Wande Atom 11 - Kutsingken Ira Rimam ti Saen Kyag

Ande na Yesu ti ta Urushelima Fxen Iken ti Nde Kaisariya

¹ Atom ti ande Yesu ti tsitsi meme ti ta uten ti Yawudiya fxen baa, ande ti si-ba Mbayawuda be na kyangte pu ba ira Rimam ama.

² Kiye ti Bitrus tso ba Urushelima, ariki uwae-ba sang shaen ishaen te wu. Aba si Mbayawuda ti tsi ting ting risu icwe abitse-ba.

³ Aba byib Bitrus baa, “Afu kyang rimang sang rikyen kununn ande ti tsen-ba kutxin be, ku ci iken te ba?”

⁴ Ama Bitrus ri te ba iken ti nde u bag ti imbyi-yi baa,

⁵ “M ku jwam Rimam uwae uka ti Yopa, né Rimam nda m ame nung iken iki. Kikin si apupwen ku ba risu-m pangma kujwo atupwa ti a yir unju-wu yir.

⁶ Kiye ti ame sae ayib nyinyang uwae-wu, ame nung itso ibye ti afxen inje ti akaense ti ibye ti ku pang ti rishwu ti anung.

⁷ Ame fxen afxenjwin ku ri te m baa, ‘Bitrus, sunwunn! Wen ti kub!’

⁸ Ama ame ri baa, ‘Ame u nde tu-m be, Itsekuru. Wuci ti ajib ko iken ti ande ku tang baa, yi na nyang-yi ti ci be sang ji-wu unju-m khika be.’

⁹ Ame fxen kyi ujwin si apupwen ba ku ri baa, ‘Sae-fu iken ti Rimam kunn baa iken ti na sisaen ti yi na si iken ti ajib be.’

¹⁰ A ri ira yine atsepu ita. Ti ricwunnkyi-yi, a shir ra iken yi kafe tso ti yi apupwen.

¹¹ “Dede kiye yi ti a shir ra iken yi kafe ku tso, ande ita ti a tom ba ru Kaisariya ba uwog-m ba ku sang kununn uwog ti ame ta atang.

¹² Kusung ti Saen Kyag ri te m baa, ame na putsa ba na ru, ame na kab-m uwae be. Ande itsongnjo bane ti si ameinja-ti putsa m ru Kaisariya ama. Meme-ti nwunn, ru ka sang Kaisariya u ka kununn unde iki ti rinyi-wu si Korneliyu.

¹³ “Kiye ti ati ba sang kununn unde wu, awu tsag te ti baa, awu na nung atom Rimam ti apupwen ba tsi uwae kusog-wu, u ri te wu ti wu na tom ande ka Yopa ti a na ka kunn na wu unde iki ti rinyi-wu na si Siman Bitrus.

¹⁴ Siman Bitrus wune na u tatso wu fengo ti awu ti ande ti kununn-wu meme na u nwangru uwae ikentitibi-ba.

¹⁵ “Kiye ti ame ku ri ira te ba Kusung Rimam si ba risu-ba, pangma ti awu si ba risu-ti ti kucang.

¹⁶ Tiri, ame tangsom ira ti Itsekuru-ti Yesu ri baa, ‘Yohana nde na ande batisma te ambyi, amaa a u nde na ni batisma ti Kusung ti Saen Kyag.’

¹⁷ Ti Rimam nda ba Kusung-wu ne ti rinyangwae pangma ti awu nda ti kiye ti ati ru kubenti uwog Itsekuru-ti Yesu Kristi, ame si aye ti m u byang kyi Rimam?”

¹⁸ Ira Bitrus sang utob-ba, a ya ishaen ti shaen ta. Aba ku teb rinyi Rimam, a ku ri baa, “Rimam nda pu wu ande ti si-ba Mbayawuda be ama fengo ti a ya ikentitibi-ba ta u ba tu unyang ti tsi kukunn!”

Ande na Yesu ti ta Antiyok

¹⁹ Rikaen ti bag ku ba kiye ti a wen Stefana nda ande na Yesu ter shag tag. Ariki ter ru Fonikiya ti Kuburus ti Antiyok, ku sa ira Rimam ri ku kyang, amaa, aba ku ri te ko Mbayawuda amam.

²⁰ Amaa, ariki uwae-ba ti ruye uwae Kuburus ti Kirene ru ka Antiyok u ka ri ira te ande ti si-ba Mbayawuda be ama, ku ri te ba Ira Tinyang risu Itsekuru-ti Yesu.

²¹ Kuko Rimam ta te ba. Ande yang-ba nwunn ba ru kubenti uwog Yesu u kafe ba uwog Rimam.

²² Ande na Yesu ti Urushelima fxen iken ti nde uwae uka ti Antiyok. Ikyaen yine a tom ra Barnaba ru atang.

²³ Ti awu sa ka sang atang, awu nung iken ti tinyang ti Rimam nde te ande ti atang u tsen utob. Awu ri te ba baa, aba na ru kubenti ti uwae-ba kinjo ti utob-ba meme uwog Yesu ru fife yi uwe.

²⁴ Barnaba si unde ti tinyang u munn ti Kusung ti Saen Kyag utob-wu. Awu ru kubenti uwog Yesu ti utob-wu kinjo. Awu shir ande yang-ba akwen ba sang fa ande na Itsekuru-ti Yesu.

²⁵ Isim yine tiri, Barnaba nwunn Antiyok ru Tarsus u ku sha rifab Sawulu.

²⁶ Ti awu ka tu wu, awu pu wu ba Antiyok. Uwae kusang kinjo, aba som te ande na Yesu ti Antiyok, ku kwen na ande yang-ba ira Rimam. I si uwae uten ti Antiyok né a bag ku kunn ande na Yesu baa, ande ti Kristi.

²⁷ Kiye wune ande iki ti ku ya iskin ira Rimam nwunn Urushelima ba Antiyok.

²⁸ Kinjo uwae-ba, rinyi-wu si Agabus. Ti uwae kuko na Kusung ti Saen Kyag awu nwunn u ri baa, “Uwe ike, rimenn tiyang u pu utense.” Ara kuben, rimenn pu uten kiye ti Kalodiyu nae ukwe-wu.

²⁹ Ikyaen na yine ande na Yesu ti ta uten ti ise ri baa, ayi na u nyang skeb ti a na ndeya ameinja-ba ande na Yesu ti ta uten ti Yawudiya. Unde titini uwae-ba na u tom iken ti awu na ndetu.

³⁰ A nde iken yine ara. A pu iken yi na Barnaba ti Sawulu ti a na pu ru ka na ande ndufu kumbub ande na Yesu ti ta Urushelima.