Roma 13 - Kutsingken Ira Rimam ti Saen Kyag

Usom ti Som te Ande ti Uwe Uten

¹ Unde titini ā nae risu riben na ande ti uwe uten. Ikyaen ti, unde iki ta-wu ti kuko risu ande be, se Rimam a cwe pu wu itawe. Aba ti ta risu-ni uwae utense ne, ayi si Rimam ti ye ba tsi.

² Unde ti a tsi ukub te akwe ti uten, awu shaen pu wu iken ti Rimam sa tsi. Ande ti ku nde itso iken yine u shir rikwen ba risu-ba.

³ Ande ti ku nde iken ti tinyang site-ba ikyenricwu ande ti risu uten be, amaa ande ti ku nde ikentitibi ku sha-ba ti a nung ayib ande ti uwe be. Asiti afu a ku sha ti fu som usom ti kujimshwur te unde ti uwe uten u kyen-fu ikyenricwu-wu be, nde iken ti tinyang. Afu a nde ahan, awu u teb rinyi-fu.

⁴ Ikyaen ti, unde ti uwe uten si Unde ti Rimam Tsab Tsi ti wu nde wande ti u ndeya fu. Amaa, asiti afu a raen ira, afu u kyen kang ikyenricwu! I si-yi ti ukaen amam nee awu ku ye su kisim be. Awu si upyi Rimam. Rimam ku nde wande yi kujwo unde wune u ku byinn ande ti ku nde ikentitibi kimbab.

⁵ Ikyaen na yine, ni nae kang risu riben na ande ti uwe-ni. Ni nde-ni ayine ikyaen rinae Rimam amam be, ni nde yi ikyaen ti, ani nung pu ni uwae riyaen utob-ni baa, ayi na si iken ti tinyang ti ti nde.

⁶ Ayine ama si iken ti nde nee ani ku ta aser ukwe. Akwe ba ti ani ku funn aser ukwe na ba ne, i si wande na Rimam ti aba ku nde.

⁷ Ikyaen na yine, ni pae na unde titini iken ti awu ku putsa ni, ayi a si aser ukwe, ni pae yi. Ayi a si aser usu, ni pae. Ayi a si rurob, ni nda ba rurob. Ayi a si risu ti nae riben, ni nae risu riben na ba.

Usom ti Som na Ande Tetso

⁸ Ni cwe-ni ti ni ci ripab uwog unde iki be, se ripab na ure ti ni ye tetso amam. Unde titini ti a ye ure te unde ice-wu, awu nde pu wu iken ti icwe Rimam sa tsi.

⁹ A fwa ti kusen baa, “Nae-fu amae be. Wen-fu unde be. Yib-fu riyib be. Sae-fu ayib sae yi iken unde ice-fu be.” Icwe yine, te ayi ti tsitsi meme, a wèn funn yi uwae icwe kinjo baa, “Ye ure te ande ti tsitsi pangma ti afu ye ure te risu-fu.”

¹⁰ Unde titini ti a ye ure te unde ice-wu, awu u nde-wu unde wu ikentitibi iki be. Asiti unde a ye ure te ande, awu ye su pu wu icwe.

¹¹ Ni kwab uwae iken ti ame ri ne, ti ni tangsom te kiye ti ati ta uwae-wu tine. Kiye ba pu wu ti ni shwu kicwag. Ikyaen ti, tine usir itinwangru ta fifer te ti skeb pu wu kiye ti ati ru uwae kinjo uwog Yesu Kristi ti kucang.

¹² Utitang wur ku ru ku pu wu. Ucwe fam ku pu wu. Ti fxae wande kufub ti ti nde ti ti pu usu rika na uwog ti saen kyag fa ajwo.

¹³ Ti kyang ikyin-ti kpang atang, pangma ati na ku nde yi usirtaen. Ni sa ruye risu-ni uwae ira ande ti ku ngwa iken ku shishaen u ku nde iken ti ajib. Ni putsa-ni afxen ande ti ku kyang ku nae amae, u ku nde iken ti ku txi iyib be. Ni ya kutxu ti byinn ti kitsinn ti tsinn ta.

¹⁴ Atupwa rika-ni ā si Itsekuru-ti Yesu Kristi, ti ni munnji te ira ti kab-ni ti kucang ti ku sha nyáng iken na risu-ni amam.