Nehemiya 6 - Kutsingken Ira Rimam ti Saen Kyag

A Myae Kumyae Titibi Risu Nehemiya

¹ Sanbalati ti Tobiya ti Geshem ti si unde ti Arab, ti ande ti rika-ti ti tsitsi fxen baa, ati na mbye tag pu ti ukoh wu, uwog iki na tsitsi-wu be. Si nyáng ufu tiyang ti kupam-wu ti ati sa sang-ti khika be.

² Ikyaen yine, Sanbalati ti Geshem tsa kutsa ba uwog-m baa, ame na ka tu ba yi mbae uten iki ti ta utabmae na Ono. Ayine si kutxae-ba. A ku kwab ti a u nde m ira ti itibi.

³ Ame tom atom ru ka ri te ba baa, “Ame ku nde wande tiyang, ame u ba-m atang be. Ame u ya wande yi ta-m ti yi u kyatsi ikyaen ti m u ka sae fu be.”

⁴ A tsa kutsa ba na m atsepu inje ku ri sí ira kinjo. Ame ama tsa na ba ti mbwe-yi.

⁵ Ama Sanbalati tom kyi upyi-wu iki ti kutsa ti fa ti itsong ti awu bae, ti a fxeb-ba wu fxeb be.

⁶ Iken ti awu bae uwae kutsingken wu si ti, “Ande ice ku ri baa, afu na te Mbayawuda na ku sha ti ni na u bom risu, ama Geshem cwe baa, ayi na si kubenti. Nee iken ti nde ani ku mbye shem ukoh wu. Awu ri te m baa, afu na ku sha ti fu na u nae na ijwe-fu ukwe.

⁷ Ama afu na pu atom Rimam iki na tsi pu fu ti a na u ya iskin uwae Urushelima baa, afu na si ukwe na Yawuda. Ukwe Aritaserke u fxen kang ira yine. Ikyaen yine, ame kab baa, afu na ba, ti ti na myae kumyae risu-yi.”

⁸ Ama ame tsa na wu baa, “Meme ira-fu ayi ti afu ri ne si-yi kubenti be. Afu ti myae yi ti uwae-fu.”

⁹ Aba ku kwab ti a u nda ti ikyenricwu ti wande yi na tsika. Amaa, ame jwam Rimam baa, “Tine, Rimam, nda m ti m tsi ti ribom!”

¹⁰ Usir iki ame ka uwog Shemayiya, umbae Delaya ti si umbae na umbae Mehetabel. Unde wune ku som ti kununn-wu, ku ru ye-wu ise be. Awu ri te m baa, “Ti ru ka tam kusog Rimam ti uwae, ti ti cwunnkyi ufu, bara be a ku ba ti a u wen fu. Aba ku myae ti a u ba wen fu utitang ne.”

¹¹ Ame ri baa, “Unde pangma ame u ter ru kaa titam a. Afu ku kab baa, ame u nwangru risu-m nee ame a ka tam kusog Rimam tiyang a. Ame u ka-m be.”

¹² Kiye ti ame kab ira risu-yi, ame nungye baa, Rimam na ri-wu ira iki te Shemayiya be, amaa, Tobiya ti Sanbalati ti jab wu ti wu na ba ri ira yine na te m.

¹³ Aba jab wu ti wu na nda m ikyenricwu ama ti ame na nde ikentitibi, ikyaen ti aba u nde mbeb m rinyi ama u txir m itxir.

¹⁴ Ame jwam Rimam baa, “Rimam, tangsom te ira titibi ti Tobiya ti Sanbalati nde ne, ti byinn ba kimbab. Tangsom kwer ti Nowadiya unda ti ku ya iskin, ti meme atom ti ku ya iskin ti ku kwab ti a u nda m ikyenricwu.”

A Mamtag Wande Ukoh Uten wu

¹⁵ Meme wande na ukoh wu mamtag uwae usir ti rikom mbe itsong uwae ushaen Elul, isim usir mae ifaen ka mbe rijwe asu ifaen na wande yi.

¹⁶ Kiye ti ande ti rika-ti ti ande ti pakob ti fxen ira yine, aba num ijwe. Ikyenricwu ye ba ikyaen ti, meme ande nungye baa, kujwo Rimam na ta yi wande yi.

¹⁷ Uwae kiye wu, ande ti uwe na Yawuda ku bae atsingken ka na Tobiya. Awu ama ku bae ana-wu ba na ba.

¹⁸ Ande yang-ba yi Yawuda te Tobiya yer unju, ikyaen ti, Shekaniya umbae Arah urae Isirela si uyeb-wu ti urom. Ti fa kyi, Jehohana umbae Tobiya mbe umbae Meshulam umbae Berekiya urae Isirela.

¹⁹ Cwucwo, ande ku ba tsi uwe-m ku pwen ira ti tinyang risu Tobiya te m ama ku fxen m ira unju u ku sa ka pwen tag te wu. Ikyaen na ayine awu tsikunn ti wu ku bae atsingken ba na m ku kwab ti wu na u nda m ikyenricwu.