Roma 8 - Kutsingken Ira Rimam ti Saen Kyag

Ikyi ti kyang te Kusung ti Saen Kyag

¹ Tine, rikwén iticwu ta-yi risu ande ti ru kubenti uwog Yesu Kristi cwucwo be.

² Imbyi ira yi uwog wune baa, yi fengo Yesu, ti, Kusung Rimam na unyang saen fu ta pu wu uwae ikentitibi te iticwu ikyaen wande na Yesu Kristi.

³ Icwe Musa nde tu-yi ti yi nwangru ti be, ikyaen itinam na ijwe-ti ande. Ikyaen yine, Rimam nde iken ti Icwe ndenum ti yi u nde. Awu tom Umbae-wu ba yi rimenn ijwe pangma ana-ti ande ti ku nde ikentitibi, u nda wu si rinyangwae iken ti yerwen ikyaen ikentitibi. Yi fengo yine, awu twenji kpakang ikentitibi risu ande.

⁴ Awu nde ayine ikyaen ti a u kumunn ira usom ti sisaen ti icwe ku sha uwog-ti ande ti ku kyang-ti ikyin uwae rimenn ijwe be, amaa, ku kyang uwae Kusung.

⁵ Ande ti ku som usom na ijwe, ku sa uwae-ba tsi nyáng risu iken na ijwe, amaa, ande ti ku som usom uwae Kusung, ku sa utob-ba tsi risu iken na Kusung.

⁶ Ti unde u sa utob tsi risu iken na ijwe, ayi u shir iticwu ba, amaa, ti unde u sa utob tsi risu iken na Kusung, ayi u si unyang, ti kujimshwur.

⁷ Unde ti ku sa utob tsi risu iken na ijwe, awu ku ta rika te Rimam. Awu ku nae-wu risu riben te icwe Rimam be. Kubenti, awu u nde tu-wu be.

⁸ Cwucwo ande ti ku putsa nyáng iken na ijwe-ba amam, aba ndetu-ba iken ti Rimam ku sha be.

⁹ Amaa, ani si-ni ande ti ku sa utob tsi nyáng risu iken na ijwe be. Ana-ni, ani sa utob tsi risu iken na Kusung, asiti Kusung Rimam a te ni som tetso ara kubenti. Unde ti a site-wu Kusung Kristi be, awu si-wu ana Kristi be.

¹⁰ Amaa, asiti Kristi a ta uwae utob-ni, ko ti ijwe-ni cwucwu ikyaen ikentitibi, Kusung Rimam ku nda ni unyang, ikyaen ti, Rimam sa ni tsi pu wu baa, ani na si ande ti kubenti.

¹¹ Asiti Kusung Rimam ti kunn nwunn Yesu Kristi uwae iticwu a ta uwae utob-ni, awu Rimam wune u kafe ijwe-ni ti ku cwucwu ne ru yi ijwe ti ku cwu-yi cwu be. Awu u nde iken yine yi uwog Kusung-wu ti ku som uwae utob-ni.

¹² Ikyaen yine, ameinja, ripab ta risu-ti, amaa, ayi si-yi ripab ti ati u pae na rimenn ijwe, ti ati na som kang usom na ijwe keng keng be.

¹³ Ani a som usom na ijwe, ani u cwucwu, amaa, asiti uwae itindeya na Kusung Rimam, ani a twenji ikentitibi ti ani ku nde, ani u tsi ti user.

¹⁴ Ikyaen ti, meme ande ti Kusung Rimam ti a ku tae ba, aba si anyisu Rimam.

¹⁵ Awu Kusung ti ani paembe uwog Rimam, si-wu kusung na upyi, ti wu u nda ti ikyenricwu be. M m, awu si kusung ti ku nda ni kafe anyisu Rimam. Ati ku jwubra ba uwog-wu baa, “Itse, Itse.”

¹⁶ Kusung Rimam ti risu-wu, cwe te kusung ti ana-ti baa, ati na si anyisu Rimam.

¹⁷ Ti ati si pu ti anyisu Rimam ne, ati u te Kristi ci rifunn kuru Rimam tetso. Asiti ati a te Yesu ngwa rikaen tetso, ati te wu u som uwog ti riyinn tetso ama.

Bulus Ri Ira Risu Itinyang ti u Ba Tu Ti Uwe Ike

¹⁸ Ame ku kab baa, rikaen ti ati ku ngwa tine, na ko-yi ti a myae yi te riyinn, ti kuko, ti Rimam u tatso ti usir ti ucwe be, ko tikiyib.

¹⁹ Meme iken ti Rimam mam, som ku ji ti aten ayib, ku sae usir tiyang ti Rimam u tunn anyisu-wu tā ise.

²⁰ Meme iken ti Rimam mam, njwug mbeb. Ayine si-yi ti utob-yi be, ayi si Rimam ti risu-wu ti sa yi tsi, u sa uwae tsi baa,

²¹ usir iki ku ba ti meme iken ti wu mam na u tu itisaenta uwae iticwu ti ayi ku cwu. Awu myae ama baa, iken yine ama na u tu itinwangru ti itinyang ti anyisu Rimam tu.

²² Ati nung pu ti baa, iken meme ti Rimam kyae uwae utense na ku ngwa rikaen, u ku mung pangma unda ti ku pwé umbae, ti ti Rimam mam utense ba ku sang tine.

²³ Ayi si-yi nyáng utense amam be. Ati ti risu-ti, ti tu Kusung Rimam, awu ti si iken titawe ti Rimam ku nda ande-wu, ati ama ku pwé uwae riyaen utob-ti, u som ku ji usir ti Rimam u sa ti kafe anyisu-wu, u nwangru ijwe-ti yine uwae iticwu.

²⁴ Ayi si ikyaen uwaetsi-ti risu iken yine, nee Rimam nwangru ti. Uwae tsi risu iken ti ati nung ti ayib, si-yi uwae tsi cwucwo be. Aye ti u sa uwae tsi risu iken ti wu sae ti ayib?

²⁵ Amaa, asiti ati a sa uwae tsi risu iken ti ati nung-ti ti ayib khika be, ati u ye utob u som ji yi.

²⁶ Ti mbwe-yi ama, Kusung Rimam ku ndeya ti uwae itikosi-ti. Ati nungtu-ti iken ti ati u jwam Rimam fengo ti kpang atang be, amaa Kusung ku jwub ira uwog Rimam kutunn unju-ti, ti ira ti jwub ti unde iki u ri tu-wu be.

²⁷ Ama Rimam, awu ti ku sae ayib si ka riyaen utob ande, awu nung pu wu itijwam ti Kusung ku jwam risu-ti, ikyaen ti, awu Kusung ku mbyae ajwo uwog Rimam kutunn unju ande-wu, u ku nde yi ti fengo ti Rimam ku sha.

²⁸ Ati nung pu ti baa, uwog ande ti site ure te Rimam, meme iken ti ku nde, ku sa tinyang ba na ande ti awu kunn ba uwae kumyae ti ana-wu.

²⁹ Ande ti Rimam nunung ti kucang, awu tsab sa ba tsi ti a na ru Umbae-wu Yesu, ikyaen ti, yi fengo wune, umbae-wu na u ba si umbae rifen uwae anyisu Rimam yang-ba.

³⁰ Aba ande ti Rimam tsab ba tsab tsi, awu kunn ba ira ba. Ande ti awu kunn ba ba, awu nda ba kafe ande ti kubenti uwe-wu. Ande ti kafe pu ba ande ti kubenti, awu nda ba rurob.

Ati ku Tu Ure Rimam Uwog Yesu Kristi

³¹ Tine, ati u ri rimang risu iken yine? Asiti Rimam a ta te ti, unde iki u tsi tu ngág te-ti a.

³² Awu ti byang-wu ati Umbae-wu be, ama cwe, u sa wu ruye ikyaen-ti meme, awu u sha na-wu ati iken ti tsitsi ti utob-wu kinjo be a.

³³ Aye ti ko ti wu u ye ande ti Rimam tsitsab riraen? Unde ta-wu be, ikyaen ti, Rimam ti risu-wu ri mam pu wu baa, aba na si ande ti kubenti.

³⁴ Unde iki ta atang ti u ye ba riraen a. Ayi u ndetu-yi be. Yesu Kristi cwu ricwu ikyaen-ti. Ayi tsi-yi ahan amam be. A kunn nwunn wu uwae iticwu, awu ta kujwo rici Rimam, u ku mbyae ajwo uwog Rimam ikyaen-ti.

³⁵ Iken iki ta atang ti u ndeye ti yi kata ti te ure Kristi njwaa? Ayi u si rikaen a. Ayi u si kubyagkwa a. Ayi u si rika ti a u ta ti a. Ayi u si usom ti kpakang a. Ayi u si rimenn a. Ayi u si ti ati u kyang ribam a. Ayi u si ti ati a ta unju iticwu ti ande ku wen ti a.

³⁶ Pangma ti a bae uwae Kutsingken Rimam baa, “Ikyaen rinyi-fu, ati ta unju iticwu ko usir titini. A sa ti tsi pangma mbawen ti a tae ku ru yi uwog ti a kaa yerwen.”

³⁷ Kubenti, ati ci pu ti rika risu iken yine meme yi uwae wande na unde wu ti ye ure te ti.

³⁸ Ame nung pu m ben ben baa, iken iki na ta-yi ti u kata ti te ure Rimam be. Ayi u si-yi itiser, ko iticwu be. Ayi u si-yi atom Rimam ti apupwen be, u si-yi rijwen titibi be. Ayi u si-yi iken ti ku nde tine be, u si-yi iken ti u ba nde uwe ike be. Ayi u si-yi iken ti kuko apupwen be.

³⁹ Iken ti ta apwa apupwen, ko iken ti ta uwae kukwae iticwu, ko iken iki ti Rimam kyae, iken iki ta-yi ti u nde ye ti u kata ti te ure na Rimam, ti ati tu uwog Itsekuru-ti Yesu Kristi be.