Wande Atom 18 - Kutsingken Ira Rimam ti Saen Kyag

Bulus Ru ka Uten ti Korinti

¹ Isim ayine Bulus nwunn u ya uka ti Atena ta u ru yi uka ti Korinti.

² Atang awu ka tu urae Mbayawuda iki ti rinyi-wu si Akila. A mbae wu uten ti Pontus. Uwae kiye wu, awu Akila ti uwa-wu Birskila ru uten ti Itali ba, ikyaen ti, Ukwe Kalodiyu nda unju baa, a na rwae Mbayawuda meme ruye uwae uka ti Roma. Bulus ru ti wu ka nung ba uwae kununn-ba.

³ Awu ka som te ba ku nde wande te ba, ikyaen ti, itso wande-ba ti ana-wu si iken kinjo. Aba si ande ti ku kob apwa kufug.

⁴ Ko usir ikyinn titini Bulus ku myae ira te ande uwae kusog Rimam Mbayawuda, ku kwab ti wu shir utob Mbayawuda ti Mbahelene ba uwog Yesu.

⁵ Isim ti Sila ti Timoti ka ru uten ti Makedoniya ba, Bulus sa utob-wu meme tsi uwae ira Rimam ti ri, ku ri ira te Mbayawuda ti ribom-wu baa, Yesu ti na si Unde wu ti Rimam na Tsab Tsi.

⁶ Amaa, aba pyir-ba ira-wu u ku ri ira titibi risu-wu. Ikyaen yine, Bulus fwer isa afxen-wu si fa ba ti atang u ri te ba baa, “Ani Mbayawuda, anying-ni ā tso ti risu-ni! Ira-m iki fa-yi atang cwucwo be. Tsi kunn yaka ru fe uwe, ame u ru ka u ri ira Rimam uwog ande ti si-ba Mbayawuda be.”

⁷ Awu ya ba ta u nwunn ru ka som te urae Helene iki ti rinyi-wu si Titus Yusitu. Awu unde wune si unde ti ku fen Rimam. Kununn-wu ku fifer ti kusog Rimam Mbayawuda.

⁸ Ikyaen ira Rimam ti Bulus ku ri, Kirisipu unde ti uwe kusog Rimam atang, ti ande ti kununn-wu meme, ru kubenti uwog Itsekuru-ti Yesu. Uwae ande ti ta uka na Korinti, ariki kyangte ira yi u ru kubenti, a nde na ba batisma ama.

⁹ Utitang iki, Yesu ri te Bulus uwae kurwa baa, “Kyen-fu ikyenricwu be, fxen ira-m ti ti ri te ande.

¹⁰ Ame u te fu ta te atso. Unde u nde-wu afu iken iki uwae uka ike be. Ikyaen ti, ame site ande-m yang-ba uwae uka ike.”

¹¹ Ikyaen yine, Bulus som atang fob kusang kinjo ti ripye u ku kwen tatso ande ira Rimam.

¹² Kiye yi ti ande ti Roma nae Galiyo gomna na uten ti Akaya, Mbayawuda byir atso u ye Bulus u pu wu ru kusog rikwen.

¹³ Aba ri baa, “Unde wune ku kwab ti wu shir ande putsa Rimam uwae fengo ti si-yi icwe be.”

¹⁴ Ti Bulus mbub unju ta ti wu ri ira, Galiyo sa ra unju tso u ri te Mbayawuda baa, “Ani Mbayawuda, á baa, unde wune na raen ira titibi iki, ko á baa, awu na nyaetsa icwe na uten, ame ú ye utob te ni u fxen ira-ni ayi.

¹⁵ Amaa, ti ayi si ira ishaen ti shaen, ti rinyi iken, ti ira icwe uten-ni, ni nung-ni ira yine ti ajwo-ni. Ame u pwen-m rikwen risu itso ira yine be!”

¹⁶ Awu rwae ba ruye kusog rikwen atang.

¹⁷ Isim ayine, meme-ba ye Sositene, unde ti uwe kusog Rimam na Mbayawuda, u byinn wu ti ufu kusog rikwen atang. Amaa, Galiyo sae ru yi.

Bulus Kafe Ba Sang Antiyok

¹⁸ Isim iken ayine, Bulus som uwae uka ti Korinti u nde usir yang-yi te ande na Yesu. Isim yine awu ti Akila ti Birskila nwunn u sang kuyae ti ku ru yi uten ti Siriya. Ti aba ka sang Kenkireya, Bulus pwen risu-wu ti awu tatso baa, awu na kumunn pu wu unju ti yer iki ti awu yer ti kucang. Isim yine, aba nwunn u sang kuyae ku ru uten ti Siriya.

¹⁹ Ti aba ka sang uka ti Afisa, Bulus ya Akila ti Birskila ta. Awu ru kusog Rimam na Mbayawuda ti ta atang u ka myae ira te ba.

²⁰ Aba jwam wu baa, awu na som te ba usir ifaen, amaa awu cwe-wu be.

²¹ Amaa, ti awu nwunn ka sang kuyae ku ru uten ti Afisa, awu ri te ba baa, “Asiti Rimam a cwe, ame u kafe ba nung ni.”

²² Ti awu si kuyae yi uka ti Kaisariya, awu nwunn ru fe Urushelima ti wu ka kunnji ande na Yesu ti ta atang. Isim ayine, awu nwunn u si yi Antiyok.

²³ Isim ti awu som atang fob usir kpang, awu nwunn ru ikyaeb uten ti Galatiya ti Firigiya, ku ri bom meme ande na Yesu utob uwae meme uten ti ta atang.

²⁴ Isim kiye iki, urae Mbayawuda iki ti a mbae wu uten ti Alezandariya ru ba Afisa. Rinyi-wu baa Apolo. Awu si unde ti ben ira unju timambe u nung ira ti ta uwae Kutsingken Rimam si-yi ti ti ri be.

²⁵ Ti kucang-yi a kwen na wu iken fengo Itsekuru-ti. Awu ku kwen na ande ira risu Yesu yi fengo ti pang atang, ti utob-wu meme. Awu nung-wu ira iki risu batisma be, nyang ana Yohana ti awu nung amam.

²⁶ Uwae kusog Rimam na Mbayawuda ti ta Afisa atang, awu nwunn ku ri ira ti ribom-wu, ku kyen-wu ikyenricwu be. Ti Birskila ti Akila ku fxen ira-wu, a ye pu wu ru kununn-ba u ka tatso nyang wu ira risu Yesu ko fufa.

²⁷ Kiye iki, Apolo ku sha ti wu ru ikyaeb uten ti Akaya. Ameinja-ti ti ta Afisa cwe u bae kutsingken ru ka na ameinja-ba ti ta Akaya baa, aba na kyangte wu nyinyang. Isim ti awu ka sang atang, awu ndeya ande ti Rimam nung risi-ba, ama aba ru uwae kinjo.

²⁸ Ikyaen ti, awu num-wu num ti ishaen ti shaen te Mbayawuda uwe ande be. Awu ku tatso ba baa, Yesu na si Unde wu ti Rimam Tsab Tsi nee a bae uwae Kutsingken Rimam.