Ruti 1 - Kutsingken Ira Rimam ti Saen Kyag

Elimeleki ti Ishikununn-wu Ru yi Uten Mowab

¹ Uwae kiye ti ande ti ku pwen rikwen ta risu uten Isirela, rimenn pu uten atang. Unde iki nwunn yi uwae uten ti Betilami ti ta Yawuda ka som rikyen yi uten Mowab. Awu te uwa-wu, te anyisu-wu ti arom ifaen ru te atso.

² Rinyi-wu si Elimeleki, rinyi uwa-wu si Nawomi, rinyi anyisu-wu ifaen ba si Malon ti Kiliyon. Aba si rishi Efirati, ti som Betilami uwae Yawuda. Aba ka susom uten ti Mowab atang.

³ Ama Elimeleki ubaen Nawomi sa cwu ru u ya wu ti anyisu-wu ti arom ifaen bane ta.

⁴ Anyisu bane mbe anda ti Mowab. Rinyi unda kinjo si Wolipa, ti ifaen ama, rinyi-wu si Ruti. Aba som uten Mowab atang ku sha asang rijwe.

⁵ Ama Malon ti Kiliyon sa cwu, ama u ya Nawomi ta, num ubaen-wu ti anyisu-wu meme.

Nawomi ti Ruti Kafe Ru ti Betilami

⁶ Nawomi fxen baa, Yaweh na nde ande-wu ti Yawuda itinyang, u nda pu-wu aba wuci. Ikyaen yine, Nawomi ti awa byib-wu nwunn Mowab ti a na u kafe ru yi uten ti ana-wu.

⁷ Ama Nawomi ti awa byib-wu ye ikyen nwunn uten ti Mowab u kafe ku ru ti Yawuda.

⁸ Amaa, ti aba ta fengo ku ru, Nawomi ri te awa byib-wu ifaen bane baa, “Ni kafe ru-ni, unda titini ā kafe ru yi kununn ti a mbae wu atang. Yaweh ā pae ni itinyang ti ani nde te m ti anyisu-m.

⁹ Yaweh ā nda unda titini uwae-ni uwog ti som kununn urom.” Ama awu ye ba bur utob, meme ita-ba jwub ira ti afxenjwin tiyang.

¹⁰ Awa byib-wu ama ri te-wu baa, “Iyee, ati u kafe-ti yi isim be. Ati u te fu ru ka tu ande-fu.”

¹¹ Ama Nawomi ri baa, “Ni kafe ru-ni anyisu-m, ani putsa m kaa nde imi? Ame ta te kyi anyisu ti arom uwae rishwu-m ti ame u mbae ti a kafe abaen-ni a.

¹² Ni kafe ti isim anyisu-m. Ni ru-ni iken-ni. Ikyaen ti, ame kyaen sha pu m ti m baen kyi unde cwucwo. Ayi asiti ame a ta te uwaetsi ti baen unde utitang ne, ama u mbae anyisu ti arom,

¹³ ani u baen-ni ande be, u som ji ba se ti aba a ko ben pu ba a. Iyee, anyisu-m, ame ku byir utob timambe ikyaen ira-ni. Ira ti tu m ne si rika ti Yaweh pu kunn m.”

¹⁴ Ira iya abaen-ba ti ri ne nda ba ira ti jwub cwucwo. Isim ayine Wolipa ye iya ubaen-wu bur utob, u tē wu, u ye ikyi-wu kafe ru ti yi ande-wu, amaa Ruti bae kang te Nawomi.

¹⁵ Ama Nawomi ri te wu baa, “Nung, uwafub-fu kafe pu wu ti wu kaa tu ande-wu te imbaecwu apxin-wu. Kafe ru ka tu uwafub-fu.”

¹⁶ Ama Ruti ri te wu baa, “Tsi-fu ti afxen ifaen baa, ame na ya fu ta ko ame na kafe ti isim be, ikyaen ti, uwog ti afu a ru atang, ame u ru. Uwog ti afu a sang atang, ame u sang atang. Ande-fu u si ande-m. Rimam-fu u si Rimam-me ama.

¹⁷ Uwog ti afu a cwu atang si uwog ti ame u cwu, a u nji m atang ama. Yaweh ā nde m ira bebeb nee iken ti a u kata m te fu a si-yi iticwu be.”

¹⁸ Ama kiye ti Nawomi nung baa, Ruti na tsi ti afxen ifaen ti wu na te wu ru te atso, awu mbub-wu unju cwucwo be.

¹⁹ Tiri meme ifaen-ba ye ikyi nwunn kyang kyang ba sang Betilami. Ama kiye ti aba ba sang Betilami, meme ande ti uten atang tsen utob, ama anda ri baa, “Ne si Nawomi a.”

²⁰ Awu ri te ba baa, “Ni kunn-ni ame baa, Nawomi be. Ni kunn m baa, Nungag, ikyaen ti, Rimam ti site kuko patag nde tsi pu wu ame ti utob ti byir.

²¹ Ame nwunn ru ike ti ubaen-m ti anyisu-m, amaa, Yaweh sa me kafe ba sang ti ajwo ukaen. Ani nde rimang ku kunn m baa, Nawomi isim ti Yaweh tur m sang uwae rikaen? Kubenti, Awu ti Skeb titag shir ira titibi si m.”

²² Ne ti si fengo ti Nawomi ti Ruti unda Mowab, uwabyib-wu nwunn uten ti Mowab kafe ba ti yi Betilami. Aba ba sang Betilami kiye ti a bag itibunn bali.