Roma 16 - Kutsingken Ira Rimam ti Saen Kyag

Bulus ku Kunnji ba Ira ti Kinjo ti Kinjo

¹ Ame ku sha ti ni na nung kaya-ti Fibi. A tsab wu uwae kumbub ande Rimam ti ta Kenkireya ti wu ndeya ande ti ta uwae rikaen.

² Ni ye wu fwa rinwan uwae rinyi Itsekuru-ti uwae ure ti pang atang uwog ande na Rimam. Ni ndeya wu ti ni sha na wu iken ti awu ku sha uwog-ni meme, ikyaen ti, awu ndeya pu wu ande yang akwen, fa ti ame meme.

³ Ni kunnji Birskila ti Akila ira, aba ti te m ku kwab tetso uwae wande na Yesu Kristi.

⁴ Aba ti sa risu-ba sang uwae iticwu ikyaen-m. Ame ku nde na ba fxaefa timambe. Si-yi nyang ame amam be, ambub ande Rimam ti ta uwog ande ti si-ba Mbayawuda be ku nde fxaefa te ba ama.

⁵ Ni kunnji ande ti ku funn ku fen Rimam uwae kununn-ba. Ni kunnji urwan-m Apaenetu ira, awu si unde ti tawe ru uwae kinjo uwog Kristi ikyaeb uten Asiya.

⁶ Ni kunnji Mberimu ira. Awu ti kwab u ndeya ni timambe.

⁷ Ni kunnji Andaroniku ti Juniya ira. Aba si ande ti uten-m ti te m sang pursuna tetso. Uwae atom na Itsekuru-ti meme, ande ku nung ba ti kuko timambe. Cwucwo aba putsa ira Kristi tawe m.

⁸ Ni kunnji Ampilatu ira, awu si urwan-m ti ayib ricwu-m uwae usom ti som-ti fengo na Itsekuru.

⁹ Ni kunnji Urbanu ira, urwan wande-ti uwae wande na Kristi, fa ti Sitakis, urwan-m ti utob uwae-m.

¹⁰ Ni kunnji Apeles ira. Ande nung pu ba kubenti-wu uwae fengo na Kristi. Ni kunnji ande ti ta kununn Arsitobulu ira.

¹¹ Ni kunnji Herodiyonn, awu ama si umbae ti uten-m, ti ande Rimam ti ta uwae kununn Narsisu meme.

¹² Ni kunnji Tirfena ti Tirfosa ti ku nde wande Rimam, fa te urwan-m ti ayib ricwu-m Persis ti ku nde wande Rimam ti utob-wu kinjo.

¹³ Ame ku kunnji Rufus, awu ti Itsekuru-ti tsab sa wu ikyaen wande ti ana-wu, ti iya-wu ti ye me fa rinwan pangma ame na si umbae-wu.

¹⁴ Ni kunnji Asinkirtu, Filegonn, Hermes, Patiroba, Hermas, ti ameinja ti ta te ba meme.

¹⁵ Ni kunnji Filologu te Juliya, fa ti Nereyu ti kaya-wu, fa kyi ti Olimpas ti ande na Rimam ti ta te ba meme.

¹⁶ Ni kunnji atso ira ti ni ye atso bur utob yi rinyi Rimam ikyaen-ti. Ambub na ande na Yesu Kristi meme ti ta ikyaeb uten-ti ike ku kunnji ni ira.

Ira ti Ricwunnkyi

¹⁷ Ameinja-m, ame ku jwam ni, ni nung afxen-ni riben te ande ti ufxaen ti ku sa itikata ba kutampwa-ni u ku nda ameinja iki kyen kufxen fengo Rimam yi iken ti kwen-ba. Ayi txi ra te ti kucang. Ni ko yaen-ni aba be.

¹⁸ Ikyaen ti, abane si-ba apyi na Itsekuru-ti Yesu Kristi be. Aba ku fen iken ti ijwe-ba ku sha. Ira unju-ba nyang ti fxen timambe, amaa, aba ku kyaefa ande ti nung-ba ira iki be.

¹⁹ Ande meme fxen pu ba baa, ani na nae pu ni risu riben na Itsekuru. Ayine nda m ame ku tsen utob te ni. Ame ku sha ti ni na si ande ti ben ayib risu ira ti tinyang, amaa, ayi a si ira titibi, ni si ande ti nung-ni ira be.

²⁰ Itse-ti Rimam ti ku nda ti kujimshwur, awu u tsi-wu tsi be u twenji kuko na Shetann u nda wu nae riben afxen-ni. Itinyang na Itsekuru-ti Yesu Kristi ā te ni som tetso.

²¹ Urwan wande-m Timoti ku kunnji ni ira. Lusiyu ti Jason ti Sosipater, ande ti uten-m, ku kunnji ni ira ama.

²² Ame Tertiyu, unde ti ku bae kutsingken wune ikyaen Bulus, ku kunnji ni ira, ani ameinja-m yi fengo Itsekuru-ti.

²³ Unde ti kununn-m Gayus ti ande Rimam ku funn kununn-wu ku kunnji ni ira. Erasitu unde ti ku ye su aser ukwe na uten-ti ike ti inja-ti Kwartus ku kunnji ni ira nyinyang ahan.

Bulus ku Teb Rimam

²⁵ Ti sa kuko na Rimam! Awu site kuko ti wu nda ni tsi ting ting uwae ira-wu. I si ira yine ti ame ku ri te ande kiye ti ame ku tsag te ba ira tinyang risu Yesu Kristi. Ayi si sí ira Rimam ti kubenti ti a sa tam ande uwae asang yang-yi akwen ti wur ru.

²⁶ Amaa, tine a sa ira yi ruye pu ba ise paenine, uwae ira ti ande ti ku ya iskin ira Rimam bae tsi. Ama Rimam, awu ti tsi yiyer, nda ba unju baa, a na ri ira yi ko aka uwae utense, ikyaen ti ande na ru kubenti uwae-yi, u nae risu riben uwog Rimam.

²⁷ Ti sa kuko na Rimam, awu amam ti si Rimam ti nung ira u site ben ayib siskeb. Ti teb rinyi-wu ikyaen Yesu Kristi tsikunn ike ru fife yi uwe. Ayi ā si ahan!