Wande Atom 15 - Kutsingken Ira Rimam ti Saen Kyag

Itifunn ti a Funn Urushelima

¹ Ande iki ru Yawudiya si ba Antiyok. A nwunn ku kwen na ande na Yesu baa, “Ani u tu-ni itinwangru be, se ti a tsen na pu ba ani kutxin pangma ti a bae uwae Icwe Musa itawe.”

² Amaa Bulus ti Barnaba shaen ishaen ti byagkwan te ba. Ikyaen yine a tsab pu Bulus ti Barnaba ti ariki ti a na tso yi Urushelima ti a ka u myae ira yi te atom ti tsitsi ti ande ndufu.

³ Isim ti kumbub ande na Yesu funn ti a na tom ba ru, aba nwunn kyang ru tsa uten ti Fonikiya ti Samariya. Ti a ru tsa uwae uten yine a ku ri te ande baa, ande ti si-ba Mbayawuda be na ku ru kubenti uwog Yesu ama. Meme ande na Yesu ti fxen ira yine tsen utob timambe.

⁴ Ti aba sang Urushelima ande ti atom na Yesu te ande ndufu, te ande na Yesu ti tsitsi kyangte ba. Bulus ti Barnaba tsag te ba iken meme ti Rimam nde te ba.

⁵ Amaa, ariki uwae ande na Yesu ti ta uwae kumbub na Farisi, nwunn ku shaen-ba baa, “Ande ti ru uwae kinjo uwog Yesu ti si-ba Mbayawuda be, a na tsen kang ba kutxin. Cwucwo a na putsa kang Icwe ti Rimam nda Musa.”

⁶ Ande ti atom ti ande ndufu funn atso ti a tang ira risu ira yine.

⁷ Isim ti a shaen ishaen yang-yi akwen, Bitrus fa sunwunn u ri baa, “Ameinja-m, ani nung pu ni baa, ti kucang akwen, Rimam tsab m ruye uwae-ni ti ame na ri ira-wu ti tinyang te ande ti si-ba Mbayawuda be, ikyaen ti a na fxen ira-wu u ru kubenti.

⁸ Rimam nung pu wu utob ande meme. Awu sa Kusung-wu ti Saen Kyag na ande ti si-ba Mbayawuda be pangma ti awu nda ti, ikyaen ti wu na tso ba baa, awu na kyangte pu wu aba.

⁹ Rimam tatso ti baa, ati na te ba na pang atso. Awu jwosaen utob-ba ama ikyaen ti, aba ru kubenti.

¹⁰ Nung! Ani ku myae Rimam myae. Icwe Musa si usu ti rurob ti ati Mbayawuda ti risu-ti su tu-ti be. Abitse-ti ama su tu-ba ayi be. Ani u nde rimang sa usu ti rurob wune nae tsa ande ti putsa Yesu ne.

¹¹ Iyee! Ati ru kubenti baa, Rimam na u nwangru ti ikyaen tinyang na Yesu Kristi. Ayi si si fengo ti aba ama u nwangru.”

¹² Meme ande bwe tag skirr ti a fxen Barnaba ti Bulus ku ri te ba meme iken ti ku fur ayib ti iken ti ku nda ande kyen ricwu, nee Rimam nda ba a nde uwog ande ti si-ba Mbayawuda be.

¹³ Kiye ti a ri mam ira-ba, Yakubu sa ra unju tso u ri baa, “Ni naa atong uwog-m ike ameinja.

¹⁴ Siman Bitrus tsag te pu wu ati baa, ti kucang Rimam sae ayibrisi-wu ba uwog ande ti si-ba Mbayawuda be, u tsab pu wu ande uwae-ba ti a u si ana-wu.

¹⁵ Ayine si sí ira ti ande ti ku ya iskin ira Rimam bae uwae kutsingken ti kute baa,

¹⁶ ‘Isim yine ame u kafe ru ba. Ame u mbye kyi kuru Dawuda ti mbub si. Ame u kyae nyang uwog ti ndembeb u mbye nyang wu cwucwo.

¹⁷ Ande ti utense ti tsitsi u sha me Rimam. Ande meme ti a ku kunn ba ti rinyi-m, ande ti utense ti si-ba Mbayawuda be.

¹⁸ Itsekuru-ni Rimam ti ri ira yine. Ame tatso pu m ani ira yine ti kucang akwen.’

¹⁹ “Ame ku tang baa, ande bane ti si-ba Mbayawuda be, i nyang-yi ti ti nda ba rikaen be.

²⁰ Ayi nyang skeb ti ti bae na ba kutsingken, ti ti ri te ba ti a na ci-ba wuci ti a fen apxin te yi be, a na nae-ba iyag be, a na kub nyang ibye ti a yerwuwen, a na ngwa-ba anying be.

²¹ Ikyaen ti ra, ti kucang akwen, a ku fxen ira risu iken yine uwae asog Rimam na Mbayawuda ko usir ikyinn titini, ko aka meme.”

Kutsingken ti a Tom Ru Uwog Ande ti Si-ba Mbayawuda be

²² Tiri, atom Yesu ti ande ndufu te ande na Yesu ti tsitsi meme ku tang baa, aba na u tom ande iki uwae-ba putsa Bulus ti Barnaba kafe ru Antiyok. Aba tsab Yawuda ti a ku kunn wu baa Barsaba, ti Sila, ande ifaen ti site kuko uwe ande na Yesu ti ta atang.

²³ A tom ba ru ti kutsingken. Uwae kutsingken wu a bae baa: “Ati atom Yesu ti ande ndufu na Urushelima ku kunnji ni ira meme, ani ameinja-ti ti ta Antiyok ti Siriya ti Kilikiya ti si-ni Mbayawuda be.”

²⁴ “Ati fxen baa, ande-ti iki na ba atang, u ba ye ni kyi kab ti ira ti a ku kwen na ni. I si-yi ati ti ri te ba né a nde iken yine be. A nde iken yine, u rang-ba ati rang be.

²⁵ Ikyaen yine, ati kunn atso byir. Meme-ti cwe pu ti baa, ati na u tom na ni ariki uwae-ti, aba u putsa arwan-ti Bulus ti Barnaba ru.

²⁶ Ande bane sa unyang-ba tika pu ba ikyaen wande na Itsekuru-ti Yesu Kristi.

²⁷ Ati tom ku na ni Yawuda ti Sila, aba ti u ri tatso ni iken ti ati bae uwae kutsingken.

²⁸ Kusung Rimam tatso ti baa, Ayi nyang-yi ti ati na sa usu iki nae tsa ni be, se icwe yi ti si tiyang uwae-yi. Ati ama cwe baa, ira yi pang atang.

²⁹ Icwe yi ta ri. Ni ci-ni wuci ti a sa fen apxin te yi be. Ni ngwa-ni anying ibye be. Ni kub nyáng ibye ti a yerwuwen. Ni nae-ni ajwo ijib be. Ani a putsa icwe yine, ayi u nyang timambe. “Ni som nyinyang.”

³⁰ Isim yine, a tom ba ru. Ti a ka sang Antiyok, a kunn byir meme ande na Yesu u nda ba kutsingken wu.

³¹ Kiye ti a nung putsa yi, utob-ba tsen ti ira ti a ri bom ijwe ti a bae uwae atang.

³² Yawuda ti Sila ti risu-ba si ande ti ku ya iskin ira Rimam. A ri ira yang akwen te ande na Yesu, ku nda ba ribom utob.

³³ Isim kiye iki, ande na Yesu tom pu Yawuda ti Sila kafe ba ti uwog ti a tom ba ru atang baa, a na kunnji ba ira nyinyang.

³⁵ Bulus ti Barnaba som Antiyok nde asir pang. Aba te ariki yang akwen ku kwen na ande ira tinyang na Itsekuru-ti.

Bulus ti Barnaba Kata

³⁶ Isim usir kpang, Bulus ri te Barnaba baa, “Ru ba ti ti ka pu ayib sae ameinja-ti ti ta ko aka uwog ti ati ri te ba ira Itsekuru-ti Rimam atang. Ti ka nung ba baa, aba ku som rimang bara.”

³⁷ Barnaba ku sha ti wu na pu Yohana Markus putsa ijwe-wu,

³⁸ amaa Bulus tang baa, ayi na nyang-yi be ikyaen ti, ti kucang-yi Markus wu teya ba ta Pamfiliya, u ndeya-wu aba wande ru ka furu be.

³⁹ A shaen ishaen te atso timambe, ama ayi nda ba kata atso. Barnaba ye pu Markus sang kuyae, a ru uten ti Kuburus,

⁴⁰ Bulus ama tsab ra Sila. Ama isim ti ande na Yesu jwam tinyang Rimam si ba risu-ba, aba sa nwunn ru.

⁴¹ Bulus nwunn ru tsa Siriya ti Kilikiya u ri bom ijwe na ande na Yesu ti ta atang.