Wande Atom 20 - Kutsingken Ira Rimam ti Saen Kyag

Bulus Kafe Ka Makedoniya ti Akaya

¹ Isim ti a fwan nwunn pu ba kibyag ne uwae uka ti Afisa, Bulus kunn byir ande na Yesu u ri bom ba ijwe u tē ba. Awu nwunn u ru fe yi ikyaeb uten ti Makedoniya.

² Awu ru tsa uten meme ti ta atang ku ri bom ande na Yesu ijwe. Awu ru fe yi uten ti Girisi

³ u ka som atang ka ishaen ita. Isim yine tiri awu ko yaen ti wu sang kuyae kafe ru yi uten ti Siriya, amaa, Mbayawuda ku kab iken titibi ti a na nde te wu. Ikyaen yine awu pwen baa, awu na u kafe ti isim ba ru tsa Makedoniya.

⁴ Ande ti te wu putsa atso si Sopater umbae Pirus, unde ti uten Bereya, ti Aristarku ti Sekundus, ande ti Tesalonika, ti Gayus urae unde ti uten Derbe, ti Timoti, ti Tikikus ti Turofimu ande ti uten Asiya.

⁵ Ande bane ru uwe ru ka som ji ti uwae uten ti Turowas.

⁶ Isim Ukwab Itiyafe ti si ukwab buredi ti yisiti si-yi atang be, ati sang kuyae u nwunn u ya Filipi ta. Ati nde usir itsong uwae uyinn itawe ati ba tu ba Turowas u som atang kutsab kinjo.

Yutiku Pu Cwu

⁷ Usir bikyinn ti ureb, ati ande Yesu funn ikyaen ti ti ci wuci ti a ku tangsom te iticwu Yesu. Bulus ri ira te ande. Awu sa ira ti ri se ukatitang, ikyaen ti ucwefam-yi awu ku nwunn-wu nwunn.

⁸ Urwa fitila munnae kusog yi apupwen uwog ti ati funn atang.

⁹ Umbae utaen iki ti rinyi-wu baa, Yutiku som kiye atang. Ti Bulus ama tsi kunn ira ti ri, kicwag ye ben Yutiku u sa ra wu ru, awu jwunnsi ti kusog ti ita ti apupwen si ba yi riben. Aba si ka ye ra wu nwunn, ti a nunung, awu cwu pu wu.

¹⁰ Ama Bulus si ba yi riben u pu ku u ye ra umbae wu bur utob u ri baa, “Ni ndembeb-ni utob be, unyang-wu ta ti atang.”

¹¹ Tiri Bulus kafe tso ti yi kusog ti apupwen. Isim ti awu nyangta buredi nee a ku tangsom ti iticwu Yesu, aba ci. Isim yine Bulus tsikunn ira ti ri pu ucwefam, u nwunn ya ba ta.

¹² A pu utaen unde wu ru yi kununn. A tsen utob timambe ikyaen ti, unyang-wu kafe ba pu wu ti atang.

Ati Ru Turowas Ba Miletus

¹³ Bulus pwen ti wu u kyang ti afxen ka Asos. Ikyaen yine ati ande ti tsitsi si ka sang kuyae, u putsa uyinn ka Asos atang, ku myae baa, ati na u pu wu sang kuyae atang.

¹⁴ Kiye ti Bulus ba tu ti Asos, ati pu wu ba sang te ti uwae kuyae, ku ru yi uten Mitilene.

¹⁵ Kuyae-ti nwunn atang ba yafe uten Kiyosi ucwefam-yi. Usir ti apu-ifaen ati ba sang uten ti Samos. Usir ti fa ti ita ati sa sa sa ba uten Miletus.

¹⁶ Bulus kab mam pu wu baa, awu na u yafe uka na Afisa ikyaen ti, awu ku sha-wu ti wu ci kiye ikyaeb uten Asiya be. Awu ku fifae ti wu kaa sang Urushelima itawe usir Pentekos u nde, asiti riyae a ta atang.

Bulus ti Ande Ndufu ti Afisa

¹⁷ Kiye ti ati ta Miletus, Bulus tom atom ru yi Afisa, u ku jwam ande ndufu na ande Rimam ti a na ba tu wu yi Miletus.

¹⁸ Kiye ti a ka tu wu, awu ri te ba baa, “Ani nung pu ni usom ti som-m ti ame som kutampwa-ni ike, sa ti usir ti kucang ti m ba uten Asiya.

¹⁹ Ame nde wande na Itsekuru-ti Rimam ti risu ti nae riben ti aten ayib. Ame ngwa rikaen ikyaen ikentitibi ti Mbayawuda nde na m.

²⁰ Ani nung pu ni baa, ame tam-m ani iken iki ti tinyang ti u ndeya ni be. Ame kwen na ni ira Yesu uwae kununn-ni ti uwae rishen uwog ti ani ku funn atang.

²¹ Mbayawuda ti ande ti si-ba Mbayawuda be, ame tsi kukunn ku ri te ba baa, aba na ya ikentitibi-ba na ta ti a na ba putsa Rimam, ti a na ru kubenti uwog Itsekuru-ti Yesu.

²² Tine, ti risu ti nae riben uwog Kusung Rimam, ame ku ruru Urushelima, ko ti ame nung-m iken ti u tu m atang be.

²³ Iken kinjo ti ame nung amam si ti, ko aka ti m ku sang atang, Kusung ti saen kyag ku ri te m baa, rikaen ti pursuna na tsi ku ji me uwe.

²⁴ Amaa, ame sa-m unyang-m baa, awu na si iken iki be. Iken kinjo ti ame ku sha si ti, ame u nde tag wande-m ti Itsekuru-m Yesu nda m, ti si ti ame na sa ira tinyang na ayibrisi Rimam na ri te ande meme.

²⁵ “Ame kyang ka pu m uwog-ni meme, u ku ya na ni iski ira kujwokwe Rimam. Tine ame nung pu m baa, ani u nung-ni uwe-m cwucwo be.

²⁶ Ikyaen yine, ame ku ri te ni paenine usir ti yaka ne baa, asiti uriki uwae-ni a cwu-wu uwae ikentitibi-wu, awu ā sa ti ukwae-wu. Ira-m iki fa atang be.

²⁷ Ame tam-m ani iken iki uwae iken ti Rimam ku pwen ti wu u nde be.

²⁸ Ni som ti ujwin ti ni nungkyi iken ti ti shi ti Kusung ti Saen Kyag nda ni kujwo. Ni si ande ti ku shi ande na Rimam, ti awu sa ba kafe ande-wu ikyaen iticwu na Umbae-wu Yesu.

²⁹ Ame nung pu m baa, isim ti ame a ru pu m, ariki ti pangma aswá u sang ba shir kufxaen sang kutampwa-ni.

³⁰ Kiye ku ba ti ariki uwae-ni ike u nwunn, ku wor rifen ikyaen ti a nda ande na Yesu putsa ba.

³¹ Ikyaen na yine ni som ti ujwin, ti ni tangsom baa, uwae asang ita, ame ku kwen na ni iken usirtaen ti utitang, fa ti ira ti jwub.

³² “Tine ame sa ni na Rimam kujwo, ti ira tinyang-wu ā nungkyi ni. Ira tinyang Rimam yine u nde tu ti wu nda ni ser ti ribom. Awu u pwen ni fa uwae itinyang ti awu sa tsi ka meme anyisu-wu ti awu jwosaen utob-ba.

³³ Ame sa utob tsi-m risu aser ko atupwa na unde iki be.

³⁴ Ani ti risu-ni nung pu ni baa, ame ti arwan-m tu itici-ti ti iti ngwa-ti uwae wande ti ame nde te ajwo-m yine.

³⁵ Uwae iken yine meme ame ku tatso ni baa, i nyang skeb ti ti nde wande ti ribom ikyaen ti ti ndeya ande ti bom-ba bom be. Ti tangsom te ira Itsekuru-ti Yesu ti awu ri baa, ‘Unde ti ku ndab ta kujwo site kujwojang skeb pu wu unde ti ku kyangtite.’ ”

³⁶ Ti Bulus ri mam ira yine, awu ku riben te ba meme, a jwam Rimam.

³⁷ Meme-ba ku jwub ira ku ye wu bur utob ku tē wu.

³⁸ Utob-ba ndembeb yang-yi uwae ira yi ti awu ri baa, aba na u nung-ba uwe-wu cwucwo be. Isim ayine a pu wu si ka tsi uwog ti a ku sang kuyae atang.