Wande Atom 10 - Kutsingken Ira Rimam ti Saen Kyag

Bitrus ti Korneliyu

¹ Unde iki ta uka na Kaisariya, rinyi-wu si Korneliyu. Awu si unde ti uwe kumbub akyirten ti a ku kunn ba baa, Kumbub Itali. Uwae kumbub wu a fob mae itsong.

² Awu unde wune si unde ti ku kyen Rimam, awu ti kununn-wu meme. Awu nde iken yang-yi ti awu u ndeya ande ti rikaen. Awu ku jwam Rimam ko kiye titini.

³ Usirtaen iki, aser ita, awu nung atom Rimam ru ba tsi uwe-wu paenine ahan u kunn wu baa, “Korneliyu!”

⁴ Korneliyu sae atom wu piin ti ikyenricwu u ri baa, “Imi, Itse?” Atom-wu ri te wu baa, “Rimam kyangte pu wu ira ti jwub-fu ti wande ti tinyang ti afu nde. Awu ku tangsom te fu.

⁵ Tine, tom ande ru yi Yopa, ti a ka u kunn na fu unde iki ti rinyi-wu baa, Siman Bitrus.

⁶ Awu sang rikyen kununn Siman unde ti ku fwa apwa, ti nae fifer ti unju uyinn.”

⁷ Tiri atom wu kafe-wu. Korneliyu kunn ande ifaen ti ku nde wande uwog-wu, ti akyirten kinjo. Akyirten wune si unde ti ku kyen Rimam u fa uwae ande ti ku nungkyi Korneliyu.

⁸ Korneliyu ri te ba iken ti nde te wu meme u tom ra ba ru yi Yopa pangma ti atom wu ri te wu.

⁹ Ucwefam-yi aba nwunn ba ku fer Yopa ti usirtaen. Kiye wu ama Bitrus tso ru ka jwam Rimam risu kusog, uwog ti ande ku pu unyang atang.

¹⁰ Atang rimenn ye wu, awu ku sha ti wu u ci wuci. Kiye ti a ku nde wuci ajwo, awu sunn kurwa.

¹¹ Uwae kurwa yi, awu nung apupwen mbub tita, iken iki si ku ba pangma kujwo kutupwa tiyang. Unju-wu si inje, a yir wu yir ti uji u sa kyen si ku ba uwog ti awu ta atang.

¹² Uwae iken wu, awu nung ibye ti itsotso, ti iken ti ku pang ti rishwu, ti inung.

¹³ Awu fxen afxenjwin ri te wu baa, “Bitrus, sunwunn, wen ti kub.”

¹⁴ Ama Bitrus ri baa, “Ame u nde tu-m be, Itsekuru. Ame kub ji-m iken ti ku txi iyib ne be, ko iken ti ande ku tang baa, ayi na nyang-yi ti kub be.”

¹⁵ Awu fxen kyi afxenjwin cwucwo ku ri baa, “Iken ti Rimam ri baa, ayi na sisaen, kunn-fu ayi baa, iken ti ku txi iyib be.”

¹⁶ A ri ira yi fob atsepu ita, itawe a ye pu iken yi kafe tso yi apupwen.

¹⁷ Kiye ti Bitrus ku kab imbyi kurwa yi ti awu nung ne, ande ba ti Korneliyu tom, rang kununn Siman, sa sa sa ba fob pu ba kununn atang. Aba tsi utabshi.

¹⁸ A kunn ira u rang baa, “Siman Bitrus, unde ti sang rikyen ike, ta atang a?”

¹⁹ Uwog wune ti Bitrus ku kwab ti wu nung imbyi kurwa-wu ayi, Kusung Rimam ri te wu baa, “Naa atong! Ande ita ta ike ti ku sha rifab-fu.

²⁰ Sunwunn ti si ka putsa ba ru. Kab-fu ira be, ikyaen ti, ame ti tom ba ru ba.”

²¹ Ikyaen yine Bitrus si ka tu ande ba u ri te ba baa, “Ame ti si unde wu ti ani ku sha. Ani ba ku sha imi?”

²² A ri te wu baa, “Unde ti uwe-ti Korneliyu tom ti ba uwog-fu. Awu si unde ti tinyang u ku fen Rimam. Ande-fu Mbayawuda meme nung pu ba baa, awu na si unde ti ku fen Rimam. Atom Rimam iki ri te wu baa, awu na yae fu ru ka kununn-wu ikyaen ti wu na fxen ira ti afu na u ri te wu.”

²³ Bitrus pu ba sang, a nae atang usir wu. Ucwefam-yi, awu nwunn u putsa ba. Ande na Yesu iki ti ta uka na Yopa putsa ba ama.

²⁴ Usir ti apu-ifaen aba sang Kaisariya. Korneliyu ti ande ti imbyi-wu ti arwan-wu ti awu yae ba ba som ku ji wu.

²⁵ Ti Bitrus baa, awu na u sang ba ahan, Korneliyu nwunn ba ku riben uwe-wu.

²⁶ Bitrus ye wu nwunn ritsen baa, “Ame ti risu-m si si unde ama pangma fu.”

²⁷ Aba tsag rikaen tetso ru ba sang kusog wu. Ti awu sang ba, awu tu ande ko timambe a funn pu ba atang.

²⁸ Bitrus ri te ba baa, “Ani nung pu ni baa, uwae icwe-ti Mbayawuda, a bae baa, urae Mbayawuda na u pxib-wu risu te ande ti ise be, ama awu na u kyang ka-wu kununn-ba be. Amaa Rimam tatso pu wu ame baa, ame na tang-m baa, unde iki na site ajib ko awu na ku txi iyib be.

²⁹ Nee iken ti nde nee ame ru ba, ame kab-m uwae be kiye ti afu tom atom ka. Tine, ame ku rang fu, Korneliyu, ikyaen imi ti afu kunn me ira ru ba?”

³⁰ Korneliyu ri baa, “Usir inje ti wur ru ru pangma kiye yine, ame som ku jwam Rimam kusog-m ike aser ita ti usirtaen. M baa, m na u nunung, unde tsi uwe-m u si kutupwa titsen yagyag

³¹ u ri te m baa, ‘Korneliyu! Rimam fxen pu wu ira ti jwub-fu. Awu ku tangsom ti wande-fu ti tinyang.

³² Tom ande iki ru ka Yopa ti ka kunn na fu unde iki ti rinyi-wu si Siman Bitrus. Awu sang rikyen kununn Siman unde ti ku fwa apwa, ti nae fer ti unju uyinn.’

³³ Né iken ti nde ame tom ande ka uwog-fu ti ritsen. Itiba-fu ne, nyang timambe. Ati ta ike meme uwe Rimam. Ati som ku ji ti ti fxen ira ti Itsekuru-ti u nda fu ti fu u ri te ti.”

Bitrus Ri te Ba Ira Rimam

³⁴ Bitrus nwunn ku ri ira baa, “Tine, ame nungye pu m ti ayi si kubenti ti Rimam ku sae-wu ariki skeb ariki be, u ku cwe ira-ba pang atso.

³⁵ Ko itso unde titini ti awu a kyen wu Rimam, ku nde iken ti tinyang, awu ku kyangte wu.

³⁶ Ani fxen pu ni ira tinyang ti a ri te ande ti Isirela baa, a na u tu utob ti jimshwur yi uwog Yesu Kristi, Itsekuru na ande meme.

³⁷ Ani ti risu-ni nung pu ni iken ti nde kyi fe uwae uten ti Yawudiya, bag ti uwae uten ti Galili isim-yi ti Yohana ri ira batisma ti ti nde.

³⁸ Ira yi si ti Rimam tsab Yesu unde ti Nazareti tsi, u nda wu kuko na Kusung Rimam. Yesu nwunn ku kyang kyi fe uwog meme, ku nde iken ti tinyang u ku nwangru ande ti ta uwae apyi na Shetann, ikyaen ti, Rimam te wu som te atso.

³⁹ Ati atom-wu nung pu ti meme iken yi ti awu nde uwae Urushelima ti uten Mbayawuda ti tsitsi. A kwer Yesu risu kutuku, awu cwu.

⁴⁰ Amaa Rimam kunn nwunn wu uwae kuskab usir ti ita, u nda wu tso risu-wu uwog ande.

⁴¹ Awu tso-wu risu-wu uwog ande meme be, se uwog ti ande ti Rimam tsab ra. Isim ti Rimam kunn nwunn wu uwae iticwu ati ci te wu, ati ngwa te wu.

⁴² Awu ri te ti iken ti ati u nde. Ati na u ri te ande ira-wu baa, awu na si Unde ti Rimam Tsab Tsi ti wu pwen ande meme rikwen, aba ti tsi user ti aba ti cwucwu.

⁴³ I si awu ti ande ti ku ya iskin ira Rimam meme ku ri ira risu-wu baa, ‘Unde titini ti a ru kubenti uwog-wu, a na u yata na wu ikentitibi-wu uwae kuko na rinyi-wu.’ ”

Kusung Rimam Sang Utob Ande ti Si-ba Mbayawuda be

⁴⁴ Ti Bitrus tsi ku ri ira ti atang Kusung ti Saen Kyag si ba risu meme ande ti tsi ku fxen wu.

⁴⁵ Ande ti Yopa ti putsa Bitrus ru ba, ti si Mbayawuda, ti a nung Rimam sa Kusung-wu na ande ti kununn Korneliyu, ko ti a si-ba Mbayawuda be, ayib fur ba.

⁴⁶ Ikyaen ti, aba fxen ande ti kununn Korneliyu ku ri unju tishe, ku teb kuko na Rimam. Ikyaen na yine, Bitrus ri baa,

⁴⁷ “Ande bane tu pu ba Kusung ti Saen Kyag pangma ti ati Mbayawuda tu. Uwae-ni, unde iki u ndetu ti wu u byang kyi ba baa, a na nde-ba batisma be a?”

⁴⁸ Ikyaen yine awu nda ba, a nde na ba batisma uwae rinyi Yesu Kristi. Tiri, aba Korneliyu jwam wu baa, awu na som te ba fob usir ifaen.