Roma 4 - Kutsingken Ira Rimam ti Saen Kyag

Ibrahim Tu Risu Tinyang Uwe Rimam Ikyaen Uwae Kinjo-wu

¹ Ati u ri baa imi risu Ibrahim, itsekam-ti? Awu nde rimang itawe u tu risu tinyang uwe Rimam?

² A baa, Ibrahim na tu usom ti som uwe Rimam yi fengo na itikwab-wu uwae icwe Rimam, awu ú site iken ti wu ndub ijwe risu-yi, amaa i si-yi uwe Rimam be.

³ Kutsingken Rimam ri baa imi? “Ibrahim ru kubenti uwog Rimam, ama Rimam sa tsi baa, awu na si unde ti kubenti ikyaen uwae kinjo-wu.”

⁴ Iken ti a ku pae unde ti ku nde wande, si-yi rinyangwae be. Ayi si kujwojang wande-wu ti a ku pae na wu.

⁵ Amaa, ayi a si ira usom ti tinyang uwe Rimam, unde u tu-wu ayi yi fengo na wande ti tinyang ti awu ku nde be. Ayi si rinyangwae. Unde a ru uwae kinjo uwog Rimam, Rimam ku ri baa, awu na som pampam uwe-wu, ikyaen ti, Rimam ti si awu ti ku kyaenyang utob ande ti ku nde ikentitibi.

⁶ Ayine rukwer ira ti Dawuda ri kute risu utob ti tsen unde ti Rimam kyangte wu baa, awu na si unde ti kubenti, ti si-yi ikyaen kujwo wande iki be. Awu Ukwe Dawuda ri baa,

⁷ “Itinyang ā si ana ande ti a yata na ba riraen-ba, aba ti Rimam fenmbeb pu wu ikentitibi-ba.

⁸ Itinyang ā si ana unde ti Rimam ye su-wu ira risu ikentitibi-wu be.”

⁹ Itinyang yine si nyáng ana ande ti tsen kutxin amam ree, re ande ti tsen-ba kutxin be fa atang ama? Aba fa atang, ikyaen ti, ayi si si ira ti ati ri ti kucang baa, “Ibrahim ru kubenti uwog Rimam, ama ikyaen uwae kinjo-wu, Rimam sa wu tsi pangma unde ti tinyang.”

¹⁰ Isinn ti Rimam sa wu tsi ahan? Ayi si kiye ti wu tsen pu wu kutxin ree, re kiye ti awu tsen-wu kutxin khika be? Kubenti, kiye yi, awu tsen-wu kutxin khika be.

¹¹ A tsen na wu kutxin isim ti Rimam tsab mam pu awu baa, awu na si unde ti tinyang. Ititsen kutxin-wu si iken ti tatso baa, Rimam na kyangte pu wu awu. Nee iken ti nde Ibrahim kafe itse ande meme ti ru uwae kinjo uwog Rimam, aba ti Rimam kyangte ba baa, aba na si ande ti tinyang, ko ti a tsen-ba kutxin be.

¹² Ayi ti nda wu kafe itsekam ande ti tsen kutxin ama. Asiti aba a putsa afxen itse-ti Ibrahim, u ru uwae kinjo uwog Rimam, pangma ti Ibrahim nde, ti ti a tsen na wu kutxin.

Unju ti Yer ti Rimam Yer te Ibrahim

¹³ Kiye ti Rimam yer unju te Ibrahim ti anyisu-wu baa, utense meme na u si ana-ba, ayi si-yi ikyaen ti Ibrahim ye su Icwe Rimam be. Ayi si ikyaen ti awu ru kubenti uwog Rimam, u tu risu tinyang uwe-wu.

¹⁴ Asiti unju ti yer Rimam a si nyáng ana ande ti ku ye su icwe-wu amam, ayi ku tatso baa, ayi si iken ti ukaen ti unde u ru uwae kinjo uwog Rimam. Cwucwo unju ti yer Rimam ama u si ukaen.

¹⁵ Ikyaen ti, icwe ku shir rinae Rimam ba risu ande ti nyatsa yi, amaa, uwog ti icwe ta-yi atang be, itinyatsa icwe ta-yi be ama.

¹⁶ Nee iken ti nde, unju ti Rimam yer te Ibrahim tsi tsa risu uwae kinjo, ikyaen ti unju ti yer wu ama ā tsitsa risu rinyangwae-wu, ama ikyaen ti yi na ā ba kang uwog anyisu Ibrahim meme. Ayi si-yi ikyaen anyisu-wu ti ku ye su Icwe Rimam amam be. Iyee! Ayi si ikyaen ande ti ru uwae kinjo pangma ti Ibrahim nde ama. Ikyaen ti, awu ti si itse-ti meme.

¹⁷ Ayine rukwer ira ti a bae uwae kutsingken uwog ti Rimam baa, “Ame nda fu kafe itse ambukwen ande yang-ba akwen.” Ara kuben, awu si pu wu itse-ti uwe Rimam, awu Rimam ti Ibrahim ru kubenti uwog-wu, awu ti ku kunn shwur ande ti cwucwu, awu ti ku ri ira, ama iken ti ta-yi kucang be, ku ru ba tsi.

¹⁸ Ibrahim ru kubenti, u sa uwae tsi, ko ti ayi nde pangma ti iken ti awu sa uwae tsi risu-yi na u nde-yi be. Ikyaen uwae kinjo-wu ne, Rimam nda wu kafe itse ambukwen ande yang-ba akwen. Pangma ti awu yer unju te wu baa, “Rishi-fu u ba jwunn mae ijwe be.”

¹⁹ Kiye wu, ko ti Ibrahim nung baa ijwe wu na cwu mam ku pu yi, amaa, awu num-wu ijwe uwae uwae kinjo-wu be. Ko ti, awu nde ku pu wu asang mae itsong, uwa-wu ama si unda ti kunn utsob, awu tsi ti uwae kinjo uwog Rimam.

²⁰ Awu kab-wu uwae risu unju ti yer na Rimam be. Uwae kinjo-wu nda wu kuko, u nda wu teb rinyi Rimam.

²¹ Awu sa uwae tsi baa, Rimam na u nde tu iken ti awu yer unju baa awu na u nde.

²² Nee iken ti nde Rimam kyangte uwae kinjo Ibrahim baa, “Ayi na te usom ti pam pam na si iken kinjo.”

²³ Amaa, ira yi ti a ri baa, “A kyangte uwae kinjo-wu, u sa tsi baa ayi na si ti kpang atang,” a bae-ba yi ikyaen Ibrahim amam be.

²⁴ A bae yi ikyaen-ti ama. A u sa uwae kinjo-ti, ande ti ru kubenti uwog Awu ti kunn nwunn Itsekuru-ti Yesu Kristi, Itsekuru-ti, uwae iticwu baa, ayi na si ti kpang atang.

²⁵ A nda wu cwu ricwu ikyaen ikentitibi-ti. A kunn nwunn wu uwae iticwu ikyaen ti ti na tu risu tinyang uwe Rimam.