Nehemiya 9 - Kutsingken Ira Rimam ti Saen Kyag

Aba Ritso Ikentitibi-ba

¹ Uwae usir ti rikom asu inje na ushaen wu, ande ti Isirela byir atso ti a na tatso utob ti beb na ikentitibi-ba yi fengo na unju ti cwe. Aba nwaen ru ye risu-ba uwae ande ti rikyen meme.

² U sī atupwa tibyir, ama u pu itong mbub risu-ba. Ama aba tsi ku fxir tso ikentitibi-ba ti ana abitse-ba ti aba nde.

³ Ayi sa ba áwa ita ti a nung putsa icwe na Yaweh Rimam-ba, ama yi uwae áwa ita cwucwo a sa ku fxir ikentitibi-ba ama ku fen Yaweh Rimam-ba.

⁴ Anyisu Lawi ti tsitsa kupam atang si Jeshuwa, Bani, Kadimiyel, Shebaniya, Buni, Sherebiya, Bani ti Kenani. Aba jwam Rimam ti fxen ujwin ti ribom uwog Yaweh Rimam-ba.

⁵ Tiri anyisu Lawi iki kunn ande ti a na ba fen Rimam: Aba si Jeshuwa, Kadimiyel, Bani, Hashabniya, Sherebiya, Hodiya, Shebaniya, ti Petahiya. Aba ri baa: “Sunwunn ritsen ti ni teb Yaweh Rimam-ni! Ni teb wu ru fife yi uwe! Unde titini teb rinyi-wu ikyaen riyinn ti kuko-wu.”

A Jwam Rimam Risu Ikentitibi-ba

⁶ “Afu ti si Yaweh, afu amam ti si Yaweh. Afu kyae apupwen, ti ujwunn aswer ti ta apupwen. Afu kyae utense ti iken ti ta uwae-yi meme, ti uyinn ti iken ti ta uwae-yi meme. Afu nda ba unyang meme. Atom ti apupwen ti iken ti tsitsi apupwen ku kú riben ku fen fu.

⁷ Afu Yaweh Rimam ti tsab Ibram, u pu wu ru ye uwae Ur na Kalidiya, u fwa rinyi-wu baa Ibrahim.

⁸ “Afu nung baa, awu na si unde ti kubenti, u yer unju te wu baa, afu na u nda anyisu-wu riben ande ti Kanana, riben ande ti Hiti ti ana ande ti Amor, ti ana ande ti Perizi ti ande ti Jebusi ti Girgashi. Afu ye su unju ti yer-fu, ikyaen ti, afu ku nde iken ti pang atang.

⁹ Afu sae itso rikaen ti abitse-ti ngwa uten Ejib. Afu fxen ira ti jwub-ba unju uyinn tibyaen.

¹⁰ Afu nde iken ti ku fur ayib uwe ukwe ti Ejib ti afaen-wu ti ande-wu meme, ikyaen ti afu nung pu fu itso rikaen ti a nde abitse-ti. Afu nda rinyi-fu pu iten kyife uten meme, ba kwer ti yaka ne.

¹¹ Afu kata uyinn ifaen, u nda ba putsa kutampwa uyinn yi riben ti wom. Aba ti rwae putsa ba ngwa byinn uwae ambyi ti jijang.

¹² Yi usirtaen afu tae ba ti kubyi. Yi kutitang afu yen urwa tatso ba fengo, ti aba na putsa.

¹³ “Afu si apupwen ba risu rikwen ti Sinai, Afu ri ira te ande-fu u tatso ba fengo ti ba na putsa, u nda ba icwe ti pang atang, ti icwe ti kubenti, ti iken ti kwen ti tinyang.

¹⁴ Afu nda ba icwe risu usir ikyinn-fu ti saen kyag. Afu nda upyi-fu Musa unju ti a na putsa meme icwe-fu, ti iken ti kwen-fu.

¹⁵ Kiye ti a ku fxen ti rimenn, afu nda ba wuci ti si apupwen ba, u sa ambyi ru ye uwáe kutxú na ba kiye ti a ku fxen ti unwaen. Afu ri te ba ti a na sang ka mbe riben wu ti afu ben uben baa, afu na u nda ba.

¹⁶ “Amaa, abitse-ti ndub ijwe, u bom risu u ye su-ba icwe-fu be.

¹⁷ A pyir ti a u nae risu riben na fu, Aba tangsom-ba te iken ti ku fur ayib ti afu nde uwog-ba be. Aba bom risu u tsi ukub te fu. Aba tsab unde ti uwe ti wu na pu ba kafe ru ti usom upyi yi Ejib. Amaa, afu si Rimam ti ku yata na ande. Afu si Rimam ti tinyang ti site ayibrisi timambe. Afu ku tso-fu rinae ti kufe be. Ure-fu, ititsikunn-yi ta-yi be. Ikyaen ayine afu ya ba ta-fu be.

¹⁸ Ko kiye ti aba kyae na ijwe-ba apxin ti pangma umbae indag u ri baa, ‘Awune ti si Rimam-ni ti pu ni ru ye uwae uten Ejib.’ Aba ndembeb rinyi-fu.

¹⁹ Amaa, afu ya ba ta-fu uwae kutur atang be, ikyaen ti, ayibrisi-fu ko timambe. Kubyi wu tsikunn ku tae ba usirtaen, ama urwa wu tsikunn ku tatso ba fengo ti utitang.

²⁰ Afu nda ba kusung-fu ti tinyang ti wu na kwen na ba. Afu byang-fu aba Mánna ti a ci be. Afu nda ba ambyi ti a na ngwa.

²¹ Uwae asang mae ifaen uwae kutur afu shi ba, fu nda ba meme iken ti a ku sha. Atupwa-ba kyaen mbeb-yi be. Afxen-ba mbwe-yi mbwe ko ayi na cicaeb be.

²² Afu nda ba ci rika risu mbukwen ande ti abikwe, ti si ana iten ti ta ice te ba. Aba ci rika risu Sihon ukwe uten Heshibon ti Og ukwe na uten ti Bashan.

²³ Afu nda ba mbae nghae, u jwunn pangma aswer apupwen. Afu pu ba ka sang riben wu, ti afu yer unju te abitse-ba baa, aba na u somkyi.

²⁴ Ama afu nda Isirela ci rika risu ande uten Kanana ama u ka somkyi riben wu. Afu pu ba fa ti abikwe-ba ti ande ti som atang meme na Isirela kujwo ti a na nde iken ti a ku sha te ba.

²⁵ Ande-fu ye uten uten ti a mbye kwob yi te ukoh. Aba ye riben ti ajib, asog ti munn ti rifunn, ribung ti ande iki mum mam pu ba, ti risaen ituku anam, ituku olifi, ti ituku ti ku waen awaen sisib. Aba ci u kyaen, u kem, u tsen utob te iken meme ti tinyang ti afu nde na ba.

²⁶ “Amaa, ande-fu nae-ba risu riben na fu be, aba bom risu te fu. A sa iken ti kwen-fu jwunn tika. Aba wen atom-fu, ti ku fwa ba kusen baa, a na kafe ba uwog-fu. Ande-fu nde ikentitibi beb timambe u ku ndembeb rinyi-fu.

²⁷ Ikyaen ayine, afu sa ba sang kujwo ande rika-ba ti nde ba rikaen. Uwae rikaen-ba aba jwub ira ba tu fu, afu fxen ira ti jwub-ba apupwen. Uwae ayibrisi-fu, afu tom na ba ande ti nwangru ba kujwo ande rika-ba.

²⁸ Ama isim ti aba tu unyang ti pu, a nde kyi ikentitibi uwe-fu, ama afu ya ba ta kujwo ande rika-ba. Kweme ayine, kiye ti a kafe u jwub ira tu fu, afu fxen ira ti jwub-ba apupwen. Kiye yang-yi afu nwangru ba uwae ayibrisi-fu.

²⁹ Afu fa ba kusen ti afu na u shir ba kafe ba ti icwe-fu, amaa, yi ijwe ti ndub-ba a shaen icwe-fu u ye su-ba iken ti kwen-fu be. Asiti unde a ye su icwe-fu, unde wu u som ti user u tu ititiru yi uwe. Aba bom risu u kwenkyi utob-ba u nae-ba risu riben te fu be.

³⁰ Afu ye utob te ba asang yang-yi. Afu tom kusung-fu na ande ti ku ya iskin ti ba na fa ba kusen, amaa, aba fxen-ba afu be. Ikyaen ayine, afu sa ba fae si kujwo ande rika-ba.

³¹ Amaa, ikyaen ayibrisi-fu ti ko timambe, afu twenji-fu aba be, u kafe isim ta-fu aba be. Ikyaen ti, afu si Rimam ti tinyang ti site ayibrisi timambe!

³² Tine, Rimam-ti, Rimam tiyang, Rimam ti site kuko, Rimam ti ku nda ande ikyenricwu, afu ti ku ye su unju ti yer-fu u site ure ti tsi kukunn te ande-fu, sae ru-fu rikaen ti tu ti be. Tangsom te rikaen ti abikwe ti afaen-ba ngwa, akwen-fu ti atom-fu ti ande-fu ti tsitsi meme, sa ti kiye na abikwe Asiriya ba kwer yaka ne.

³³ Afu nde pang atang ti afu byinn ti kimbab. Afu ye su unju ti yer-fu, ko ti ati nde ikentitibi.

³⁴ Abikwe-ti, afaen-ti, akwen-ti, ti abitse-ti, ye su-ba icwe-fu be. A naa atong fxen-ba icwe-fu ti kusen ti fa-fu ti afu nda ba be.

³⁵ Ko kiye ti a som usom ukwe ti risu-ba, afu nde ba ti tinyang, u nda ba riben tiyaen ti site ajib timambe, amaa, a ya ikentitibi ta-ba be, u fen-ba afu be.

³⁶ Tine ati kafe pu ti apyi, yi riben ti afu nda abitse-ti ti ba na ci utug-wu ti rinyang-wu.

³⁷ Titinyang ti ku tso riben atang, a ku pu yi ka na-ba abikwe ba, ti afu pu ta risu-ti ikyaen ikentitibi-ti. Aba ta risu-ti ti indag-ti meme. Aba ku nde iken ti nyang uwae-ba te ti. Ama ati ta uwae rikaen beb timambe.

Isirela Yer Unju Uwe Rimam

³⁸ “Ikyaen meme iken ayine, ati ku yer unju uwe Rimam ti utob-ti, ama u bae yi bae tsi. Ande ti uwe-ti, ti anyisu Lawi, ti akwen-ti kwa kujwo atang.”