Ruti 4 - Kutsingken Ira Rimam ti Saen Kyag

Ruti ti Bowazi Mbe Atso

¹ Ama Bowazi nwunn ru ka som rishen ufu ukoh ti pakob uten. Ti wu nunung, unde wu ti fer Elimeleki siskeb, ti Bowazi ri ira risu-wu, sang ba. Ama Bowazi kunn wu u ri te wu baa, “Ba som ike urwan-m.” Ama awu ru ba som riben atang.

² Ama Bowazi kunn ande rijwe uwae ande ndufu na uten, u ri te ba baa, “Ni ba som riben ike.” Ama aba ba som.

³ Ama Bowazi ri te unde wu ti fer Elimeleki siskeb ne baa, “Nawomi kafe ru Mowab ba pu wu, u ku sha ti wu sa riben inja-ti Elimeleki jab ku ci ci.

⁴ Ama ame kab baa, ame na u ri te fu ira risu-yi, u rang fu uwe andefu ba ti som ike ne, ko afu u jab mbe riben wu bara. Asiti afu a u jab mbe riben wu, jab mbe-fu. Asiti afu a u jab mbe-fu awu be, ri te m, ti m nung iken ti ame u nde, ikyaen ti, afu ti fer siskeb titawe ame putsa.” Unde wu ri baa, “Ame u jab mbe riben wu.”

⁵ Ama Bowazi ri te wu baa, “Usir ti afu a jab mbe riben wu yi kujwo Nawomi, afu yaen pu fu Ruti, awu uwa icwu wu ti ru Mowab ba ama, ikyaen ti fu mbae anyisu te wu ti rinyi ubaen-wu ti kucang ā kunn atang.”

⁶ Unde wu ti fer Elimeleki siskeb ne ri baa, “Ayi a si ahan, ame u jab mbe-m riben wu be, ikyaen ti, ayi u shir unju ukub sang risu rifunn ti ame site. Jab-fu riben wu, ame u jab-m be.”

⁷ Fengo ti unde u yir cwunn ira kijab yi uten Isirela kiye wu ta re. Asiti afu a u jab mbe iken, ko afu a sa ku fifi, unde kinjo uwae ande ba u nwaen kupwafxen-wu, u nda unde ti ifaen. Ayine, aba ku nde yi ayib ujwunn ande, ku tso kubenti ufi ti fi yi uten Isirela.

⁸ Ikyaen yine, unde wu ti fer Elimeleki siskeb ne, ri te Bowazi baa, “Jab mbe-fu riben wu,” ama u nwaen kupwa afxen-wu, u nda Bowazi.

⁹ Ama Bowazi ri te andefu ti ande ti som atang baa, “Ani fxen, u sae pu ni te ayib-ni baa, ame na jab mbe pu m rifunn Elimeleki ti Kiliyon ti Malon, kujwo Nawomi. Ani ti u ri unju-m.

¹⁰ Cwucwo, ame yaen pu m Ruti, unda Mowab, uwa Malon ti cwu u yata, ti awu u si uwa-m ikyaen ti rinyi-wu ā kunn atang. Yaka ne, ani fxen, u sae pu ni ti ayib-ni.”

¹¹ Ama, meme andefu ba, ti ande ti funn atang, cwe baa, “Ati fxen, u sae pu ti! Yaweh ā nda unda wu ti sang ku ba ishikununn-fu, ti awu ā si pangma Rahel ti Leyatu ti tag atso, u mbye kununn Isirela tsi. Rinyi fu ā pù iten uwae uten Efirati ti ande ā nung fu ko aka uwae Betilami.

¹² Yaweh ā nda anyisu jwunn ishikununn-fu pangma ana Perezi ti Tamar mbae na ubaen-wu Yawuda.”

Rishi Bowazi

¹³ Ikyaen yine, Bowazi pu Ruti mbe, u nae te wu, ama Yaweh nda wu kyaen rishwu, u mbae umbae ti urom.

¹⁴ Ama anda ti uten atang ri te Nawomi baa, “Itinyang ā si ana Yaweh! Awu nda pu wu afu umbae ti u nungkyi fu. Yaweh ā nda rinyi-wu pù iten kutampwa Isirela!

¹⁵ Awu ti u si fenkyi uwae ishikunn-fu, u nungkyi fu kiye ti afu a kyaen pu fu. Uwabyib-fu ti ye ure te fu, ti skeb anyisu arom itsongfaen, awu ti mbae umbae wune na fu.”

¹⁶ Ama Nawomi ye umbae wu sang runwan, u nungkyi wu nyinyang, u shi ser ben wu.

¹⁷ Ikyaen yine, anda ti ice atang kunn umbae wu baa, “Obed,” ku ri baa, “A mbae umbae ti urom na pu ba Nawomi.” A fwa rinyi-wu baa, Obed. Awu ti si itse Jese, ti mbae Dawuda.

¹⁸ Rinyi rishi Perezi ta re. Perezi mbae Heziron,

¹⁹ Heziron mbae Ram, Ram mbae Aminadab,

²⁰ Aminadab mbae Nashon, Nashon mbae Salimon.

²¹ Salimon mbae Bowazi, Bowazi mbae Obed,

²² Obed mbae Jese, Jese mbae Dawuda ama.