Nehemiya 4 - Kutsingken Ira Rimam ti Saen Kyag

Ande Iki Tsi Ukub te Wande Nehemiya

¹ Kiye ti Sanbalati fxen baa, ati Mbaibrane na bag pu ti itimbye shem na ukoh wu, awu tso rinae timambe ama u txir ti itxir.

² Yi uwe na ande ti putsa wu, ti akyirten na Samariya, awu ri baa, “Imi ti Mbaibrane ba ti fa-ba ukwab be ne ku kab ti a na u nde? Aba ku sha ti a na u mbye shem uten wu a. A u mamtag wande yi usir kinjo a. Amumunn atxom ti twen mbubub ne, a u pu yi mbye tu kusog atang, ama u twen ikentitwen u yerkob kusog wu a.”

³ Tobiya, urae Amon, tsi fer wu atang, ama ri kyi baa, “Ki! Iken ti aba ku mbye ne, ujwong a tso atang, awu u kyaen pu yi si ti riben!”

⁴ Ame jwam baa, “Aya Rimam! Fxen ititxir ti a ku txir ti ne! Nda ititxir yi ti a kafe si ti risu-ba. Ande iki ā fxaembe meme iken ti aba site yi! Ande ti rika ā pu ba ru usom apyi!

⁵ Ya ta na-fu aba be. Tangsom ti ikentitibi ti aba ku nde, ikyaen ti, aba txun ti asu, ati ande ti ku mbye rimbye.”

⁶ Tiri ati ru uwe ti itimbye shem na ukoh wu, ama ti ritsen ti ritsen ukoh wu mbye tso ka pu wu kapam, ikyaen ti uwae-ba tsi ti a u nde wande yi.

⁷ Kiye ti Sanbalati ti Tobiya ti ande ti Arab ti Amon ti Ashidod fxen baa, ati na ku ru yi uwe ti itimbye shem ukoh na Urushelima wu, aba tso rinae timambe, ikyaen ti aba fxen baa, ati na mbye ren pu ti riya riya ti ku ukoh wu.

⁸ Tiri aba byir atso u myae ira ti a na ba kunn Urushelima ti rika, u sa kyirunn sang.

⁹ Amaa, ati jwam Rimam-ti ama u pu akyirten tsi ujwin, usir ti utitang ikyaen ande ti rika ba.

¹⁰ Ande ti Yawuda sur ikwaen baa, “Ati numtag pu ti ti isu ti su. Acwupwe ti kyaensi ko timambe ti kwae. Ati u nde rimang u mbye ukoh wu ne?”

¹¹ Ande ti rika-ti ku kab baa, ati na u sae-ti aba be, ama ati na u nung-ti iken ti aba na ku nde be. Aba na u ba gbugfa ti fa amam, u wen ti ama u nda wande yi kyaetsi.

¹² Kiye wu Mbaibrane ti nae ko aka fer ande ti rika-ti ba ri kob te ti baa, “Ko ati a kafe ru-yi aka, aba na u kunn ti ti rika.”

¹³ Ikyaen yine ame nda akyirten pu afag ti iti, ti kokuta, ama u pu ba tsi ti umyaem umyaem yi isim ukoh uwog ti a mbye tag-ba wu khika be.

¹⁴ Ame sae meme iken ti ku nde, ama u nwunn ka ri te ande ti uwe, ti ande tiyang baa, “Ni kyen-ni ikyenricwu na ande ti rika-ti be. Tangsom te itso kuko na Itsekuru-ti, ti ikyenricwu ti awu ku sa ye ande. Ni ta rika ikyaen ameinja-ni, ti anyisu-ni, ti awa-ni ti anunn-ni”

¹⁵ Kiye ti ande ti rika-ti fxen baa, ati na nungye pu ti kumyae ti a ku myae risu-ti ama u nung baa, Rimam na byinn mbub pu wu kumyae-ba, meme-ti kafe ru ti uwog ukoh wu ti ti mbye.

¹⁶ Tsikunn kiye wu ru uwe, ripye na ande-m ku nde wande, ripye ti tsitsi u ye su iti, ti apwarika, ti apwarika ti a ku sisi, ti kokuta u som ti ujwin. Ama ande ti uwe-ti kan atso u tsi u ku ri bom

¹⁷ ande ba ti ku mbye shem ukoh wu ijwe. Ande ti ku su isu ukoh wu ku nde wande ti kujwo kinjo, u ye su usu rika-ba ti kujwo ti ifaen,

¹⁸ ama unde titini ti ku mbye ukoh wu sa ufag-wu cwun imbyi. Unde wu ti ku kunn kutumu ama tsi te m.

¹⁹ Ame ri te ande ba ti ande tiyang-ba ti ande ti uwe-ba baa, “Wande yi ko timambe, ama ayi nda ti ta rurwen te atso uwog ukoh atang.

²⁰ Ani a fxen kutumu, ni ter ba uwog-m. Rimam-ti u ta rika ikyaen-ti.”

²¹ Usir titini ti kiskinn fifae ba kwer ti kiye ti atitaen ku ru ye ise utitang, ripyir-ti ku nde wande yi ukoh wu, ama ripye ti ifaen ye su iti ku tsi ujwin.

²² Kiye wune ame ri te ande ti ku nungkyi wande yi baa, aba na ti ande ti ku ndeya ba na som ti Urushelima utitang ikyaen ujwin, ucwe a fam si pu wu, aba na ru yi uwe ti wande ti ti nde.

²³ Ame ku tunn-m atupwa-m tunn be, kwer ti ameinja-m ti te m ta tetso, ti ande ti ku nde na m wande. Akyirten ti ku kyir m nde ti mbwe-yi ama. Meme ti ye su usu rika-ti ti ajwo.