Wande Atom 2 - Kutsingken Ira Rimam ti Saen Kyag

Usir Ukwab Pentekos

¹ Ti usir Ukwab Pentekos ru ba sang, ande na Yesu ta kusog iki.

² Ama ti ritsen ahan a fxen ritum iki ti ru apupwen ba. Ritum wu pangma ana ufunn ti ku kae ti ribom. Awu ba munnkyi uwae kusog uwog ti a ku som atang.

³ Uwog wune a nung iken iki ti pangma ujaen urwa ru ba kutampwa-ba, ba kata kata, ba shag kyi risu unde titini uwae-ba atang.

⁴ Amaa, meme-ba kumumunn ti Kusung ti Saen Kyag utob-ba. Aba nwunn ku ri ira te unju tishe ti Kusung Rimam tatso ba.

⁵ Uwae Mbayawuda ti ta Urushelima kiye wune, ariki ruye uwae uten ti tsotso ru ba atang. Aba si ande ti ku putsa ira Rimam.

⁶ Kiye wu ti a fxen ritum wune, ande yang akwen ter ru ku ba. Aba sae ayib risu-ba fe, ikyaen ti, unde titini ku fxen ande na Yesu ku ri unju uten-wu.

⁷ Ira yi fur ba ayib, a ku rang atso baa, “Ande bane meme ti ku ri ira yine, aba si-ba ande ti Galili be a.

⁸ Iken yi ti nde ama titawe ati ku fxen ba a ku ri unju uten ti a mbae ti mbae atang si imi?

⁹ Aba ku ri unju-ti ande ti uten Partiya, ti uten Midiya, ti Elim, ti ande ti Mesopotamiya ti Bagadaza ti Yawudiya ti Kapadokiya, ti Pontus ti Asiya

¹⁰ ti aba ti ruye Firigiya, ti Pamfiliya ti uten ti Ejib, ti uten ti pakob uka Kirene ti si ikyab Libiya, ka kwar ti ande ti rikyen ti ru Roma ba,

¹¹ ti ande ti Arabiya ti Kirete. Ati Mbayawuda ti ande ti ba putsa ira Rimam tishe meme, ko aye patag ku fxen ba ku ri unju uten-wu. A ku ri ira risu iken tiyang tiyang ti Rimam ku nde.”

¹² Ayib fur ba. A ku rang atso baa, “Iken ayine ku tso baa imi?”

¹³ Ariki uwae-ba cwucwo skaen ikyaen u ri nghae baa, “Ujwab ye pu yi aba.”

Ira ti Bitrus Ri Usir Ukwab Pentekos

¹⁴ Ama Bitrus te ande ti atom rijwe asu kinjo ti tsitsi sunwunn ritsen. Bitrus ye ra afxenjwin tso u ri te ande ba baa, “Ande-m! Ani Mbayawuda ti ande ti ba byir Urushelima meme. Ni naa atong ti ni fxen ira ti ame u ri te ni!

¹⁵ Ande bane ngwa-ba iken shisháen pangma ti ani ku tang be. Ande ku shaen-ba shaen kiskinn fifae ahan be.

¹⁶ Ira yine si ira ti Jowel, unde ti ku ya iskin ira Rimam ri ti kucang baa,

¹⁷ ‘Kiye ti ricwunnkyi utense a kyang ku yaen, Ame u yaen Kusung-m si risu ande meme.’ Rimam ti ri. ‘Anyisu-ni ti urom te ti unda u ya iskin ira Rimam. Anyisu taen uwae-ni u nung iken ti Rimam u nda ba nung. Ande ti akyaen u sunn kurwa.

¹⁸ Kiye wu ama, ame u sa Kusung-m na apyi-m ti urom te ti unda meme.

¹⁹ Ame u nde iken ti ku tso kuko Rimam apupwen. Riben ama, ani u nung iken ti ku tso kuko na Rimam. Ani u nung anying, ti urwa, ti akyang.

²⁰ Usir u kafe utitang. Ushaen ama u byaen nwameme pangma anying. Ayine u nde titawe usir tiyang tiyang na Itsekuru u ba.

²¹ Usir wu, unde ti a jwam Itsekuru, awu u nwangru wu.’ ”

²² “Ani ande ti Isirela! Ni naa atong! Yesu unde ti Nazareti si Unde wu ti Rimam Tsab Tsi. Rimam tatso pu wu ani ayine uwae wande ti kuko ti ti ku fur ayib ti awu nda Yesu nde. Ani ti risu-ni nung pu ni ayine, ikyaen ti, iken yi meme nde kutampwa-ni ike.

²³ Rimam nung pu wu u sa tsi ti kucang akwen baa, kiye na ku ba ti a u sa Yesu fae si kujwo-ni. Ti kiye yi nde pu yi, ani Mbayawuda nda ande ti ku nde ikentitibi kwer Yesu kutuku ti cice.

²⁴ Ama Rimam kunn nwunn wu uwae kuskab u sa wu ruye uwog itikicwu, ikyaen ti, iticwu si-wu te kuko ti wu u ye su wu uwae kuskab be.

²⁵ Ni nung! Ira ti Ukwe Dawuda ri ti kucang akwen kumunn pu yi uwog Yesu baa, ‘Ame nung Itsekuru ku som te m ko kiye titini. Awu ku tsi yi kujwo rici-m, iken iki u nde-yi ame ira be.

²⁶ Ikyaen yine, ame ku tsen utob. Ame ku ri ira-m ti utob titsen. Ama ko ti a sa ijwe-m nji uwae kuskab, ame sa uwae tsi baa, ame na u nwunn kang uwae kuskab usir iki.

²⁷ Ikyaen ti, afu u ya m ta-fu uwog itikicwu be. Afu u cwe-fu ti ijwe upyi-fu ti tinyang u rwa mbub uwae kuskab be.

²⁸ Afu tatso pu fu ame fengo ti ku ru yi uwog unyang. Afu u nda m tsen utob u kam ashwu, ikyaen ti, afu te m ta te atso.’ ”

²⁹ Bitrus ru yi uwe ri baa, “Ameinja, ame u ri ira risu itse-ti Ukwe Dawuda te ni paenine. Awu cwu, a nji wu, kuskab uwog ti a nji wu atang ta te ti ike ba kwar yaka ne.

³⁰ Ukwe Dawuda si unde ti ku ya iskin ira Rimam. Awu nungye pu wu unju ti yer ti Rimam yer te wu fa te uben ti ben baa, Unde ti Rimam Tsab Tsi na u ruye uwae rishi Dawuda u nae ukwe pangma ti Dawuda ti risu-wu nae ukwe.

³¹ Né iken ti nde Dawuda ri ira risu Unde wu ti Rimam Tsab Tsi baa, a na u ya wu ta-ba uwae kuskab be, ijwe-wu ama u rwa mbub-wu be.

³² Ira Dawuda yine kumunn pu yi uwog Yesu, ikyaen ti, Rimam kunn shwur wu uwae kukskab. Meme-ti cwe baa, ayine na si kubenti.

³³ Itse-wu Rimam nda wu tso ka som kujwo rici-wu apupwen u nda wu Kusung ti Saen Kyag nee awu yer unju te wu kute. Iken ti ani ku nung, ku fxen yine, si kuko na Kusung ti Saen Kyag na Rimam ti a nda Yesu, awu ama tom si ba na ti.

³⁴ Ni nung! Ukwe Dawuda ti risu-wu tso-wu apupwen ti ijwe-wu pangma ti Yesu nde be. Si si awu Dawuda ti ri baa, ‘Itsekuru-ti Rimam ri te Itsekuru-m baa, “Som kujwo rici-m ike,

³⁵ se ti ame a ci pu m rika risu ande ti rika-fu.” ’

³⁶ Ikyaen na yine, meme ande ti Isirela ā nung nyinyang baa, Yesu wune ti ani sa kwer risu kutuku ti ta cice, si si awu ti Rimam Tsab Tsi u sa tsi risu ande meme.”

³⁷ Ti ande ti funn atang fxen pu ba ira Bitrus yine, uwae-ba ndembeb, anying yer ba utob. A ri te Bitrus ti atom ti tsitsi baa, “Ameinja, ati u nde rimang?”

³⁸ Bitrus ri te ba baa, “Ni ya ikentitibi-ni ta, ti kafe ba uwog Rimam. Ni ba nde batisma yi rinyi na Yesu Kristi, ti Rimam ā yata na ni ikentitibi-ni. Rimam u nda ni rinyangwae, Kusung-wu ti Saen Kyag.

³⁹ Ikyaen ti, Rimam yer unju te ni, ti anyisu-ni, te ande ti ta aka meme. Unju ti yer wu si ikyaen unde titini ti Itsekuru-ti Rimam a kunn wu ira ba uwog-wu.”

⁴⁰ Bitrus ri te ba ira ti ribom yang-yi akwen ti wu na shir utob-ba ba yi uwog Yesu. Awu ri baa, aba na ye ra ruye risu-ba uwae rinae na Rimam ti na ku ba risu ande ti ku nde ikentitibi.

⁴¹ Ande iki cwe ira-wu ayi, a nde na ba batisma. Usir wu ande kumbub ita ru kubenti, a sang fa ande na Yesu.

⁴² Ko kiye titini ande na Yesu sa utob-ba tsi uwae iken ti ande ti atom ku kwen na ba, u ku funn atso ko kiye titini. Aba ku ci wuci tetso, ku jwam Rimam tetso. Meme iken yine a nde yi uwae ure.

Itisom na Ande na Yesu

⁴³ Kiye ti ande meme nung iken ti ku fe ayib ti iken ti ku tso kuko na Rimam ti ande ti atom na Yesu nde uwe-ba, ikyenricwu ye ba.

⁴⁴ Meme ande na Yesu ku som kob tetso. A ku ndeya atso ti iken ti aba site yi.

⁴⁵ Aba nung ti a pu rifunn-ba ti usu-ba jaeb ci. A kan aser yi pang ti rikaen ti unde titini site yi.

⁴⁶ Ti usirsir a ku funn atso kusog Rimam. A ku ci wuci te atso uwae kununn-ba ti utob ti tsen ti risu ti nae riben te atso.

⁴⁷ A ku teb rinyi Rimam. Ama a ku tu risu ti tinyang uwog ande meme. Yaka ti ucwe Itsekuru ku nwangru ande ti tishe ku sa ba sang fa ande na Yesu.