukwe akyirten wu ku sha ti wu nung kang kubenti imbyi ira ti Mbayawuda ku ri risu Bulus. Ikyaen yine, awu nda Bulus ruye ise u kunn byir akwen Rimam tiyang ti meme ande ti ku pwen rikwen u nda Bulus ba tsi kutampwa-ba.