Ruti 3 - Kutsingken Ira Rimam ti Saen Kyag

Kumyae Nawomi Ikyaen Ruti

¹ Isim ayine, Nawomi iya ubaen Ruti ri te wu baa, “Unda-m, kiye nde pu wu ti m sha na fu urom ti afu u baen, u tu kununn, u pu unyang.

² Nung! Bowazi, unde ti afu ti anda ti wande-wu ta te atso, si rishi-ti. Utitang ne, awu u skae wuci ti a rug tsi utae.

³ Jwo ijwe ti shin kindob, ti fu pu atupwa-fu ti tinyang si, ti fu si yi utae atang. Cwe-fu ti awu ā sae ye fu be, se ti awu a ci u ngwa tag pu wu ti tawe.

⁴ Kiye ti awu a ku nae riben, sae uwog wu nyinyang ama ti ru ka funn atupwa ti afxen-wu tso, ti nae sang atang. Awu u ri te fu iken ti afu u nde.”

⁵ Ruti cwe ira iya ubaen-wu baa, “Meme ira ti afu ri, ame u nde yi.”

⁶ Ruti nwunn u si yi utae atang, ka nde pangma ti iya ubaen-wu ri te wu.

⁷ Kiye ti Bowazi ci u ngwa tag, ama uwae-wu nyang, awu ru ka nae fer uwog ti a skae ayaen wuci tsi kur atang. Ama Ruti yag skuu ru ka funn atupwa ti takyi Bowazi tso, u nae sang afxen-wu.

⁸ Ti ukatitang utitang, Bowazi pxem shwu kicwag, u kafe kujwo ti wu nunung, unda nae sang wu afxen. Ikyenricwu ye wu.

⁹ Awu rang baa, “Afu si aye?” Ruti cwe baa, “Ame si Ruti, upyi-fu. Pu atupwa-fu kukyi m, ikyaen ti, afu si rishi ubaen-m ti fifer.”

¹⁰ Ama awu ri baa, “Yaweh ā nde fu itinyang, unda-m, ikyaen ti, iken tinyang ti afu nde ne, nyang skeb pu yi ti afu nde ti kucang. Ikyaen ti, afu sa utob tsi-fu risu anyisu itaen be, ko ti wakaen ko ti rifunn.

¹¹ Tine, unda-m, kab-fu rikaen iki be. Ame u nde meme iken ti afu ku sha. Ikyaen ti, meme ande-m ti ta uten ike nung pu ba baa, afu na si unda ti utin.

¹² Ama tine, ayi si kubenti ti ame si rishi ubaen-fu, amaa, rishi ti fer ubaen-fu skeb me ta atang.

¹³ Nae-fu riben. Ucwe a fam kiskinn, ame u ri ira te wu. Asiti unde wu a yaen fu, ayi nyang. Asiti awu a cwe-wu ti wu yaen fu be, ame yer unju yi rinyi Yaweh, ame u yaen fu. Nae-fu riben ti ucwe ā fam ti tawe.”

¹⁴ Ruti nae afxen Bowazi, ama ti ucwefam ku si, awu nwunn ti ayib byibyi, ti ande ku nung ben-ba atso be. Bowazi fwa wu kusen baa, “Nda-fu ti unde iki ā nung baa, unda iki na ba nae utae ike be.”

¹⁵ Bowazi ri te wu ama baa “Pu kutupwa-fu njab ta riben ike.” Ama awu njab ta kutupwa wu. Bowazi myae ayaen wuci kitu kumyae ka itsongnjo si wu, ama Ruti ye ikyin sang yi uwae uten.

¹⁶ Kiye ti Ruti ka tu iya ubaen-wu, Nawomi rang wu baa, “Afu kyang rimang unda-m?” Ruti ri te iya ubaen-wu meme iken ti Bowazi nde na wu.

¹⁷ Ruti ri kyi te iya ubaen-wu baa, “Awu myae ayaen wuci kitu-kumyae itsongnjo yine na m baa, ‘Ayi na nyang-yi ti m na kafe ba tu fu ajwo ukaen be.’ ”

¹⁸ Nawomi ri te wu baa, “Unda-m, tab utob-fu riben. Ira yine u nda Bowazi u nae-wu kicwag be. Awu u nde kang ira risu-yi.”