Wande Atom 16 - Kutsingken Ira Rimam ti Saen Kyag

Timoti Nwunn Putsa Bulus ti Sila

¹ Bulus kyang kyakyang ba sang uten ti Derbe ti Lisitira. Unde na Yesu iki ta atang ti rinyi-wu si Timoti. Iya-wu ku ru kubenti ama, awu si unda Mbayawuda. Itse-wu si urae Helene.

² Meme ande na Yesu ti ta uten ti Lisitira ti Ikoniyum ku ri ira ti tinyang risu Timoti.

³ Bulus sha ti wu na u pu Timoti na putsa ijwe-wu, amaa, Mbayawuda ti ta uten atang nung pu ba baa, itse Timoti wune na ku putsa-wu icwe na Mbayawuda be. Ikyaen na yine, Bulus tsen na wu kutxin.

⁴ Ti aba nwunn ya uwog wu ta, a kyang ru tsa uwae uten yang-yi ti ta atang. A ku ri te ande Yesu icwe ti ande ti atom ti ande ndufu ti ta Urushelima sa tsi ba. A ku ri te ba baa, aba na nae risu riben te icwe yi.

⁵ Ikyaen yine, ande na Yesu tsi ti ribom fengo na Rimam skeb pu ba ti kute. Ti usir usir ande ku ba sang fa ba.

Bulus ti Arwan-wu Ru ka Turowas

⁶ A kyang kyang ba ru tsa uten ti Firigiya ti Galatiya. Kusung ti Saen Kyag cwe na-wu aba ti a na ri ira Rimam te ande ti uten ti Asiya be.

⁷ Kiye ti aba ka fob ice na ikyaeb uten ti Misiya, a kwab ti a sang ikyaeb uten ti Bitiniya, ama Kusung Yesu cwe na-wu aba be.

⁸ Ikyaen yine, a ru yinn ru tsa Misiya u si ba uka ti Turowas.

⁹ Utitang usir wu, Bulus sunn kurwa. Uwae kurwa wu awu nung unde ti uten ti Makedoniya tsi ku jwam wu baa, “Ru ba ndeya ti Makedoniya ike!”

¹⁰ Isim ti Bulus sunn kurwa wune, ati nde fengo ti ti na ru yi Makedoniya, ikyaen ti, ati kab ye baa, Rimam ti kunn ti ira ti ti na ka ri Ira-wu ti Tinyang te ba.

Lidiya Ru Kubenti Uwog Yesu

¹¹ Ati nwunn ya Turowas ta u sang kuyae ru fife yi uten ti Samotarke. Ucwefam-yi ati ba sang uten ti Neyapoli.

¹² Aba kyang te afxen ka sang fe uwae uka ti Filipi ti si uka ti ko skeb meme uwae uten Makedoniya. Mbaroma ti ta atang ti kucang. Ati som uwae uka atang fob usir yang-yi.

¹³ Usir ikyinn ati nwunn ruye uwae uka atang u ru unju unyim iki uwog ti ati tang baa, Mbayawuda na ku byir kob atang ti a u fen Rimam. Ati som atang u ri ira te anda ti funn atang.

¹⁴ Kinjo uwae-ba ti fxen ti si Lidiya, unda iki ti ruye uka ti Tiyatira. Awu si unda ti ku jabci te atupwa. Awu si unda ti ku fen Rimam. Itsekuru mbubta riyaen utob-wu ti wu naa atong ira yi ti Bulus ku ri.

¹⁵ A nde na wu te ande ti kununn-wu batisma. Tiri awu yae ti baa, “Ani ba ti ni ba sang uwae kununn-m asiti ani a cwe pu ni baa, ame na si unde ti ku ru kubenti.” Awu jwam ti jwam baa, ati na ka kang. Ati ru ka.

A Pu Bulus ti Sila Sang Pursuna

¹⁶ Usir iki ti ati nwunn u kyang ku ru uwog ti a ku fen Rimam atang, ati tu mbawandab iki ti site kusung titibi risu-wu. Ande ti mbawandab wu si upyi-ba ku tu aser yang-yi akwen uwog-wu, ikyaen ti, kusung titibi wu ku nda wu ku caen iken ti u nde uwe.

¹⁷ Awu nwunn u putsa ti ti Bulus. Awu ku nyae ira putsa ti baa, “Ande bane si apyi na Rimam ti ko skeb meme! A ku ta tso fengo itinwangru!”

¹⁸ Awu nde iken yi fob usir yang-yi, se usir iki ti Bulus num pu wu ti ira yine. Awu kafe uwe u ri te kusung titibi wu ti ta uwae mbawandab wu baa, “Ame ku ri te fu uwae rinyi Yesu Kristi, ruye uwae mbawandab wune!” Ama kusung titibi wu ruye.

¹⁹ Ti ande ti risu mbawandab wu nungye baa, fengo-ba ti a ku tu aser ta-yi cwucwo be, a ye Bulus ti Sila u fam ba ru rishen uwog ti ande ti uwe uten ta atang.

²⁰ A pu ba ba uwe ande ti ku pwen rikwen, ba ri te ba baa, “Ande bane si Mbayawuda, a ku sha ira unju uwae uka-ti ike.

²¹ A ku kwen na ande itso iken ti si-yi iken ti ta uwae icwe-ti be. Ati si ande ti Roma, ati putsa tu-ti itso iken yi ti a ku kwen na ande be.”

²² Ande ti tsitsi ti funn atang ku rimbeb Bulus ti Sila ama. Ande ti uwe-ba shi yaen pu atupwa Bulus ti Sila, u nda ba a byinn ba ipug.

²³ Isim ti a byinn nwunn pu ba Bulus ti Sila kimbab, a ye pu ba jwunn sang uwae pursuna u ri te unde ti ku nungkyi pursuna baa, awu na nungkyi ba nyinyang.

²⁴ Unde wu, ti awu fxen ira yine, awu pu ba sang fife yi uwae kusog ti uwae u ka kwer ba uti.

²⁵ Ukatitang, Bulus ti Sila ku jwam Rimam ku yang akyang ku teb rinyi Rimam, ama ariki ti a pu ba sang pursuna atang ku fxen ba.

²⁶ Ti a u nunung, riben kyi tan tan. Ayine nda imbyi pursuna wu kyi ijwe. Ti ritsen meme ufu kusog ti ta atang mbubta. Iken ti a ku yir bom ande atang meme nwaen ru.

²⁷ Unde wu ti ku nungkyi pursuna pxim shwu, u nung baa, meme ufu pursuna na mbub tita. Awu tang baa, meme ande bane na ter ru pu ba. Ikyaen yine awu nwaen ra kisim-wu tso u ta unju ititerwen ijwe-wu.

²⁸ Amaa Bulus nyae ira u ri te wu baa, “Ten-fu ijwe-fu ifu be. Meme-ti ta ike!”

²⁹ Unde wu kunn ira baa, a na sa urwa na ba u ter sang u ka jwunn ikyig uwe Bulus ti Sila, ijwe-wu ku fufwer.

³⁰ Tiri, awu pu ba ruye, ku rang ba baa, “Ande ti uwe-m! Ame u nde rimang tawe ame u tu itinwangru uwae ikentitibi-m?”

³¹ Bulus ti Sila ri te wu baa, “Ru kubenti uwog Itsekuru-ti Yesu, afu u tu itinwangru, afu ti kununn-fu.”

³² Ama aba tsag ira Rimam te wu ti ande kununn-wu meme.

³³ Awu ndembeb-wu kiye be, ti uwae utitang usir wu, awu jwo na ba ribang-ba. Ama awu ti kununn-wu meme a nde na ba batisma ti kipaen kinjo.

³⁴ Ama unde wu ye pu Bulus ti Sila ru kununn-wu u ka pu na ba wuci. Awu ti kununn-wu tsen utob, ikyaen ti, tine a ku ru kubenti uwog Yesu.

³⁵ Ucwefam-yi, ande ti ku pwen rikwén tom ikyir ukwe iki ba uwog unde ti ku nungkyi pursuna ri baa, a na ya Bulus ti Sila na ta ti a na ru.

³⁶ Ikyaen yine, unde wu ti ku nungkyi pursuna ri te Bulus baa, “Ande ti uwe tom atom baa, ame na ya fu ti Sila na ta. Ni ruye-ni tine, ti ni ru-ni iken-ni.”

³⁷ Amaa, Bulus ri baa, “A tu-ba ati te riraen iki be, amaa, a byinn ti iken ayib ande u pu ti sang pursuna, ko ti ati site kati na Ukwe. Tine, a ku sha ti a u rwae ti ti kitam. Iyee! Ayine u nde-yi be. Aba ā ba ike ti ajwo-ba, ti a pu ti ruye.”

³⁸ Itaen ti ku kyir ukwe ka ri te ande ti uwe ara. Kiye ti aba fxen baa, Bulus ti Sila na site kati na Ukwe, ikyenricwu ye ba.

³⁹ A ru ba jwam ba baa, a na ndembeb-ba utob be, a na raen pu ba ti iken yi ti a nde. Tiri aba pu ba ruye uwae pursuna u ri te ba baa, a na ruye uwae uka atang.

⁴⁰ Isim ti a ruye uwae pursuna, aba ru ba kununn Lidiya. Aba tu ameinja-ba ande na Yesu. A ri bom ba ijwe u nwunn ru iken-ba.