Nehemiya 3 - Kutsingken Ira Rimam ti Saen Kyag

Itimbye Shem Ukoh Urushelima

¹ Kukwen tiyang ti rinyi-wu si Eliyashib ti ameinja wande-wu, akwen ti tsitsi, bag u mbye shem Ufu Mbawen, u pu ifu-yi ti ipam-yi sang ti uwog-yi, ama u yerkob wu. A yerkob ukoh wu ru ka sang ti Kitaen-kujwén ana akyirten, fa ti Kitaen-kujwén ana Hananel.

² Ande ti Jeriko mbye iyen ti somtsa. Zakur umbae Imri mbye iyen ti som tsa.

³ Rishintang Hasena ti mbye Ufu Iwag. Aba pu ituku ti a ku pu ce sang ufu kusog tā, u pu ifu-yi ti kupam-yi sang, u pu kumbwa ti a cwunn ifu, uwae ti ise, kwer bae.

⁴ Meremoti umbae Uriya ti itse-wu si Hakozi, mbye somtsa. Meshulam umbae Berekiya ti itse-wu si Meshezabel, mbye somtsa. Zadoki umbae Bayana, mbye somtsa.

⁵ Ande ti Tekowa mbye somtsa, amaa, ande ti uwe-ba cwe-ba ti a u pu ajwo-ba kú ye wande ti ande ti risu wande yer na ba be.

⁶ Joyada umbae Paseya, ti Meshulam umbae Besodeya, mbye shem Ufu Jeshana. Aba pu ituku ti a ku pu ce sang ufu kusog yi tā, u pu ifu-yi ti ipam-yi sang, ama u pu kumbwa ti a ku cwunn ufu uwae ti ise kwer bae.

⁷ Melatiya, urae Gibeyon, ti Jadon, urae Meronoti, ti ande ti Gibeyon, ti ande ti Mizipa, mbye somtsa ka sang ti uwog kununn unde ti risu Lardi Ukunn Uyinn.

⁸ Uziyel umbae Harihaya unde ti ku kwen kufwang zinariya, mbye putsa. Hananiya unde ti ku kyae kindob ti ku nung kuyang, mbye putsa. A mbye nyang Urushelima ka sang ti unju Ukoh ti Riyaen.

⁹ Refaya umbae Hur, unde ti uwe iyen kyab Gunduma Urushelima, mbye somtsa.

¹⁰ Jedaya umbae Harumafi mbye putsa uwog ti fer ti kununn-wu. Hatushi umbae Hashabniya, mbye uwog ti somtsa.

¹¹ Malikiya umbae Harim, ti Hashub umbae Pahati-Mowab mbye ukoh ti somtsa, fa ti kitaen-kujwén ti somtsa uwog ti a ku fxab buredi atang.

¹² Shalum umbae Haloheshi, unde ti uwe iyenkyab Gunduma Urushelima ti ifaen, mbye somtsa. Anyisu-wu ti anda ndeya wu ti wande yi.

¹³ Hanun ti ande ti uten ti Zanowa mbye shem Ufu Kubxab. Aba pu ifu-yi ti ipam-yi sang, u pu kumbwa ti ku cwunn ufu uwae ti ise kwer bae. Aba mbye ukoh wu ka kwer tag ti Ufu Kanjag, rikob tirisang ukoh wu ti aba kyaenyang, ka afxen kumbub kinjo ti ukob itsong (1,500).

¹⁴ Malikiya umbae Rekab, unde ti uwe Gunduma Beti-Hakerem mbye shem iyen ti ta Ufu Kanjag. Awu pu ifu-yi ti ipam-yi sang ama u pu kumbwa ti a ku cwunn ufu ti uwae ti ise kwer bae.

¹⁵ Shalum umbae Koluhoze unde ti uwe iyenkyab Gunduma Mizipa mbye shem Ufu Ribung. Awu kukyi ufu-wu, u pu ifu-yi ti ipam-yi sang, ama u pu kumbwa ti cwunn uwae ti ise kwer bae. Yi Ukwae Ambyi na Shela, awu mbye ukoh ti fer risaen ukwe, ka sang ti ufkan wu ti a kyae ru ka sang uten Ukwe Dawuda.

¹⁶ Nehemiya umbae Azubug, unde ti uwe iyenkyab Gunduma Beti-Zur, mbye ti somtsa ru ka kwertsi ti kuskab Dawuda, ti kukwae ambyi ti a mumum, fa ti asog akyirten.

Anyisu Lawi ti Nde Wande Ukoh

¹⁷ Anyisu Lawi bane mbye shem uwog kuko ahan yi ukoh wu. Rehum umbae Bani mbye uwog ti putsa. Hashabiya, unde ti uwe iyenkyab Gunduma Keyila mbye uwog ti somtsa kutunn unju ande-wu.

¹⁸ Binuyi umbae Henada unde ti uwe na iyenkyab Gunduma Keyila ti ifaen mbye ti somtsa.

¹⁹ Ezer umbae Jeshuwa, ukwe na Mizipa mbye ti somtsa, yi uwe uwog ti a pu isu rika tsi atang, ru ka kwer ti uwog ti ukoh kwerfe atang.

²⁰ Baruk, umbae Zabai, kwab, u mbye somtsa, ru ka kwer ti unju ufu kusog na Eliyashib kukwen tiyang. Awu nde wande yi ti ribom-wu.

²¹ Meremoti umbae Uriya ti itse-wu si Hakozi, mbye ti somtsa tso ka kwer ti ricwunnkyi kusog Eliyashib.

Akwen ti nde Wande yi Ukoh

²² Akwen ba ti nae pakob uwog wu mbye ukoh wu ama.

²³ Benjamin ti Hashub mbye ti somtsa uwe ti anunn-ba. Azariya umbae Maseya ti itse-wu si Ananiya, mbye ti putsa uwe ti kununn-wu.

²⁴ Binuyi umbae Henada mbye ti putsa, nwunn ti kununn Azariya ru ka ti rikwerfe na ukoh wu.

²⁵ Palari umbae Uzai mbye somtsa, bag ti rikwerfe na ukoh wu ti kitaen kujwin na ukwe ti fer ti uwog ti akyirten ku som atang. Pedaya umbae Paroshi mbye somtsa,

²⁶ ka kwer ti Ufu Ambyi ti ta usir ti kujwo kiskinn ti kitaen-kujwén ti ta kusog Rimam tiyang. Uwog wune ta fer ti Ofel, uwog ti ande ti ku nde wande kusog Rimam tiyang ku som atang.

Ande ti Tsitsi ti Mbye Ukoh

²⁷ Ande ti Tekowa mbye ti atsepu ifaen-ba somtsa, nwunn ti uwog ti ta fer ti kitaen kujwin tiyang ba kwer ti ukoh ti fer Ofel.

²⁸ Kumbub akwen iki mbye somtsa, nwunn ti Ufu Kakum ku tso yi kujwo isku. Ko kukwen titini uwae-ba mbye ukoh ti ta uwe kununn-wu.

²⁹ Zadoki umbae Imer mbye ti somtsa yi uwe kununn-wu. Shemayiya umbae Shekaniya, unde ti ku nungkyi ufu ti usir ti kiskinn mbye somtsa.

³⁰ Hananiya umbae Shelemiya ti Hanun umbae ti itsongnjo na Zalafi mbye ti ifaen-ba somtsa. Meshulam umbae Berekiya mbye putsa uwe kusog-wu.

³¹ Malikiya, kinjo uwae ande ti ku kwen kufwang zinariya, mbye somtsa ka kwer ti kusog na ande ti ku nde wande kusog Rimam tiyang, ti ande ti ku kafe ajwo ti fer ti Ufu Mifika ti fer kusog ti ta apupwen uwog ti rikwerfe ukoh.

³² Ande ti ku kwen kufwang zinariya ti ande ti ku kafe ajwo mbye uwog ti ta kutampwa kusog ti apupwen wu ti ta rikwerfe, ti Ufu Iwentam.