Wande Atom 21 - Kutsingken Ira Rimam ti Saen Kyag

Bulus Ru yi Urushelima

¹ Isim ti ati ya ba ta, ati sang kuyae u ru ti uwe ti uwe yi uten ti Kosi. Ucwefam-yi ati ba sang uten ti Rodos. Ati nwunn atang se Patara.

² Ati tu kuyae iki atang ti yen ku ru yi uten ti Fonikiya. Ati sang uwae wu u nwunn ku ru.

³ Ti ati sa sa sa ba ku ye ti ati u nung uten ti Kuburus, ati ta ta si kujwo rici u si fe yi uten ti Siriya. Ati ka kya tsi uka na Tiire u ruye kuyae atang, ikyaen ti, awune si uwog ti a ka u pu usu ruye uwae kuyae.

⁴ Ati ru ka tu ande na Yesu iki atang, u som te ba ka kutsab kinjo. Kusung ti Saen Kyag nda ba, aba fa Bulus kusen baa, awu na ka-wu Urushelima be.

⁵ Ama ti usir pang pu wu ti ati u nwunn uwog wu, ati nwunn u ru iken-ti. Meme-ba, te awa-ba te anyisu-ba, putsa ti ruye uwae uka atang. Ti ati ka sang unju uyinn, ati ku riben u jwam Rimam.

⁶ Isim ayine tiri, ati tē atso, ama ati ti Bulus sang kuyae ru, aba ama kafe ru iken-ba ti kununn.

⁷ Kuyae sa ti ruye uten ti Tiire ba sang uten ti Tolemayi. Ti ati ba sang atang, ati kunnji ameinja-ti ande na Yesu u som te ba atang ka usir kinjo.

⁸ Ucwefam-yi, ati nwunn u sa sa sa ba sang uka na Kaisariya. Ti ati ba fob atang, ati ka sang kununn unde iki ti rinyi-wu baa, Filip. Awu si unde ti ku ri ira Rimam te ande, u fa uwae ande itsongfaen ti nee a tsab ba Urushelima ti kucang.

⁹ Awu unde wune site anyisu anda ka inje ti baen-ba ande khika be. Aba si ande ti ku ya iskin ira Rimam.

¹⁰ Kiye ti ati som atang ka usir iki, unde iki ti rinyi-wu baa Agabus, ka ru Yawudiya ba. Awu si unde ti ku ya iskin ira Rimam ama.

¹¹ Awu ru ba uwog-ti u ba sa byeti ti Bulus ku yir umbyi-wu te wu, u bim kyi afxen-wu ti ajwo-wu u ri baa, “Kusung ti Saen Kyag ri te m baa, ayi u si ahan ama Mbayawuda ti ta Urushelima na u yir unde ti byeti wune, u sa wu na ande ti nung-ba Rimam be.”

¹² Ti ati fxen ira yine, ati te ande ti ta atang jwam Bulus baa, awu na ru ka-wu Urushelima be.

¹³ Ama Bulus rang ti baa, “Ani nde rimang ku jwub aten ku si, ku pwen ti ni u nda m yer anying utob? Ame som ku ji baa, ko a u yir m iji, ko a u wen m wen yi Urushelima, ame cwe pu m, ikyaen na rinyi Itsekuru-ti Yesu.”

¹⁴ Ati ri num-ti awu u ya wu ta u ri te wu baa, “Iken ti Rimam a ku sha, ayi ā nde.”

¹⁵ Isim ti ati som atang usir kpang, ati byir iken-ti u nwunn ru yi Urushelima.

¹⁶ Ariki uwae ande na Yesu ti ta uka na Kaisariya putsa ti ru te atso yi Urushelima. A pu ti ka sang kununn unde iki, rinyi-wu baa Minason, urae Kuburus, baa, ati na nae atang. Minason wu ru kubenti uwog Yesu fengo-yi rwen pu yi.

Bulus Ru ka Nung Yakubu

¹⁷ Ti ati ka sang pu ti Urushelima, ameinja-ti ande na Yesu kyang te ti nyinyang.

¹⁸ Ucwefam-yi Bulus pu ti ru ka u tu Yakubu. Meme ande ndufu na ande na Yesu funn pu ba atang.

¹⁹ Bulus kunnji ba ira u tsag te ba imbyi meme iken ti Rimam nda wu nde kutampwa ande ti si-ba Mbayawuda be.

²⁰ Ti aba fxen ira-wu yine, meme-ba teb rinyi Rimam. Ama ariki ri te Bulus baa, “Inja, afu nung pu fu, Mbayawuda yang-ba akwen ru pu ba kubenti uwog Yesu. Meme-ba ku putsa Icwe-ti Mbayawuda bwe, ku ye su yi nyinyang.

²¹ Ama ariki ku ri te ba baa, iken ti kwen ti afu na ku kwen na Mbayawuda ti nae uten ande ti ise na nyang-yi be. Afu na ku kwen na ba ti a na ya Icwe ti Musa nda ti na ta. Afu na ku ri te ba baa, aba na tsen na-ba anyisu-ba kutxin cwucwo be, ti aba na putsa-ba fengo-ti na Mbayawuda cwucwo be.

²² Aba u fxen kang baa, afu na ba pu fu Urushelima ike. Ati u nde rimang?

²³ Iken ti afu u nde ta re. Uwae ande na Yesu ti ta ike ande inje iki yer unju te Rimam.

²⁴ Putsa ba ru ti ni ka nde iken meme ti a bae uwae Icwe ti Rimam ā jwo saen utob-ni. Cwucwo ka pae iken ti a nde icwe te yi ikyaen ti a pwen na ba risu. Afu a nde iken yine, Mbayawuda ti ike meme u nung baa, ira ti a fxen risu-fu na si ira tikong, ama afu na ku putsa sí Icwe-ti Mbayawuda ti atang.

²⁵ Ama uwog ande ti ku ru kubenti uwog Yesu ti si-ba Mbayawuda be, ati tom na pu ti aba kutsingken baa, ati na ku tang baa, icwe yi ti aba na u putsa kang na si ayine amam, aba na ci-ba wuci iki ti a sa fen apxin atang be, aba na u ngwa-ba anying ibye be, aba na kub nyáng ibye ti a yerwuwen, aba na nae-ba amae be.”

²⁶ Ikyaen na yine, ucwefam-yi Bulus pu ande inje bane ru ka nde iken yi né a ri te wu ikyaen ti Rimam na jwo saen utob-ba. Isim yine, awu nwunn ru yi Kusog Rimam tiyang ti wu u ri te ande usir ti a sa tsi ikyaen ti awu te ande inje bane na u kumunn unju ti yer-ba, ti usir ti a na u yer wen iken-ba na Rimam.

A Ye Bulus Kusog Rimam

²⁷ Ayi tsitsi kpang ti usir itsongfaen na unju ti yer-ba u nde, Mbayawuda iki ti ru uwae uten ti Asiya ba nung Bulus uwae Kusog Rimam tiyang. Aba nda ande ti funn atang meme ndembeb utob ti Bulus. Ama a ru ka ye wu.

²⁸ Aba ku nyae ira baa, “Ande ti Isirela, ni ba ndeya ti roo! Awune si unde wu ti ku kyang fe uwog meme ku kwen na ande ira titibi risu-ti ande ti Isirela, ti risu icwe abitse-ti, ti risu Kusog Rimam-ti ne. Tine ama, awu pu Mbahelene ba pu wu Kusog Rimam ike u ba ye uwog ti sisaen ne ndembeb.”

²⁹ A ri ira yine ikyaen ti, ti kucang aba nung urae Afisa iki ti rinyi-wu baa Turofimu ti Bulus ku kyang te atso uwae uka. A ku tang baa, Bulus na pu unde wu ba pu wu Kusog Rimam atang.

³⁰ Ande ti Urushelima meme kyirunn. Meme-ba ter ru ba teb shi Bulus u fam wu ruye uwae kusog Rimam u cwunn kyi ufu kusog ti ritsen.

³¹ Ti a ku kwab ti a u wen wu, ukwe rika na Mbaroma fxen baa, meme ande ti Urushelima na nwunn pu ba usum ti sha.

³² Ti ritsen awu kunn byir akyirten iki ti ande ti uwe-ba ti ta umbyi-wu, a nwunn u ter si ba tu ande ba ti ku sha usum ne. Ti ande ba nungye ukwe rika wu ti akyirten-wu, a kum-ba Bulus cwucwo be.

³³ Unde ti uwe akyirten ru ka tu Bulus, u ye wu u nda akyirten-wu a na pu aser ifaen na cwong wu. Tiri awu rang ande ba baa, “Unde wune si aye? Imi ti awu nde?”

³⁴ Meme-ba ku nghae kyi nghae kyi, awune ku ri ana-wu, awune ku ri ana-wu. Ikyaen ira yi ti a ku nghae ne, unde ti uwe wu fxen tu-wu imbyi ira yi be. Ikyaen yine awu nda akyirten-wu pu Bulus ru yi baraki.

³⁵ Ti a pu Bulus ka tsi ufu kusog uwog ti a u ceb putsa atang ku tso, akyirten aba ye wu ye ikyaen ti, ande ku sha ti a kum wu kum.

³⁶ Ujwunn ande ba ti ta atang wur tu tu tu putsa wu. A ku nghae ira baa, “Ni wen wu! Ni wen wu!”

Bulus Ri Unju-wu

³⁷ Ti a pu Bulus ru ku sang atang, awu ri te unde wu ti uwe akyirten baa, “Afu cwe ti m ri ira te fu a?” Unde wu rang wu baa, “Ase afu ku ri unju Helene a?

³⁸ Yi a si ahan, afu si-fu urae Ejib wu ti nwunn ufxaen kiye ti wur ruru ne u pu ande kumbub inje ti ku wen ande ru yi kutur be a?”

³⁹ Bulus ri te wu baa, “Ame si urae Yawuda. A mbae m uwae uka na Tarsus uwae uten ti Kilikiya. Uten-m si uka ti kuko. Ame ku jwam fu, afu a cwe ira, nda m ti m ri ira te ande.”

⁴⁰ Unde ti uwe wu cwe na wu, ama Bulus tsi tsa ufu kusog atang u nde kujwo baa, ande na bwe tag. Ti a ka bwe tag, awu nwunn ku ri ira te ba ti unju Aramaya.