Titus 3 - Kutsingken Ira Rimam ti Saen Kyag

Fengo ti Ande na Yesu u Som Usom-ba

¹ Tangsom ba ti a nae risu riben te ande ti ta risu uten. Aba ā bom-ba risu te ba be, amaa, aba ā som usom wande ti tinyang ti ti nde.

² Aba ā txunmbeb-ba unde iki be, aba ā ka ijwe te kubyag ti fwan, aba ā nde iken sku sku, ti aba ā som usom na kujimshwur te ande meme.

³ Kucang ati ama som usom uwae kuskwab u ku fxen-ti ande be. Ati ya fengo ta, u sang uwae kutur, u kafe apyi na iken ti tsotso na rimenn ijwe, ti iken ti utob-ti tsi atang. Ko kiye titini ati ku som usom uwae ira titibi ti ti myae, ti kitsinn ti tsinn. Ande ku sa ti kuka. Ati ama ku sa ariki kuka.

⁴ Amaa, Rimam, awu ti nwangru-ti, tso itinyang-wu ti ure-wu ru ba uwog-ti,

⁵ u sa ti ruye uwae iken yine. I si-yi ikyaen wande-ti iki ti ati nde be, ayi si ikyaen ti awu nung ti te ayibrisi amam. Awu nde ayine yi fengo na Kusung-wu ti sisaen, awu ti ku kyaenyang utob-ti, ku nda ti unyang tishe.

⁶ Awu nde iken yine kiye ti awu sa Kusung-wu yaensi ti yi fengo na wande na Yesu Kristi unde ti nwangru ti.

⁷ Rimam tso ti risu ti tinyang, u kyangte ti baa ati na si ande ti tinyang ikyaen ti ti na mbe rifunn ti awu sa tsika ikyaen anyisu-wu. Rifunn yine si unyang ti tsikukunn, nee ati sa uwae tsi atang.

⁸ Ira ti m ri ne si kubenti. Ame ku sha ti fu na ri ira risu iken yine ti kpakang, ikyaen ti ande ti ku ru kubenti uwog Rimam ā sa utob-ba na wande ti tinyang ti ti nde ku ru yi uwe. Iken yine nyang timambe u ku ndeya ande.

⁹ Amaa, sa ru risu-fu uwae ishaen ti shaen ti kuskwab, ti ira ande ba ti ku pam ipam risu abitse-ba ti kute, ti kibyag ti fwan risu icwe. Ayine si iken ti ukaen amen, ayi u ndeya-yi ande be.

¹⁰ Unde ti a ku sha isum, u ku nda ande Rimam kata atso, kunn wu ira. Isim ti fu a fwa kusen kipaennjo, u fwa shem kyi, awu a fxen-wu afu be, ka ijwe te wu.

¹¹ Afu nung pu fu ti itso unde wune ndembeb pu wu. Wande-wu titibi pwen mam pu yi awu rikwen.

¹² Ame u tom Artemas ko Tikikus ru ku ba uwog-fu. Kiye ti kinjo uwae-ba a ba, kwab ti ru ba tu me uwae Nikopoli, ikyaen ti, ame pwen mam pu m ti m ba som atang ushaen ufam.

¹³ Kwab ti ndeya Zenas, ti si loya, ti Apolo, ti aba ā nwunn fife. Sha na ba iken meme ti aba ku sha.

¹⁴ Ande-ti ā kwen wande ti tinyang ti ti nde, ikyaen ti aba u nde tu ti a ndeya ande ti rikaen-ba skeb risu. Aba ā som-ba usom ti ukaen be.

¹⁵ Meme ande ti ta te m ike ku kunnji fu ira. Kunnji itaen ti site ure te ti ikyaen Ira Rimam. Ayibrisi Rimam ā si ana-ni meme.